Ólafur Þ. Harð­ar­son, pró­fessor við stjórn­mála­fræði­deild Háskóla Íslands, telur að öfund­sjúkt fólk hafi vegið að Braga Guð­brands­syni, nýkjörnum full­trúa Íslands í Barna­rétt­ar­nefnd Sam­ein­uðu þjóð­anna, und­an­farna mán­uði.

Gagnrýni á vinnu­brögð Braga megi rekja til þess að Bragi þori að „taka hags­muni barna fram yfir eig­in­hags­muni ýmissa með­ferð­ar­að­ila og frama­potara í barna­vernd­ar­geir­anum“. Þetta skrifar Ólafur á Facebook þar sem hann óskar Braga til ham­ingju með afburða­kosn­ingu á vett­vangi Sam­ein­uðu þjóð­anna. 

Athygli vekur að einn þeirra sem læka færsl­una er Ásmundur Einar Daðason félags­mála­ráð­herra en kvart­anir barna­vernd­ar­nefnda undan vinnu­brögðum Braga eru nú í rann­sókn­ar­far­vegi innan ráðu­neytis sem lýtur yfir­stjórn Ásmundar. 

Nær­tæk­ast er að túlka orð Ólafs, sem Ásmundur Einar tekur undir, sem harða ádeilu á þá aðila innan barna­vernd­ar­kerf­is­ins sem leit­uðu til ráðu­neytis Ásmundar vegna ítrek­aðra óform­legra afskipta Braga Guð­brands­sonar af ein­stökum barna­vernd­ar­málum. Í færsl­unni sem ráð­herra lækar eru jafn­framt ónafn­greindum aðilum gerðar upp hvatir, þ.e. öfund­sýki og eig­in­hags­muna­semi. 

Nýleg úttekt hér­aðs­dóm­ara og dós­ents sýndi að vel­ferð­ar­ráðu­neytið van­rækti rann­sókn­ar­skyldu sína og mistókst að leiða fram stað­reyndir þegar barna­vernd­ar­nefndir á höf­uð­borg­ar­svæð­inu kvört­uðu undan vinnu­brögðum Braga Guð­brands­sonar.

Í úttekt­inni er ekki lagt heild­ar­mat á stjórn­sýslu Barna­vernd­ar­stofu og Braga Guð­brands­sonar í ein­stökum barna­vernd­ar­málum, en úttektin stað­festir að sú frá­sögn af afskiptum Braga af svoköll­uðu Hafn­ar­fjarð­ar­máli sem birt­ist í Stund­inni þann 27. apríl síð­ast­lið­inn byggði á einu skráðu sam­tíma­gögn­unum sem til eru um afskiptin.

Eins og Stundin greindi frá beitti Bragi sér fyrir því að faðir fengi að umgang­ast dætur sínar þrátt fyrir grun­semdir barna­vernd­ar­nefndar og með­ferð­ar­að­ila um að fað­ir­inn hefði mis­notað þær kyn­ferð­is­lega. „Ég vissi ekk­ert hvort pabb­inn í þessu til­viki hefði gert eitt­hvað á hlut þessa barns eða ekki. Ég var ekki dóm­bær á það og hafði ekki aðgang að neinum gögnum og hafði í raun og veru engan áhuga á að vita það,“ sagði Bragi í við­tali við Stundina um umrætt mál. 

„Þessi kosn­ing er mikið afrek og sýnir að útlend­ingar kunna að meta frá­bær störf Braga fyrir börnin í ver­öld­inni um ára­tuga­skeið,“ skrifar Ólafur Þ. Harð­ar­son stjórn­mála­fræði­pró­fessor á Facebook. „Enda eru útlend­ing­arnir ekki partur af íslensku kunn­ingja­sam­fé­lagi, þar sem öfund­sjúkir hæl­bítar hafa gjammað að Braga síð­ustu mán­uði fyrir það eitt að hann þorir að taka hags­muni barna fram yfir eig­in­hags­muni ýmissa með­ferð­ar­að­ila og frama­potara í barna­vernd­ar­geir­anum. Stundum nær rétt­lætið fram að ganga ... :) Til ham­ingju, Bragi Guð­brands­son!“ 

Auk Ásmundar Einars eru Heiða Björg Pálma­dóttir, núver­andi for­stjóri Barna­vernd­ar­stofu og Bragi Guð­brands­son sjálfur í hópi þeirra sem læka færsl­una. Þannig virð­ist sú skoðun ríkj­andi hjá þeim aðilum sem fara með æðstu stjórn og eft­ir­lit barna­vernd­ar­mála á Íslandi að ann­ar­legar hvatir með­ferð­ar­að­ila og barna­vernd­ar­starfs­manna hafi legið að baki athuga­semdum sem gerðar hafa verið við störf Braga.