Umræður um þriðja orkupakkann stóðu yfir í tólf klukkutíma á Alþingi í gær. Þingmenn Miðflokksins töluðu einir frá klukkan 22:32 þar til Steingrímur J. Sigfússon, forseti Alþingis, sleit umræðum klukkan 5:42 í morgun.

Klukkan 3:23 var rætt um fundarstjórn forseta og spurði Bergþór Ólason, þingmaður Miðflokksins, hvað til stæði að þingfundur héldi lengi áfram, þar sem þingmenn þyrftu sumir að mæta á nefndarfundi um morguninn. Sagðist hann þó ekki veigra sér við að halda umræðunum áfram.

„Nú hefur komið í ljós að háttvirtir þingmenn hafa mikla þörf fyrir að tjá sig,“ sagði Steingrímur J. Sigfússon, forseti Alþingis. „Annríki fer vaxandi á þinginu og ekki mjög margir þingdagar eftir. Og þá er að sjálfsögðu eðlilegt að bregðast við þessari þörf þingmanna með því að lengja þingfund. Og ég geri ráð fyrir að háttvirtir þingmenn Miðflokksins sem hafa mikla þörf fyrir að ræða þetta mál, og ræða saman um það og fara í andsvör við sig sjálfa, þeir fagni því að það sé búið til rými fyrir þá til að flytja sínar ræður. Og þar með er þetta allt í góðu lagi og okkur ekki að vanbúnaði að nýta bjarta vornóttina til þess að eiga þessar uppbyggilegu samræður.“

Þingfundur hefst aftur kl. 13:30 í dag og er þriðji orkupakkinn aftur til umræðu, auk 18 annarra mála. Fimm þingmenn Miðflokksins eru þegar á mælendaskrá.