Hópur Íslendinga, sem er andsnúinn komu tiltekinna útlendinga til landsins, dreifir gervifréttum af netinu sem afskræma og alhæfa um fólk af múslimskum uppruna.

Fjölmargar rasískar vefsíður eru starfræktar þar sem röngum upplýsingum er dreift í áróðursskyni, þar sem tilgangurinn virðist að vekja upp og dreifa hatri á ákveðnum þjóðfélagshópum, sérstaklega múslimum.

Ein slík frétt sem farið hefur víða segir að múslimskur innflytjandi í Svíþjóð hafi hrækt á sænska, ljóshærða konu. Í dreifingu á myndinni er hann sagður innflytjandi í Svíþjóð og árás hans sett í samhengi við komu flóttamanna.

Sletta sýru og skjóta í andlitið

„Konur þurfa að vopna sig og skjóta svona múslímaskítalýð sem á ekki heima í Evrópu, viðbjóðslegt fólk sem leyfir sér að haga sér svona, nóg komið, senda þá heim og leyfa öðrum að skjóta þá líka,“ segir íslensk kona við deilingu á fréttinni um sænsku, ljóshærðu konuna.