Fullyrt er að þrýst sé á Drífu Snædal, framkvæmdastýru Starfsgreinasambandsins, um að gefa kost á sér í stól forseta Alþýðusambands Íslands á sambandsþingi í haust. Síðast í gær velti Jóhanna Sigurðardóttir, fyrrverandi forsætisráðherra, því upp á Facebook hvort Drífa yrði ekki næst til að setjast í þann stól. Uppskar færsla Jóhönnu ánægju meðal lesenda. Drífa vill hvorki segja af né á í samtali við Stundina.
Tilefni þess að Jóhanna veltir upp þessari hugmynd er sú að Drífa tjáði sig í gær um fjármálaáætlun ríkisstjórnarinnar og er ekki par hrifin. Drífa birti kafla úr áætluninni þar sem sagði að ríkisstjórnin leggði áherslu á að gott samstarf tækist milli stjórnvalda og aðila vinnumarkaðarins „til að varðveita efnahagslegan stöðugleika og efla velferð. Þannig megi stuðla að farsælli niðurstöðu í kjarasamningum næstu ára sem varðveiti óvenju mikla kaupmáttaraukningu síðustu ára með hóflegum launahækkunum og skili heimilunum áfram auknum kaupmætti.“ Í framhaldinu spurði Drífa: „Ha? Hóflegum launahækkunum? Án þess að nýta skattkerfið til tekjujöfnunar heldur þvert á móti ýkja misskiptinguna? Stöðugleika hvers er verið að vernda? Velferð hvers? Hvaða góða samstarf á að byggja á þessum grunni?“
Kemur að því að taka þarf ákvörðun
Drífa var í samtali við Stundina ekki tilbúin til að játa því að hún hyggði á framboð í forsetastólinn. Hún neitaði því hins vegar ekki að það kæmi til greina. „Það er ekki tímabært núna að segja af eða á um það en sá tímapunktur kemur að ég þarf að hugsa þetta, eða taka ákvörðun. Sá tímapunktur er samt ekki núna.“
„Það er ákveðinn samkvæmisleikur í gangi um hvað verður í haust“
Spurð hvort hún hafi fengið áskoranir um að gefa kost á sér vildi Drífa lítið gefa út um það. „Það er ákveðinn samkvæmisleikur í gangi um hvað verður í haust. Ég held ég segi ekki meira í bili, ég er ekki búin að taka ákvörðun.“
Þegar gengið var enn frekar á Drífu og blaðamaður sagði að af svörum hennar mætti þó greina að hún afsegði ekki framboð hló hún við. „Ég held að það segi enginn nei á þessum tímapunkti, það eru ýmis nöfn nefnd og þannig er nú bara það.“
Miklar deilur innan ASÍ
Mikill styrr hefur staðið innan verkalýðshreyfingarinnar upp á síðkastið og hefur Gylfi Arnbjörnsson, forseti ASÍ, legið undir háværri gagnrýni af hálfu forsvarsmanna sumra stærstu aðildarfélaga sambandsins. Þannig vilja fjórir forystumenn verkalýðsfélaga að forystu ASÍ verði skipt út á sambandsþinginu í haust og fer Ragnar Þór Ingólfsson, formaður VR, einna fremstur þar í flokki. Ragnar hefur verið afar gagnrýninn á Gylfa síðustu misseri, svo mjög að Gylfi sjálfur lýsti því sem persónulegri heift og nornaveiðum í viðtali við Stundina. Í téðu viðtali var Gylfi hins vegar ekki tilbúinn að segja til um hvort hann hyggðist gefa kost á sér áfram sem forseti í haust.
Drífa hefur starfað sem framkvæmdastýra Starfsgreinasambandsins frá árinu 2012. Áður starfaði hún meðal annars sem framkvæmdastýra Vinstrihreyfingarinnar græns framboðs og Samtaka um kvennaathvarf auk þess sem hún var formaður Iðnnemasambands Íslands. Drífa er viðskiptafræðingur með meistaragráðu í vinnurétti frá Háskólanum í Lundi en einnig er hún menntaður tækniteiknari.
„Eins og að éta skít“
Það vakti mikla athygli þegar Drífa sagði sig úr Vinstri grænum í nóvember síðastliðnum. Ástæðan fyrir úrsögn Drífu var ákvörðunin um ríkisstjórnarsamstarf flokksins með Sjálfstæðisflokki og Framsóknarflokki. Drífa hafði átt samleið með flokknum allt frá stofnun hans og var um tíma varaþingmaður hans. Hún sagði í bréfi til flokksmanna að henni væri óvært í flokknum eftir ákvörðunina um ríkisstjórnarsamstarfið. „Við og við vellur gröfturinn upp í formi frændhygli, innherjaviðskipta, skattaskjóla, auðvaldsdekurs, útlendingarandúðar eða skjaldborgar um ofbeldismenn. Þá verður VG í þeirri stöðu að verja samstarfsflokkinn og mörkin munu sífellt færast til í samstarfinu líkt og í ofbeldissambandi. Þetta verður eins og að éta skít í heilt kjörtímabil, ef stjórnin endist svo lengi,“ skrifaði Drífa.
Athugasemdir