Húsleit á Akureyri: Iðnaðarklór seldur sem „kraftaverkalausn“ fyrir sjúklinga

Lög­reglan á Akureyri lagði í dag hald á „krafta­verka­lausn­ina“ MMS í hús­leit sem gerð var í verk­smiðju í bænum. Varað hefur verið við því að krafta­verka­lausnin geti valdið veik­indum eða dauða. Fram­leið­and­inn full­yrðir hins vegar að lyfið geti læknað allt frá krabba­meini til alnæmis og berkla. „Það alveg svo­leiðis hrynur af þeim krabba­meinið um leið og þeir byrja að taka inn þennan kúr,“ segir hann í sam­tali við Stundina.

Alfreð Schiöth, fram­kvæmda­stjóri Heil­brigð­is­eft­ir­lits Norð­ur­lands eystra, stað­festi í sam­tali við Stundina að eft­ir­litið hafi falið lög­reglu að rann­saka málið, en hann hafði enn ekki heyrt af aðgerðum lög­reglu í dag þegar Stundin tal­aði við hann. „Það barst ábend­ing til Lyfja­stofn­unar um að þessi vökvi væri í sölu eða dreif­ingu og við­kom­andi gat vísað á heima­síðu. Á heima­síð­unni voru engin nöfn eða ábyrgð­ar­menn og málið því svo­lítið óljóst. En heil­brigð­is­eft­ir­litið óskaði eftir að lög­regla rann­sak­aði málið og legði hald á þennan vökva ef hann finnd­ist,“ segir Alfreð. Hann segir að ábend­ing­unni hafi fylgt saga af lang­veikum ein­stak­lingi sem hafi verið að taka inn þennan vökva, en óvíst er hvort hann hafi orðið fyrir heilsutjóni vegna þess. „Þetta er hættu­legt fyrir full­frískt fólk og þeim mun hættu­legra fyrir sjúk­linga,“ segir Alfreð.