Meirihlutaviðræður hefjast milli Sjálfstæðisflokks og Framsóknar í Kópavogi

Ármann Kr. Ólafsson, odd­viti Sjálf­stæð­is­manna í Kópavogi, hefur til­kynnt um að hann og Birkir Jón Jónsson, odd­viti Fram­sókn­ar­flokks­ins í sveit­ar­fé­lag­inu, hafi ákveðið að hefja meiri­hluta­við­ræður um myndun nýs meiri­hluta í Kópavogi.

Sjálf­stæð­is­menn voru í meiri­hluta á síð­ast­liðnu kjör­tíma­bili með Bjartri fram­tíð. Sá flokkur bauð nú fram með Viðreisn undir merkjum BF/Við­reisnar, en odd­vit­inn var sá sami, Theodóra Þor­steins­dóttir.

Talið var nær öruggt að flokk­arnir myndu end­ur­nýja sam­starf sitt ef mögu­legt væri og var vilji til þess hjá odd­vitum þeirra eftir sveita­stjórn­ar­kosn­ing­arnar í lok maí. Í þeim fengu Sjálf­stæð­is­menn fimm borg­ar­full­trúa kjörna en BF/Viðreisn tvo, sem dugði fyrir rúmum meiri­hluta í ell­efu manna bæj­ar­stjórn Kópavogs.

Þrír bæj­ar­full­trúar úr röðum Sjálf­stæð­is­flokks lýstu hins vegar yfir and­stöðu við að starfa með BF/Viðreisn. Theodóra sagði við Morg­un­út­varp Rásar 2 í gær­morgun að það væru per­sónur sem væru að flækj­ast fyrir þeim, ekki mál­efni.