Framboð Braga Guðbrandssonar til Barnaréttarnefndar Sameinuðu þjóðanna nýtur stuðnings Danmerkur, Noregs, Svíþjóðar og Finnlands þrátt fyrir að velferðarráðuneytið á Íslandi hafi snuprað hann fyrir óeðlileg afskipti af barnaverndarmáli. 

Eins og Stundin hefur fjallað ítarlega um beitti Bragi sér fyrir því að faðir fengi að umgangast dætur sínar þrátt fyrir grunsemdir barnaverndarnefndar og meðferðaraðila um að hann hefði misnotað þær kynferðislega. Síðar komst velferðarráðuneytið að þeirri niðurstöðu að Bragi hefði farið út fyrir valdsvið sitt með þessum afskiptum og sendi honum tilmæli vegna málsins. Alþingi og hinum Norðurlöndunum var ekki greint frá þessu fyrr en löngu eftir að ríkisstjórn Íslands ákvað að bjóða Braga fram til Barnaréttarnefndar Sameinuðu þjóðanna. 

Eftir að Stundin fjallaði um afskipti Braga Guðbrandssonar af Hafnarfjarðarmálinu þann 27. apríl síðastliðinn setti Katrín Jakobsdóttir forsætisráðherra af stað óháða úttekt á málinu og fól  Kjartani Bjarna Björgvinssyni héraðsdómara og Kristínu Benediktsdóttur dósent við lagadeild HÍ að rannsaka fyrirliggjandi gögn og málsmeðferð viðkomandi stjórnvalda. Gert er ráð fyrir að niðurstaða úttektarinnar liggi fyrir í byrjun júní. 

Áætlaður útlagður kostnaður íslenskra stjórnvalda við framboð og kosningabaráttu Braga er í kringum fjórar milljónir króna að sögn Sveins H. Guðmarssonar, upplýsingafulltrúa utanríkisráðuneytisins.

„Er þar einkum um ferðakostnað að ræða, auk útgáfu kynningarefnis. Þessi kostnaður fellur að mestu leyti á velferðarráðuneytið en framlag utanríkisráðuneytisins felst í aðstoð eins af starfsmönnum íslensku fastanefndarinnar í New York við þetta verkefni,“ segir í svari Sveins við fyrirspurn Stundarinnar. 

„Höfum átt í samskiptum við íslensk stjórnvöld“

Stundin sendi dönskum, finnskum, norskum og sænskum stjórnvöldum fyrirspurnir um framboð Braga í síðustu viku og fékk svör fyrir helgi. 

„Við getum staðfest að herra Bragi Guðbrandsson er Norðurlandaframbjóðandi og nýtur þar af leiðandi stuðnings Danmerkur. Við höfum átt í samskiptum við íslensk stjórnvöld og okkur er kunnugt um að þau hafi tekið málið til skoðunar. Við treystum íslenskum stjórnvöldum til ákvarðana um viðeigandi ráðstafanir ef þess gerist þörf í þessu máli,“ segir í svari frá utanríkisráðuneyti Danmerkur til Stundarinnar. 

Svör Svía eru í svipuðum dúr. „Framboð Íslands til Barnaréttarnefndar SÞ nýtur stuðnings Norðurlandanna, meðal annars Svíþjóðar. Nýlega var okkur greint frá því að sett hefði verið af stað óháð athugun á verklagi barnaverndaryfirvalda á Íslandi. Við fylgjumst með framgangi athugunarinnar í gegnum sendiráð okkar í Reykjavík og bíðum frekari upplýsinga,“ segir upplýsingafulltrúi hjá sænska utanríkisráðuneytinu í svari til Stundarinnar. 

„Norðurlöndin styðja almennt framboð hvers annars. Í þessu tilviki höfum við litið til bakgrunns og hæfni frambjóðandans með hefðbundnum hætti og á þeim grundvelli ákveðið að styðja frambjóðanda Íslands. Ef nýjar upplýsingar um frambjóðandann koma fram eftir formlegum leiðum, þá tökum við málið til endurskoðunar,“ segir í svari norska utanríkisráðuneytisins. 

„Við höldum áfram að styðja
frambjóðandann nema niðurstöður athugunarinnar gefi tilefni til annars“

Finnar taka í sama streng: „Finnland, rétt eins og hin Norðurlöndin, styður þennan frambjóðanda. Okkur er kunnugt um að nú stendur yfir óháð athugun á málsmeðferð innan barnaverndarkerfisins. Við höldum áfram að styðja frambjóðandann nema niðurstöður athugunarinnar gefi tilefni til annars.“