Bjarni Benediktsson, formaður Sjálfstæðisflokksins, tók þá ákvörðun að sniðganga fjölmiðlamanninn Sigurjón M. Egilsson vegna þess að sá síðarnefndi hafði „lækað“ færslu með gagnrýni á viðskipti ættingja hans, samkvæmt frásögn Sigurjóns.
Sigurjón hefur nú greint opinberlega frá samtali hans og Bjarna, sem átti sér stað í vitna viðurvist í húsnæði sjónvarpsstöðvarinnar Hringbrautar. Samtalið átti sér stað skömmu fyrir alþingiskosningar í október í fyrra, þegar Bjarni var á leið í förðun fyrir upptökur á keyptri umfjöllun um Sjálfstæðisflokkinn.
Sigurjón lýsti samtalinu í pistli á vefsíðunni Miðjunni.is, sem hann ritstýrir: „Bjarni Benediktsson, formaður Sjálfstæðisflokksins, tilkynnti í heyrandi hljóði að hann ætlaði aldrei að tala við mig framar. En hvers vegna? Jú, hann sagði mig hafa borið út óhróður um sig og fjölskyldu sína. Það er rangt, hjá þér, svaraði ég. Hann gaf sig ekki, hækkaði róminn og gaf sig ekki. Ég bar enn af mér sakir. Hann sá af sér, dró aðeins í land og sagði mig hafa lækað færslu á Facebook sem hann væri ekki sáttur við. Ég spurði hvort ákvörðun hans um að tala aldrei framar við mig breyttist við þetta. Nei. Hann lagði áherslu á neiið.“
Misjafnt aðgengi að upplýsingum
Færslan sem Sigurjón lækaði er birt hér fyrir neðan. Færslan var skrifuð af Gunnari Smára Egilssyni, þá ritstjóra Fréttatímans, sem er bróðir Sigurjóns. Í henni er rætt um umfjöllun Kastljóssins, sem leiddi í ljós að frænka Bjarna hefði fengið upplýsingar úr Seðlabankanum um að neyðarlög á bankana væri yfirvofandi. Þannig hafi ætttingjar Bjarna fengið tækifæri til að forða fjármunum frá efnahagshruninu. Áður hefur verið greint frá því að Benedikt Sveinsson, faðir Bjarna, náði að selja fyrir hálfan milljarð króna í peningamarkaðssjóði Glitnis dagana fyrir yfirtöku ríkisins á bankanum og senda úr landi. Bjarni sjálfur var á meðal örfárra stjórnmála- eða athafnamanna sem funduðu í höfuðstöðvum Stoða nóttina fyrir yfirtöku ríkisins á bankanum. Þá hefur einnig verið fjallað um að Bjarni sjálfur seldi hlutabréf sín í Glitni í febrúar 2008, á sama tíma og rætt var um gríðarlega erfiðleika íslenska bankakerfisins í innsta hring stjórnmála- og embættismanna.
Færsla Gunnars Smára var eftirfarandi: „Engey er víða. Áður en neyðarlögin voru sett hringdi Sturla Pálsson, hagfræðingur í Seðlabankanum, í konu sína, Helgu Jónsdóttir, eins og fram kom í Kastljósi, og upplýsti um yfirvofandi aðgerðir bankans. Helga er dóttir Guðrúnar Sveinsdóttur, systur þeirra Einars og Benedikts Sveinssonar, stórtækra fjárfesta. Benedikt er faðir Bjarna, sem nú er fjármálaráðherra. Hann og Helga eru systkinabörn. Áður en neyðarlögin voru sett fengu Engeyingar því viðvörun og svigrúm til að bjarga sínu. Algjörir snillingar.“
Sem fyrr segir var það ákvörðun Sigurjóns að gefa færslunni „læk“ sem olli því að núverandi forsætisráðherra ætlaði aldrei að ræða aftur við hann.
Þöggun gagnvart fjölmiðlum
Sigurjón segist ekki hafa áhyggjur af eigin stöðu, heldur fjölmiðla almennt, vegna tilhneigingar sem þessarar að jarðarsetja eða útiloka ákveðna fjölmiðlamenn vegna gagnrýni.
