Yfir­lýs­ing sem Anna Sig­ur­laug Páls­dóttir, eig­in­kona for­sæt­is­ráð­herra, birti 15. mars um að Gróa á leiti væri að ræða eign hennar á skatta­skjóls­fé­lagi, kom í kjöl­farið á því að við­tal var tekið við Sigmund þar sem hann var stað­inn að því að segja ósatt um tengsl sín við aflands­fé­lag. 

Í yfir­lýs­ing­unni gerði hún lítið úr aðkomu Sig­mundar Davíðs Gunn­laugs­sonar, eig­in­manns hennar og for­sæt­is­ráð­herra Íslands, að félag­inu, með því að gefa til kynna að hann hefði verið fyrir mis­tök skráður fyrir helm­ings­hlut í félag­inu. „Bankinn minn úti hafði gengið út frá því að við værum hjón og ættum félagið til helm­inga,“ sagði hún og bætti því að það hefði síðan verið „leið­rétt á ein­faldan hátt árið 2009.“

Seldi konu sinni félagið daginn fyrir lagabreytingu

Í umfjöllun Kast­ljóss og Reykja­vík Media nú í kvöld kemur hins vegar fram að hvergi í sam­skiptum bank­ans við Mossack Fonseca var talað um mis­tök eða leið­rétt­ingu á þess­ari skrán­ingu, heldur var Sig­mundur Davíð Gunn­laugs­son skráður fyrir helm­ings­hlut í félag­inu fram til árs­loka 2009.

Þann 31. des­em­ber 2009 seldi hann eig­in­konu sinni síðan helm­ings­hlut sinn í félag­inu fyrir 1 doll­ara. Daginn eftir, eða þann 1. jan­úar 2010, tóku ný lög gildi sem sett höfðu verið til höf­uðs aflands­fyr­ir­tækjum. Samkvæmt nýjum lögðum hefði hann þurft að gera grein fyrir félag­inu á skatt­fram­tal­inu sínu. Þar sem salan fór fram á gaml­árs­dag komst hann hins vegar hjá því. Á hinn bóg­inn bar honum að gefa félagið upp í hags­muna­skrán­ingu alþing­is­manna, en hann gerði það ekki.

Leyndi eign sinni á aflandsfélaginu

Sig­mundur Davíð sett­ist á Alþingi í apríl 2009. Mánuði áður, eða í mars, voru sam­þykktar reglur um hags­muna­skrán­ingu þing­manna en Sig­mundur Davíð lét hjá líða að skrá Wintris.

Sig­mundur Davíð hefur sagt að engin leynd hafi verið yfir félag­inu. Engu að síður var ekk­ert sem tengdi þau hjónin við félagið þar til Anna Sig­ur­laug greindi sjálf frá því. Fram að því voru kröfur í slitabú föllnu bank­anna einu upp­lýs­ing­arnar sem fund­ust um félagið. 

Síðar hefur hann sagt ástæð­una fyrir því að hann skráði félagið ekki í hags­muna­skrá þing­manna þá að hann hafi ekki þurft þess, meðal ann­ars vegna þess að félagið var ekki í atvinnu­rekstri, þótt ekki sé kveðið á um slíkt í hags­muna­skrán­ingu Alþings­manna. Þá hefur hann sagt að það hefði verið rangt að greina frá hags­munum eig­in­konu hans, en félagið Wintris gerði rúm­lega hálfs millj­arðs króna kröfur í slitabú íslensku bank­anna. 

Vörn Sig­mundar Davíðs sam­ræm­ist ekki því að hann skráði annað félag í hags­muna­skrán­ing­una sem var ekki heldur í atvinnu­starf­semi, félagið Menningu ehf. 

Félagið skráð á bæði hjónin í upphafi

Samkvæmt gögn­unum sendi starfs­maður Lands­bank­ans tölvu­póst þann 26. nóv­em­ber 2007 og bað um að félagið Wintris yrði tekið frá. Tveimur dögum síðar sendi sami starfs­maður ósk um að próf­kúru­hafar félags­ins yrðu tveir og til helm­inga, þau Anna Sig­ur­laug og Sig­mundur Davíð. Samkvæmt stofnskjöl­unum virð­ist félagið hins vegar vera dag­sett aftur í tím­ann, eða þann 9. októ­ber 2007, um tveimur mán­uðum eftir að starfs­maður Lands­bank­ans fal­að­ist eftir félag­inu fyrir þau hjónin.

