Hús­gagna­ris­inn Ikea til­kynnti í dag að hann myndi lækka verð á um 1.500 vörum í Evrópu um allt að 28 pró­sent frá og með 1. sept­em­ber til að laða að við­skipta­vini sem finna fyrir hækk­andi fram­færslu­kostn­aði.

Ikea hefur lækkað verð nokkrum sinnum á und­an­förnum árum, jafn­vel þótt það hafi haft nei­kvæð áhrif á tekjur og hagnað fyr­ir­tæk­is­ins í nýjasta árs­hluta­upp­gjöri þess.

„Þetta er lang­tíma­skuld­bind­ing um að lækka verð fyrir við­skipta­vini okkar,“ sagði Jakub Jankowski, fram­kvæmda­stjóri Inter Ikea Group, aðal­eign­ar­halds­fé­lags fjöl­þjóða­fyr­ir­tæk­is­ins, í við­tali við AFP.

„Birgjar munu ekki verða fyrir neinum kostn­að­ar­þrýst­ingi vegna þessa,“ full­yrti hann og benti á að „miklar líkur væru á því að ef við seljum meira muni birgjar fram­leiða meira.“

Verð­lækk­an­irnar munu kosta Inter Ikea Group, Ingka Group, sem nær yfir næstum öll sér­leyfi Ikea, og önnur evr­ópsk sér­leyfi smá­sölu­að­il­ans um 1,2 millj­arða evra (169 millj­arðar íslenskra króna), sagði hann.

Breyt­ingin mun eiga við um 900 vörur á hverjum mark­aði, sagði Ingka Group.

Til að bæta aðgengi að verði enn frekar utan Evrópu mun Ingka Group einnig fjár­festa fyrir 70 millj­ónir evra til að vega upp á móti verð­bólgu- og gjald­eyr­is­þrýst­ingi í Asíu og Norður-Ameríku.

Víðs vegar um Evrópu mun verð á vin­sælum og þekktum Ikea-vörum – þar á meðal sumum Billy-hillu­mód­elum, Kallax-geymslu­lausnum og eld­hús­bún­aði – lækka um 15 til 28 pró­sent.

Vöru­úr­valið og umfang lækk­ana mun vera örlítið breyti­legt milli mark­aða, sagði Juvencio Maeztu, for­stjóri Ingka Group, við AFP.

Eftir að hafa til­kynnt um sjald­gæfa verð­hækkun í kjöl­far Covid-far­ald­urs­ins hefur sænski flat­pakkn­ing­aris­inn fjár­fest fyrir tvo til þrjá millj­arða evra í að lækka verð sín um 10 pró­sent frá árinu 2023.

Samkvæmt svörum frá IKEA á Íslandi verður verð lækkað síðar í vik­unni. Hér á landi gildir lækk­unin um þús­und vörur. Aðstæður á mark­aði hverju sinni ráði því hversu mikil lækk­unin sé.