Samvinna til árangurs

Árangur næst með breiðum sam­taka­mætti, en ekki með ósam­stöðu þeirra sem hafa áþekka stefnu en ná ekki að vinna saman að sam­eig­in­legu mark­miði.

Það er alveg í góðu lagi og í sam­ræmi við lýð­ræði að til séu margar stjórn­mála­hreyf­ingar. Með því geta virkir þátt­tak­endur unnið saman af sann­fær­ing­ar­krafti og minna virkir kjós­endur valið sér flokk sem fellur best að þeirra eigin skoð­unum. Þegar til eru margir stjórn­mála­flokkar, þá hlýtur um leið að verða það mik­ill sam­hljómur með sumum þeirra að sjá má að þeir stefna að sama marki í megin málum, þótt milli þeirra sé áherslu­munur um leiðir og sér­tæk mál­efni. Ef fólk lætur sér nægja að vera í „besta“ hópnum og starfa ekki með öðrum hópum sem nærri þeim standa, þá ger­ist ekki neitt.

[adspot]Samstarf í stjórn­málum er miklu stærra verk­efni en að sitja saman í stjórn. Póli­tískt sam­starf er að koma sér saman um mark­mið og leiðir að því mark­miði. Samstarf án sam­eig­in­legs mark­miðs og sam­komu­lags um leiðir, er bara stofu­klúbbur við kaffi­borð. Það þok­ast eng­inn nær mark­miði án þess að hreyfa sig áfram.

Sam­fylk­ingin var stofnuð sem hreyfi­afl með því að sam­fylkja þeim stjórn­mála­öflum sem eru fús til að stefna í sömu átt, í átt til fram­fara, jöfn­uðar og lýð­ræðis, með almanna­hags­muni að leið­ar­ljósi. Sem betur fer má sjá að það eru fleiri en Sam­fylk­ingin sem boða slíka stefnu. Þess vegna er nú tæki­færi til að sam­fylkja þessum stjórn­mála­öflum eftir næstu kosn­ingar. Til þess að það tak­ist er lík­leg­ast til árang­urs að kjósa það afl sem ætlar stað­fast­lega að kalla fram það besta í öllum þessum öflum og koma hreyf­ingu á hlut­ina. Að kjósa Sam­fylk­ing­una eru skýr skila­boð til allra um að leggja saman kraft­ana og fara að ná árangri.

Höfundur er í 19. sæti á lista Sam­fylk­ing­ar­innar í Suð­ur­kjör­dæmi.