Samkvæmt umfjöllun Kast­ljóss og Reykja­vík Media ber að taka öllum dag­setn­ingum frá Mossack Fonseca með fyr­ir­vara.

Sigmundur prókúruhafi en skráði ekki hagsmunina

Seinna hafði Sigurður Atli Jónsson, sem kvæntur er systur Sig­mundar Davíðs, sam­band við Mossack Fonseca sem starfs­maður Lands­bank­ans, fyrir hönd skjól­stæð­inga sinna, og vildi ræða fyr­ir­komu­lag þjón­ust­unnar vegna Wintris og hvernig ætti að haga henni til fram­tíðar. 

Þrátt fyrir breyt­ingar á skrán­ingu félags­ins tók eig­in­kona Sig­mundar Davíðs ekki við fram­kvæmda­stjórn félags­ins fyrr en í sept­em­ber 2010. Engin gögn virð­ast vera til þess efnis að pró­kúra Sig­mundar Davíðs hafi verið aft­ur­kölluð, hvorki þá né síðar. 

Neitaði tengslum við aflandsfélög

Í þætt­inum sem sýndur var í kvöld var birt við­tal við Sigmund Davíð, þar sem sænskur rann­sókn­ar­blaða­maður Uppdrag granskning, Sven Bergman, spurði ásamt Jóhann­esi Kr. Krist­jáns­syni út í tengsl hans við Wintris Inc. Eftir að hafa spurt Sigmund Davíð almennt út í skoð­anir hans á aflands­fé­lögum í skatta­skjólum spurði Sven hvort hann hefði sjálfur tengst slíkum félögum. Sig­mundur neit­aði. 

Sven Bergman: En hvað með þig, herra for­sæt­is­ráð­herra? Hefur þú eða hefur þú sjálfur haft ein­hver tengsl við aflands­fé­lag?

Sig­mundur Davíð Gunn­laugs­son: Ég? Nei. Nú… Íslensk fyr­ir­tæki, og ég hef stafað hjá íslenskum fyr­ir­tækjum, höfðu tengsl við aflands­fé­lög og meira að segja.. Hvað heitir það nú, verka­lýðs­fé­lögin… Svo að það hefði verið í gegnum slíkt fyr­ir­komu­lag en ég hef ætíð gefið upp allar mínar eignir og fjöl­skyldu minnar til skatts­ins svo að það hefur aldrei verið svo að eigur mínar séu faldar nokk­urs staðar. Þetta er óvenju­leg spurn­ing að spyrja íslenskan stjórn­mála­mann um. Það er eins og verið sé að ásaka mann um eitt­hvað. En ég get stað­fest það að ég hef aldrei leynt neinum eigna minna. 

Stórar spurningar standa eftir

Eftir standa ýmsar spurn­ingar, sem Kastljós og Reykja­vík Media vörp­uðu fram:

Hvers vegna var félagið stofnað aftur í tím­ann?

Hvers vegna var eign­ar­haldið skráð jafnt á þau hjónin?

Ef um mis­tök var að ræða, hvers vegna seldi Sig­mundur Davíð eig­in­konu sinni sinn hlut?

Hvers vegna var þess hvergi getið að  um leið­rétt­ingu væri að ræða?

Hvers vegna fór salan fram degi fyrir breyt­ingu á skatta­lögum?

Hvers vegna tók Anna Sig­ur­laug ekki við fram­kvæmda­stjórn félags­ins fyrr en langt var liðið á næsta ár?

Hvers vegna var próf­kúra Sig­mundar Davíðs ekki aft­ur­kölluð?

Í þætt­inum sagði Sig­mundur Davíð að hann hefði gefið upp­lýs­ingar um félagið á skatta­skýrslu sinni, seinna sagði hann að eig­in­kona hans hefði gert það. Það hefur ekki verið stað­fest.

Þá hefur Sig­mundur Davíð ekki Hann hefur ekki svarað ítrek­uðum fyr­ir­spurnum um hvort CFC-skýrslu hafi verið skilað fyrir félagið.