Sigmundur Davíð Gunnlaugsson, formaður Framsóknarflokksins, náði ekki að standa af sér mótframboð forsætisráðherrans og varaformannsins Sigurðar Inga Jóhannssonar, sem skapa vildi frið um flokkinn með nýrri forystu, í formannskjöri flokksins í dag.

„Ég tek við þessu embætti af miklu þakklæti og auðmýkt,“ sagði Sigurður Ingi í kjölfar þess að kjör hans var tilkynnt. Hann þakkaði svo Sigmundi Davíð. „Hann var réttur maður á réttum tíma á réttum stað fyrir Framsóknarflokkinn. Ég bið ykkur um að standa upp og gefa honum gott klapp.“

Það er því ljóst að Sigurður Ingi leiðir flokkinn í Alþingiskosningunum 2016, sem fara fram 29. október næstkomandi, í kjölfar afsagnar Sigmundar sem forsætisráðherra eftir afhjúpun á eignarhald hans á félagi í skattaskjóli sem hélt utan um rúmlega 500 milljóna króna kröfur í þrotabú íslensku bankanna. 

Sigmundur  Davíð hlaut 329 atkvæði, Sigurður Ingi Jóhannsson 370 atkvæði, eða 52,6%. Lilja Dögg Alfreðsdóttir hlaut þrjú atkvæði. Auður eða ógildur var einn. 703 greiddu atkvæði. Eftir formannskjörið stóð til að Lilja Dögg og Eygló Harðardóttir héldu framboðsræður vegna varaformannsembættisins, en Eygló dró framboð sitt til baka.

Í ræðu sinni eftir kjörið bað Sigurður Ingi framsóknarmenn að rísa á fætur í annað sinn og taka í höndina á næsta framsóknarmanni til þess að senda strauma framsóknarmennskunnar um salinn. Hann vildi að allir framsóknarmennirnir á flokksþinginu færu út sem ein fjölskylda.

Nýr formaðurDýralæknirinn Sigurður Ingi Jóhannsson leiðir Framsókn í komandi kosningum.

Mynd:

Ásökun um einræði og hroka

Sigurður Ingi Jóhannson gagnrýndi í gær að Sigmundur fengi úthlutaðan klukkutíma í ræðu en hann aðeins korter. Þá kom á daginn að fulltrúar flokksins höfðu fyrirskipað að bein útsending af fundinum yrði rofin eftir ræðu Sigmundar Davíðs, með þeim hætti að ræða Sigurðar Inga var ekki sýnd beint.

Ásmundur Einar Daðason þingflokksformaður hafði sakað Sigmund um „einræði“ og „hroka“ á fundi framkvæmdastjórnar, þar sem dagskrá flokksþingsins átti að vera ákveðin. Að hans sögn neitaði Sigmundur að veita honum orðið nema Ásmundur ræddi það sem Sigmundur vildi. Að lokum hafi Sigmundur lýst fundi slitið og gengið út.  Hann lýsti þessu í ræðu á flokksþinginu í gær.

„Ég vil rekja þetta hérna því all­ir hafa talað um sátta­vilja og auðmýkt. Á þess­um fundi gerðist eitt­hvað sem ég hef aldrei lent í áður. Ég hef aldrei lent í því af manni sem stýr­ir þeim fundi að vera spurður að því áður en ég bið um orðið hvað ég ætla að segja og ég fái ekki orðið nema ég tali um ákveðna hluti,“ sagði Ásmund­ur. 

Uppgjör við taktík Sigmundar

Sigurður Ingi lagði áherslu á þann boðskap í formannsframboði sínu að engir væru óvinir Framsóknarflokksins, en áður hafði Sigmundur dregið upp þá mynd á miðstjórnarfundi flokksins á Akureyri að Framsóknarmenn væru líkt og fótgönguliðar í orrustunni við Waterloo og kvartað undan því að andstæðingar flokksins vildu fella hann. 

Í framboðsræðu sinni sagði Lilja Dögg að ekki ætti að kvarta undan umfjöllunum, heldur benda á það góða. Sigmundur Davíð hafði í formannstíð sinni kvartað undan meintri andstöðu fjölmiðla við hann og Framsóknarflokkinn, ekki síst Ríkisútvarpsins, sem hann gagnrýndi meðal annars í grein sinni Fyrsti mánuður loftárása, sem hann birti á bloggi sínu eftir einn mánuð á valdastóli árið 2013, en síðan þá hafa fjölmargir þingmenn flokksins endurómað óánægju sína með RÚV og meðal annars hótað niðurskurði á grundvelli hennar.

Afneitaði öllu í fyrstu kappræðunum

Sigmundur hafði hafið kosningabaráttu Framsóknarflokksins í fyrstu kappræðum Ríkisútvarpsins á því að kvarta undan RÚV, afneita því að kosningum hefði verið flýtt vegna Wintris-máls hans, hafna því að hann hefði átt aflandsfélag og sagði loks, þrátt fyrir að hafa aldrei greint frá eignarhaldi sínu eða eiginkonu sinnar á Wintris Inc: „Í engu var reynt að fela nokkurn hlut.“

„Í engu var reynt að fela nokkurn hlut.“

Sigmundur Sigmundur var spurður hvort hann sæi enga ástæðu til að biðjast afsökunar: „Við ætlum kannski bara að koma því á hreint. Þú, sem sagt, eftir allt sem á undan er gengið, alla þá atburðarás sem við lýstum hér áðan, og atburði sumarsins, þú sérð enga ástæðu til þess að biðjast afsökunar á Wintris-málinu?“

„Jú, jú, ég nefndi það, ég gæti beðist afsökunar á mörgum hlutum, en ég get ekki beðist afsökunar á því með hvaða hætti ákveðnir aðilar, meðal annars á vegum ykkar stofnunar, gengu fram í þessu máli.“

Nýi formaðurinn ekki óumdeildur

Forsvarsmenn stjórnarandstöðuflokkanna hafa lýst því yfir að auðveldara hafi verið að vinna með stjórnarflokkunum eftir að Sigurður Ingi tók við taumunum sem forsætisráðherra. Sigurður Ingi er hins vegar ekki óumdeildur. Á stuttum ferli sínum hefur hann meðal annars verið gagnrýndur fyrir gerræðislegan flutning Fiskistofu frá Reykjavík til Akureyrar, fyrir vilja sinn til að leggja niður umhverfisráðuneytið, þegar hann varð umhverfisráðherra, fyrir að koma því til varnar að stjórnmálamenn ættu fé í skattaskjólum og fyrir óvandaða stjórnsýsluhætti, meðal annars við úthlutun á leyfi til sölu á saurmenguðum hvalabjór.

Lesa má um feril Sigurðar Inga hér.