Héraðssaksóknari hefur gefið út ákæru á hendur Kjartani Adolfssyni þar sem honum er gefið að sök að hafa beitt dætur sínar grófu kynferðisofbeldi um margra ára skeið. 

Stundin hefur fjallað ítarlega um brot mannsins, en málið var þingfest í Héraðsdómi Austurlands í gær. Í síðasta tölublaði birtist viðtal við Önnu Kjartansdóttur þar sem hún sagði frá misþyrmingunum sem hún mátti þola í æsku, bæði af hendi föður síns og ofbeldisfullrar stjúpu.

Kjartan var dæmdur í tíu mánaða fangelsi árið 1991 fyrir ítrekuð kynferðisbrot gegn elstu dóttur sinni, Guðrúnu Kjartansdóttur, sem árangurslaust reyndi að vernda yngri systur sínar fyrir Kjartani.

Guðrún sagði sögu sína í viðtali við Stundina þann 25. nóvember 2017, en jafnframt var greint frá því að systir Kjartans hefði tilkynnt hann til barnaverndaryfirvalda án árangurs. Nýlega var Kjartan svo færður í gæsluvarðhald, grunaður um að hafa brotið gegn þriðju dótturinni, Lindu Bíu Kjartansdóttur. 

Ákæra héraðssaksóknara gegn Kjartani lýtur að brotum hans gegn Önnu og Lindu. Brotunum er lýst með ítarlegum hætti í ákæru, en þau voru margvísleg og gróf, framin þegar Anna var á aldrinum 5 til 12 ára og áttu sér stað á heimili þeirra og á gististað. Fjölskyldan var þá búsett í Tælandi, en Kjartani er einnig gefið að sök að hafa strokið Önnu um rassinn þegar hún var orðin fimmtán ára gömul og þau voru við störf í frystihúsi á Íslandi. Þá er hann ákærður fyrir brot gegn Lindu þegar hún var á aldrinum 7 til 9 ára.

Fram kemur í ákærunni að Kjartan hafi nýtt sér yfirburði sína gagnvart dætrum sínum og  traust þeirra og trúnað til sín sem föður. Háttsemin varði við 1. mgr. 194. gr. og 1. mgr. 202. gr. almennra hegningarlaga og 1. mgr. 202. gr. Jafnframt er honum gefið að sök að hafa brotið gegn nálgunarbanni árið 2016 með því að hitta Önnu af ásettu ráði í verslunarmiðstöð.

„Eftir hvert einasta skipti sem pabbi var búinn að misnota mig sagði hann fyrirgefðu og lofaði að gera þetta aldrei aftur. Samt gerði hann þetta alltaf aftur. Ég sagði við hann að þetta væri allt í lagi, ég veit ekki af hverju, ég vissi ekki að það væri rangt að gera þetta,“ sagði Anna í viðtalinu sem birtist á dögunum. „Ég hélt að þetta væri eðlilegt og allar stelpur lentu í því. Hann var líka búinn að segja að ef ég myndi segja einhverjum frá þessu þá myndi hann lenda í vondum málum og ég var hrædd við það. Hvað yrði þá um mig? Ég var búin að missa mömmu, og án pabba – hvar væri ég þá?“

Kerfið brást sytrum hennar 

Eldri systir hennar hefur verið mjög gagnrýnin á að faðir hennar, sem var dæmdur barnaníðingur, fékk eftirlitslaust að halda heimili með börnum. „Ísland er fámennt samfélag og þar væri ekki erfitt að halda skrá yfir dæmda menn og veita þeim eftirlit. Pabbi var dæmdur maður og hafði misst forræðið yfir mér þegar hann stofnaði nýja fjölskyldu. Það hefði ekki átt að vera erfitt að fylgjast með honum. Svo má velta því upp hvort hann ætti yfirhöfuð að vera með forræði yfir börnum og deila heimili með þeim,“ sagði Guðrún í samtali við Stundina. 

Engar eftirlitsheimildir eru í lögum með dæmdum barnaníðingum. Barnaverndarstofa hefur í tvígang sent Alþingi tillögu að breytingu á lögum sem myndi heimila eftirlit með mönnum sem eru taldir hættulegir og líklegir til að brjóta af sér aftur, en pólitískur vilji hefur ekki verið fyrir því. 

Kjartan hefur setið í gæsluvarðhaldi frá því í október, þegar Linda kærði hann fyrir kynferðisbrot, en áður hafði Anna lagt fram kæru á hendur honum. Á heimilinu voru einnig tvö yngri systkini þeirra en börnin eru öll komin í fóstur. Guðrún sagði gott að vita af því að börnin væru komin í skjól. „Síðan vona ég að pabbi minn fái þann dóm sem hann verðskuldar. Fyrst hann vissi að hann gæti fengið sextán ára dóm fyrir þetta á hann að fá hann. Af því að hann valdi þetta sjálfur.“

Fram til þessa hefur Kjartan neitað sök. Lögreglustjóri hefur bent á að í frásögnum dætra hans sé hægt að greina ákveðið mynstur sem bendi til þess að hann sé hættulegur umhverfi sínu. Gæsluvarðhald yfir honum hefur ítrekað verið framlengt á þeim forsendum að það stríði gegn réttarvitund almennings að hann gangi laus á meðan málin eru til rannsóknar.