„Dapurlegt til þess að hugsa að Ísland eigi þar hlut að máli“

Atl­ants­hafs­banda­lagið (NATO) lýsti yfir stuðn­ingi við loft­árásir Tyrk­lands sunnan landamæra við Sýrland og Írak eftir neyð­ar­fund allra aðild­ar­ríkja í Brussel á þriðju­dag. Fullyrti Jens Stol­ten­berg, fram­kvæmda­stjóri NATO, í fjöl­miðlum að náðst hefði algjör sam­staða allra banda­lags­þjóð­anna um að lýsa yfir stuðn­ingi við Tyrki. 

Loft­árásir Tyrkja bein­ast ekki aðeins gegn Íslamska rík­inu (ISIS) heldur einnig gegn Kúrdum, þ.e. liðs­mönnum Verka­manna­flokks Kúrda (PKK), sem borið hafa hit­ann og þung­ann af bar­átt­unni gegn ISIS. Tyrkir hafa varpað sprengjum á skýl­i, birgða- og stjórn­stöðvar og hell­a sem liðs­menn PKK halda til í og í dag var jafn­framt ráð­ist á bæki­stöðvar þeirra í norð­ur­hluta Írak. 

Stundin hefur óskað eftir upp­lýs­ingum frá utan­rík­is­ráðu­neyt­inu um afstöðu Íslands til loft­árása Tyrk­lands gegn Kúrdum og hvort full­trúi Íslands hafi komið athuga­semdum á fram­færi á neyð­ar­fund­inum. 

Erdogan for­seti Tyrk­lands

Mynd: Wikimedia Commons

Samstarfsflokkur Sjálfstæðisflokksins

Framfara- og rétt­læt­is­flokkur Tyrk­lands er við völd í land­inu, en um er að ræða sam­starfs­flokk Sjálf­stæð­is­flokks­ins í Evr­ópu­sam­tökum íhalds­manna og umbóta­sinna (AECR). Eins og Stundin greindi frá í júní er Guð­laugur Þór Þórð­ar­son, þing­maður Sjálf­stæð­is­flokks­ins, vara­for­maður AECR, og með honum í stjórn situr meðal ann­ars full­trúi frá tyrk­neska stjórn­ar­flokknum.

Flokk­ur­inn, og ekki síður Recep Tayyip Erdogan, for­seti og fyrrum for­sæt­is­ráð­herra Tyrk­lands, hafa sætt harðri gagn­rýni vegna for­ræð­is­hyggju, þjösna­legra aðgerða gegn blaða­mönnum og mót­mæl­endum og lokun á sam­fé­lags­miðl­unum Twitter og Youtube. Ofan á allt þetta bæt­ist harkan gagn­vart Kúrdum. 

Kúrdar í fremstu víglínu

„Hermenn Kúrda eru smám saman að ná yfir­lýstum mark­miðum Obama-stjórn­ar­innar, um að berja niður og ganga milli bols og höf­uðs á ISIS, jafn vel og jafn­vel betur en nokkur annar her,“ skrifar blaða­mað­ur­inn Lee Fang á miðl­inum The Intercept.

Þá bendir hann á, líkt og rit­höf­und­ur­inn David Graeber hefur áður gert, að Kúrdum í norð­ur­hluta Sýrlands hefur tek­ist að koma á fót sam­fé­lags­gerð þar sem menn og konur, kristnir, jat­sítar og múslimar lifa saman í sátt og sam­lyndi á grund­velli þátt­töku- og sam­ræðu­lýð­ræðis. Nú sé hætt við því að þessi árangur verði að engu vegna yfir­gangs tyrk­neskra stjórn­valda.