„Forseti úr stjórnarmeirihluta lætur atkvæðagreiðslu ekkert fara fram ef nógu mörg já eru ekki í húsi,“ segir Árni Páll Árnason, þingmaður Samfylkingarinnar, um ástæður þess að hann kaus að sitja hjá þegar greidd voru atkvæði um nýja búvörusamninga. Í gær sendi Stundin fyrirspurn á alla þingmenn sem sátu hjá eða voru fjarverandi við atkvæðagreiðslur um samningana og spurði meðal annars hver væri skýringin á því að viðkomandi þingmenn sátu hjá eða voru fjarverandi við atkvæðagreiðsluna. Einungis 16 af 37 þingmönnum svöruðu spurningum Stundarinnar.

Athygli vakti þegar einungis 30 prósent Alþingis, eða 19 þingmenn, lögfestu nýja búvörusamninga við bændur síðastliðinn þriðjudag. Í frumvarpinu eru bændum gefin fyrirheit um ríkisstuðning upp á um það bil 13 milljarða á ári næstu 10 árin. Alls eru þetta samtals meira en 130 milljarðar króna en ofan á þetta bætist óbeinn stuðningur í formi tollverndar upp á um það bil 9 milljarða á ári. Einungis þingmenn Bjartrar framtíðar og einn þingmaður Sjálfstæðisflokks, Sigríður Á. Andersen, greiddu atkvæði gegn frumvarpinu. Fjórir þingmenn Sjálfstæðisflokksins kusu að sitja hjá. Bent hefur verið á að ríkisstjórnin hafi ekki haft þingmeirihluta fyrir málinu og því hefði stjórnarandstaðan í reynd getað fellt samningana. 

Samningarnir hafa helst verið gagnrýndir fyrir langan gildistíma þeirra, það er tíu ár, og þá hefur ríkisstjórnin verið gagnrýnd fyrir skort á samráði við aðra hagsmunaaðila í málinu - þar á meðal neytendur. Á milli annarar og þriðju umræðu um samningana á þingi var samþykkt breytingatillaga sem kveður á um að skipaður verður samráðshópur um endurskoðun búvörusamninga með aðkomu afurðastöðva, atvinnulífs, bænda, launþega og neytenda. Þeirri endurskoðun skuli ljúka árið 2019 og þá eiga bændur kost á að kjósa um nýjan búvörusamning eða viðbætur við fyrri samningina. Með öðrum orðum þá er það í höndum bænda hvort samningarnir verði til þriggja eða tíu ára. 

„Það er afskaplega hæpið að svona fúsk leiði annað af sér en drasl.“

Óttarr Proppé, formaður Bjartrar framtíðar, sagði frá því á Facebook- síðu sinni í gær að Björt framtíð hafi lagt til að vísa frá þessum tíu ára samningi og framlengja núgildandi samningur um eitt ár á meðan samið yrði upp á