Nú stendur yfir atkvæðagreiðsla meðal hjúkrunarfræðinga um verkfall en niðurstöðu er að vænta á mánudag. Verði það samþykkt munu hjúkrunarfræðingar fara í verkfall miðvikudaginn 27. maí náist ekki samningar fyrir þann tíma. Helga María Guðmundsdóttir hefur starfað í sjö ár á Landspítalanum. Grunnlaunin hennar eru 334.865 krónur. Hún er ein þeirra sem ætlar að greiða atkvæði með verkfalli. 

„Þetta er skref sem enginn hjúkrunarfræðingur vill taka. Við vitum alveg hversu mikil áhrif þetta mun hafa á spítalann og ég tala nú ekki um þegar fleiri stéttir eru í verkfalli á sama tíma. En það er líka þreytandi að standa í kjaraviðræðum þetta lengi og við sitjum alltaf á hakanum,“ segir hún í samtali við Stundina, en Helga María skrifaði einnig grein um málið í Fréttablaðið í dag. 

Alvarleg staða á Landspítala

Ófremdarástand hefur verið á vinnustað Helgu Maríu, Landspítalanum, á undanförnum vikum. Geislafræðingar, lífeindafræðingar og ljósmæður hafa verið í verkfalli síðan 7. apríl og er fátt sem bendir til þess að deilan sé að leysast. Vegna verkfalla hefur þurft að fresta fjölda rannsókna og aðgerða. Ljóst er að verkfallið ógnar verulega öryggi sjúklinga en einungis bráðatilfellum er sinnt. 

Hjúkrunarfræðingar og annað starfsfólk spítalans hafa því fundið fyrir auknu álagi síðustu vikur, fyrir utan þær afleiðingar sem verkfallið hefur þegar haft á sjúklinga og aðstandendur. Verkfallsaðgerðirnar hafa komið sérstaklega illa við bráðamóttöku Landspítalans og hafa sjúklingar meðal annars þurft að bíða klukkutímum saman eftir niðurstöðum úr röntgenmyndatöku. „Við erum eitt púsluspil. Ef það vantar eitt þá erum við ekki ein heild. Við þurfum öll að vinna saman,“ útskýrir Helga María. 

Í miðju verkfalli kom það upp að annað tölvusneiðmyndatæki Landspítalans bilaði og því þurfti að flytja alla sjúklinga sem lágu inni á spítalanum í Fossvogi yfir á Hringbraut til þess að komast í rannsóknir. „Þetta ástand stóð yfir í nokkra daga og þetta hefur komið fyrir áður. Það var töluverð umræða um þetta fyrir nokkrum árum, en þetta var ekkert í umræðunni núna. Fólk er kannski bara orðið vant þessu ástandi og þetta þykir ekki fréttnæmt lengur,“ segir Helga María.  

„Við viljum auðvitað fylgja fordæmi þeirra og vorum auðvitað mjög ánægð með að þeir skyldu fá leiðréttingu á launum sínum.“

Verkfallshrinan á Landspítalanum hófst með verkfalli lækna síðasta haust. Þeirri deilu lauk með kjarasamningi sem fól í sér um tuttugu prósenta launahækkun lækna. „Við viljum auðvitað fylgja fordæmi þeirra og vorum auðvitað mjög ánægð með að þeir skyldu fá leiðréttingu á launum sínum,“ segir Helga María.