Sigríður Andersen, alþingismaður Sjálfstæðisflokks, sagði á Rás 2 í morgun að kjararáð hefði haft samráð við Alþingi um þá launahækkun sem þingmönnum voru færðar strax eftir kosningar. Hún sagði að enginn hefði mótmælt hækkuninni en forsætisnefnd hefði talið að það ætti að dreifa henni.

„Það vissu allir stjórnmálaflokkar á þingi að þetta stæði til. Það var búið að kynna forsætisnefnd Alþingis þetta að það væri að skoða þetta,“ sagði Sigríður um þær miklu launahækkanir sem kjararáð hefur úthlutað þingmönnum og æðstu ráðamönnum. Hækkunin ein til þingmanna nemur 338 þúsund krónum á mánuði. Æðstu ráðamenn fá yfir hálfa milljón króna. Lægstu laun í landinu eru langt innan við 300 þúsund krónur.

Þingmenn hafa hækkað mun meira í launum en almenningur á síðustu árum og hafa þeir fengið 75% hækkun á kjörtímabilinu sem nú er að enda.

Verðskulduð hækkun Sigríður Andersen vill ekki afturkalla hækkun á launum þingmanna.

Mynd: xd.is

Sigríður var í morgunútvarpi Rásar 2 ásamt Jóni Þór Ólafssyni þingmanni Pírata, sem vill afnema hækkunina. Sigríður gaf lítið fyrir þann málflutning og lýsti því að þingheimur allur hefði verið með í ráðum og mönnum hefði verið boðið að gera athugasemdir.

„Formenn allra flokka fengu tilkynningu um að þetta væri til skoðunar," sagði hún.

„Forsætisnefnd kom með þá einu athugasemd að óheppilegt væri að gera miklar hækkanir í stórum stökkum, heldur gera þetta jafnt og þétt,“ segir Sigríður sem taldi að þeim ábendingum hafi verið komið á framfæri við kjararáð allt kjörtímabilið.

Bjarni Benediktsson, formaður Sjálfstæðisflokksins, virtist hins vegar tala gegn orðum Sigríðar Andersen á Bessastöðum rétt í þessu. „Nei, ég vissi ekki um það hvað kjararáð myndi ákveða,“ sagði hann, en kvaðst þó hafa fylgst með. „Þetta er mjög mikil hækkun,“ sagði Bjarni, „sem þarfnast frekari útskýringa og það er ekki víst að hún gangi upp.“ 

„Verkalýðsleiðtogar á himinháum launum“

Jón Þór sagðist vera hlynntur því að Alþingi grípi inn í málið og breyti ákvörðuninni. Hann sagði að þarna væri kastað sprengju inn á vinnumarkaðinn. Sigríður er á annarri skoðun.

Henni blöskrar að verkalýðshreyfingin tali „voða digurbarkalega“ um hækkun á launum alþingismanna.

„Allir leiðtogar verkalýðshreyfingarinnar eru á himinháum launum. Sumir hverjir sem hafa tekið gríðarlegum launahækkunum, langt umfram alla launaþróun,” sagði Sigríður á Rás 2. Hún taldi þá gagnrýni sem fram er komin vera „til heimabrúks”. Aðalatriðið væri það hvort þingmenn ættu skilið að fá umrædd laun en ekki hver hækkunin væri. Varðandi ólgu á vinnumarkaði vegna málsins sagði Sigríður að óróleikinn væri hvort sem er alltaf til staðar. „Er ekki alltaf órói á vinnumarkaði hér?“ spurði Sigríður.

Sprengja Jón Þór Ólafsson vill að hækkunin verði afnumin.

Kristján Möller, fyrrverandi alþingismaður Samfylkingar og nefndarmaður í forsætisnefnd, kannaðist ekki við að kjararáð hefði haft samráð við nefndina. 

„Ég hef þá ekki setið þann fund,“ sagði Kristján.

Vesen með gleraugu

Sigríður lagði áherslu á það í viðtalinu við Rás 2 að hún væri ekki að verja ákvörðunina. Hún benti þó á að kjör þingmanna væri flókin og ekki einfalt að átta sig á styrkjum til gleraugnakaupa eða heilsuræktar. Þá væri flókið fyrirkomulag vegna utanbæjarþingmanna. 

„Nú er ég ekki að verja að verja þessa ákvörðun, alls ekki. Ekki heppilegt að gera þetta svona,“ sagði Sigríður í morgun.