Vill „vernda börnin“ og meina þeim aðgang að dragsýningum

„Drag­sýn­ingar eru eng­inn staður fyrir börn.“ Þannig hefst Twitter-færsla þing­manns Repúblikana­flokks­ins í full­trúa­deild Texas, sem und­ir­býr nú frum­varp sem börnum verður bannað að sækja drag­sýn­ingar.

Rúmum tveimur vikum eftir skotárás í grunn­skóla í smá­bænum Uvalde í Texas, þar sem 19 börn og tveir full­orðnir lét­ust, hefur umræða um skot­vopna­lög­gjöf í Banda­ríkj­unum kom­ist í hámæli enn á ný. En íhalds­sami, kristni, stolti Texas­bú­inn og verj­andi frels­is­ins, eins og Bryan Slaton lýsir sér á Twitter, er með önnur for­gangs­mál.

„Pervertískt fullorðið fólk sem vill kynlífsvæða börn “

Um síð­ustu helgi hélt hinsegin bar­inn Mr. Misster í Oak Lawn í Texas drag­sýn­ingu þar sem fjöl­skyldur voru vel­komnar. Við­burð­ur­inn, sem er hluti af Hinsegin mán­uði sem fagnað er víðs vegar í Banda­ríkj­unum í juní, féll ekki í kramið hjá hópi fólks sem blés til mót­mæla fyrir utan stað­inn og fjöl­skyldu­væna drag­sýn­ingin var einnig harð­lega gagn­rýnd á sam­fé­lags­miðlum.

Þetta vakti athygli þing­manns­ins sem til­kynnti á mánu­dag að hann ætli að leggja fram frum­varp á næsta þingi Texas-ríkis þar sem börnum verði bann­aður aðgangur að drag­sýn­ingum.

Í til­kynn­ingu sem hann sendi frá sér segir hann atburði síð­ustu helgar hafa verið óhugn­an­lega og hafi sýnt „trufl­andi til­hneig­ingu þar sem per­ver­tískt full­orðið fólk er hel­tekið af því að kyn­líf­s­væða ung börn“.

Slaton, sem starf­aði sem predik­ari um ára­tuga­skeið, á sjálfur tvö börn og seg­ist ekki getað hugsað sér að fara með þau á drag­sýn­ingu og seg­ist full­viss að það eigi líka við flokks­systk­ini sín. Það dugi hins vegar ekki til. „Að vernda börnin okkar er ekki nóg, það er á okkar ábyrgð sem lög­gjafa að bregð­ast við kyn­líf­s­væð­ing­unni sem er að eiga sér að stað þvert yfir Texas,“ segir í til­kynn­ingu þing­manns­ins.

Hann hefur áður látið að sér kveða í mál­efnum hinsegin fólks þegar hann barð­ist fyrir því að kyn­leið­rétt­ing­ar­ferli ung­menna yrði flokkað sem barn­a­níð. Sú til­laga var felld á þing­inu í Texas á síð­asta ári.

Talsmenn hinsegin sam­fé­lags­ins í Texas segir fram­ganga þing­manns­ins ógna til­veru­rétti þeirra. Tillaga Slaton hefur aftur á móti notið tölu­verðs stuðn­ings Íhalds­manna á lands­vísu.

„Við erum greinilega lífshættulegri en byssur“

Dragdrottn­ingar úr einum vin­sælasta raun­veru­leika­þætti heims, RuPaul's Drag Race, hafa látið í sér heyra. Þeirra á meðal er Alyssa Edwards, en ein­kunn­ar­orð hennar, „Hvað í and­skot­anum er í gangi hér í dag“ eða „What the f*** is going on in here on this day?“ hafa lík­lega aldrei átt betur við.

Alyssa, sem er frá Texas, benti Slater á það í færslu á Twitter að hann hafi sjálfur tíst meira um drag heldur en skotárás­ina í Uvalde. „Snýst þetta virki­lega um börnin eða snýst þetta um póli­tík?“