Móðurfélag útgáfu Morgunblaðsins, Þórsmörk ehf, tapaði 346 milljónum króna árið 2025, samkvæmt frétt blaðsins. Tapið hefur þegar verið greitt upp með framlagi eigenda sem samþykktu í sumarbyrjun að auka hlutafé um 600 milljónir króna.

Eigendur Lýsis hf, sem seldu félagið til útgerðarfélagsins Brims í sumar, virðast hafa lagt fram mest hlutafé.

Tapa enn milljón á dag

Félagið, Þórsmörk ehf, heldur úti Morgunblaðinu, mbl.is, útvarpsstöðinni K100, prentsmiðjunni Landsprent og á megnið í dreifingarfyrirtækinu Póstdreifingu. Morgunblaðinu er meðal annars dreift í svokallaðri aldreifingu á fimmtudögum, en það þýðir að stór hluti heimila landsins fær blaðið sent án þess að greiða fyrir það.

Ekki kemur fram í frétt Morgunblaðsins hvernig tapið dreifist milli félaganna. Tapið var 348 milljónir króna árið áður.

Í fréttinni kemur fram það sjónarmið Haraldar Johannessen, framkvæmdastjóra Þórsmerkur og ritstjóra Morgunblaðsins, að minni ríkisstyrkir hafi haft áhrif á afkomuna.

„Fjölmiðlamarkaðurinn er áfram mjög erfiður og það spilar inn í þetta að í fyrra var gerð breyting á lögum um styrki til einkarekinna fjölmiðla sem dró úr stuðningi við tvo stærstu einkareknu miðlana, þar með talinn Árvakur,“ sagði Haraldur í viðtali við Morgunblaðið.

Árvakur fékk 104 milljónir króna í ríkisstyrk í fyrra, en 124 milljónir króna árið áður. Hefði styrkirnir verið jafnháir væri tapið árið 2025 því 326 milljónir króna.

Ríkisstjórn Kristrúnar Frostadóttur hefur hins vegar breytt áherslum í ríkisstyrkjum til fjölmiðla, með frumvarpi sem samþykkt var undir lok síðasta þings. Með því hafa verið búnir til sérstakir „viðbótarstyrkir“ til stærstu fjömiðlaritstjórnanna, sem renna aðeins til fréttastofu Sýnar og Morgunblaðsins.

Gunnlaugur Sævar GunnlaugssonFyrrverandi formaður útvarpsráðs er einn þeirra sem leggur til nýtt hlutafé í útgáfufélag Morgunblaðsins.

Mynd: mbl/Árni Sæberg

Guðbjörg MatthíasdóttirÚtgerðarkonan úr Vestmannaeyjum á um 40% í útgáfu Morgunblaðsins ásamt sonum sínum eftir hlutafjárframlög síðustu ára.

Mynd: Bára Huld Beck

Hlutafjáraukning greiðir upp tapið

Í vor samþykktu stjórnir Árvakurs og Þórsmerkur að auka hlutafé um 600 milljónir króna. Árvakur hefur tapað samfellt frá efnahagshruninu 2008, ef frá er talið árið 2013. Árvakur hafði þegar fengið hluta fjárframlaganna frá eigendum félagsins. Í lok síðasta árs skuldaði útgáfan eigendum sínum 384 milljónir króna.

Frá því í fyrra hefur hlutur eigenda Morgunblaðsins rýrnað um meira en helming við hlutafjáraukningu. Þannig átti Eyþór Arnalds, fyrrverandi oddviti Sjálfstæðisflokksins í Reykjavík, 10,2% hlut í fyrra, sem hann fékk án greiðslu frá eigendum Samherja, en á nú 4,77%.

Þeir sem styrkja mest stöðu sína í eigendahópnum, sem gera má ráð fyrir að hafi lagt fram aukið hlutafé, eru fyrrverandi eigendur Lýsis hf, sem sömdu í vor um að selja Lýsi fyrir 20 milljarða króna til útgerðarfélagsins Brims.

Félag Katrínar Pétursdóttur, dóttur hennar, og Gunnlaugs Sævars Gunnlaugssonar, Í fjárfestingar ehf, er nú stærsti einstaki eigandi Þórsmerkur með 21,7% hlut, sem var aðeins 12,5% í fyrra. Hlutur þeirra í félaginu hefur því aukist um rúmlega 9%.

Hins vegar á Guðbjörg Matthíasdóttir og aðilar tengdir henni um það bil 40% hlut í Morgunblaðinu og hefur hann aukist við hlutafjáraukninguna um tæp 5%. Í gegnum félagið Hlyn A ehf. eiga Guðbjörg og synir hennar fjórir 20% hlut og í gegnum annað félag, ÍV fjárfestingafélag ehf, eiga þau önnur 20%. Þá á Kaupfélag Skagfirðinga áfram tæplega 20% hlut og hefur því lagt fram aukið hlutafé til að halda sinni hlutdeild í eignarhaldi Morgunblaðsins.

Þar með má gera ráð fyrir því að megnið af 600 milljóna króna hlutafjáraukningu ársins í útgáfufélagi Morgunblaðsins hafi komið frá þremur hópum: Guðbjörgu Matthíasdóttur og fjölskyldu, Kaupfélagi Skagfirðinga og seljendum Lýsis, Gunnlaugi Sævari Gunnlaugssyni og Katrínu Pétursdóttur.