Jón Baldvin segir málaferli í uppsiglingu

Lögmaður Jóns Baldvins Hanni­bals­sonar segir eina form­lega erindið sem hann hafi sent fyrir hönd skjól­stæð­ings síns til þessa hafa verið beint að RÚV. Í grein í Morg­un­blað­inu í dag seg­ist Jón Baldvin hafa kært „slúð­ur­bera í fjöl­miðlum fyrir til­hæfu­lausar sak­ar­giftir, rang­hermi og gróf meið­yrði“. Þá segir hann einnig að mála­ferli séu vænt­an­leg.

„Ég er búinn að skrifa eitt bréf til RÚV sem varðar það hver beri ábyrgð á til­teknum ummælum sem við­höfð voru í Morg­un­út­varpi Rásar 2,“ segir Vil­hjálmur Vil­hjálms­son, lög­maður Jóns Baldvins. Það er eina bréfið sem ég hef sent frá mér og það var til útvarps­stjóra.“

Snýr málið að við­tali Sigmars Guð­munds­sonar og Helga Seljan í Morg­un­út­varp­inu við Aldísi Schram, dóttur Jóns Baldvins. Magnús Geir Þórð­ar­son útvarps­stjóri sagði í grein í Morg­un­blað­inu 14. febr­úar að umfjöllun RÚV um málið hafi verið vönduð og haft ótví­rætt frétta­gildi. Ekkert bendi til ann­ars en að vinnu­reglur og siða­reglur RÚV hafi verið virtar.

Jón Baldvin og eig­in­kona hans, Bryndís Schram, höfðu sett Magnúsi afar­kosti í blaða­grein tveimur dögum áður. Sögðust þau mundu stefna útvarps­stjóra ef hann bæð­ist ekki afsök­unar á frétta­flutn­ingnum innan viku og drægi til baka frétta­flutn­ing. Þá vildu þau að frétta­menn­irnir tveir úr Morg­un­út­varpi Rásar 2 yrðu áminntir.

Sjö konur hafa stigið fram undir nafni og sakað Jón Baldvin um kyn­ferð­is­legra áreitni. Alls hafa 23 konur birt sögur sínar á vef­síðu og halda frá­sagnir áfram að ber­ast í sér­stökum MeToo hópi kvenn­anna á Facebook. Jón Baldvin hefur ítrekað sagt að sög­urnar eigi allar rætur að rekja til veik­inda Aldísar, dóttur sinnar, sem kom til við­tals í Morg­un­út­varpið.