„Hversu margir blaðamenn, fréttamenn eða aðrir hafa þurft að þola ámóta og ég hef lýst hér? Ég er viss um að þeir eru margir.“
Í samtali við Stundina lýsir Sigurjón atburðarásinni með þeim hætti að hann hafi reynt að fá Bjarna í umræðuþátt á Hringbraut fyrir kosningar, þegar Bjarni kom inn á Hringbraut í öðrum erindagjörðum. „Þetta var þannig að ég var að reyna að ná sambandi við Bjarna til að fá hann í viðtal í þáttinn hjá mér fyrir kosningar. Ég náði engu sambandi við hann, og ekki við Svanhildi Hólm heldur. Á meðan ég er í þessu þá gengur hann inn í fyrirtækið,“ segir Sigurjón. „Þá var hann að fara í þátt sem Sjálfstæðisflokkurinn hafði keypt, kynningarþátt fyrir kosningarnar.“
Samkvæmt Sigurjóni hafnaði Bjarni því að koma í umræðuþátt Sigurjóns og svaraði því til að hann skyldi senda einhvern annan úr Sjálfstæðisflokknum sér í stað. Svo fór að Sigríður Andersen, sem síðar átti eftir að verða dómsmálaráðherra, mætti í þáttinn í stað formannsins. Sigríður var í þriðja sæti fyrir Sjálfstæðisflokkinn í Reykjavíkurkjördæmi suður.
Stundin hefur ekki náð tali af starfsmönnum Hringbrautar sem áttu að hafa orðið vitni að samtalinu. Stundin sendi Bjarna Benediktssyni skilaboð og bauð honum að tjá sig um samtalið og viðmið sín í viðskiptum við fjölmiðla eða fjölmiðlamenn.
Þess ber að geta að Bjarni neitaði, einn flokksformanna, að svara spurningum Stundarinnar fyrir sérstakt kosningablað fyrir alþingiskosningarnar í fyrra.
Seld viðtöl voru lögbrot
Svo fór því að Bjarni Benediktsson kom einungis í viðtal á Hringbraut í umfjöllun sem keypt var af Sjálfstæðisflokknum. Þáttarstjórnandi var ekki hinn óflokksbundni Sigurjón M. Egilsson, heldur Rósa Guðbjartsdóttir, oddviti Sjálfstæðisflokksins í Hafnarfirði.
Fjölmiðlanefnd komst hins vegar að þeirri niðurstöðu í júní að birting seldra umræðuþátta um stjórnmálaflokka væri lögbrot. Þannig hafi Hringbraut brotið lög um fjölmiðla og lýðræðislegar grundvallarreglur þegar birt var seld umfjöllun um Sjálfstæðisflokkinn og tvo aðra stjórnmálaflokka, Framsóknarflokkinn og Viðreisn.
„Þættirnir eiga það allir sameiginlegt að vera stýrt af frambjóðendum flokkanna eða flokksbundnum einstaklingum innan þess stjórnmálaafls sem um er fjallað hverju sinni og virðist vera sem ritstjórn þáttanna hafi að öllu leyti verið í höndum stjórnmálaflokkanna sjálfra,“ segir í umfjöllun Fjölmiðlanefndar.
„Að mati fjölmiðlanefndar er fagleg og vönduð umræða fjölmiðla fólgin í því að þeir leitist við að varpa ljósi á mismunandi hliðar mála. Á það ekki síst við í aðdraganda kosninga þegar fjallað er um stefnu og áherslumál þeirra stjórnmálaafla sem bjóða fram hverju sinni. Fjölmiðlar eru vettvangur umræðu og upplýsinga og hafa skoðanamyndandi áhrif. Því er mikilvægt að umfjöllun þeirra einkennist af hlutlægni og jafnræðis sé gætt milli sjónarmiða, flokka og frambjóðenda. Fjölmiðlanefnd getur ekki fallist á þau sjónarmið forsvarsmanna Hringbrautar að ekkert samhengi sé á milli bréfsins sem Hringbraut sendi a.m.k sjö stjórnmálaflokkum sem buðu fram í Alþingiskosningunum þann 29. október 2016 og kosningaþátta sem fjölmiðlaveitan miðlaði í aðdraganda kosninganna. Þá hafa engar skýringar borist fjölmiðlanefnd á því hvers vegna einungis var fjallað um þrjú af þeim tólf stjórnmálaöflum sem buðu fram í umræddum kosningum. Þó er upplýst að framboðin keyptu auglýsingar eða greiddu fyrir kosningaþættina sérstaklega,“ sagði í úrskurði nefndarinnar.
Athugasemdir