Hlal Jarah, veitingamaður á shawarmastaðnum Mandí við Ingólfstorg, hefur játað fyrir lögreglu að hafa slegið Yaman Brikhan, veitingamann á shawarmastaðnum Ali Baba, við hliðina á Mandí, í átökum í síðasta mánuði.
Slagsmálin brutust út í kjölfar þess að Yaman ók háskalega eftir jarðarför, að mati Hlals og aðstandenda hans, með þeim afleiðingum að bróðir Hlals lenti í hættu. Átökin áttu sér stað við veitingastaðinn Kebabhúsið, sem er á horni Ingólfstorgs og Austurstrætis. Sagt var frá átökunum í Fréttablaðinu.

Í upphafi voru slagsmálin á milli Yamans og bróður Hlals, en atvikin hafi þróast á þá leið að veitingamaðurinn af Ali Baba greip um hreðjar nágranna síns af Mandí í ögrunarskyni.