Á fjölmennri minningarathöfn um kristna íhaldsmanninn Charlie Kirk, sem myrtur var við rökræður með stúdentum í Utah í síðustu viku, kynnti eiginkona hans áform um mikla útþenslu samtaka hans, Turning Point USA, sem hún stýrir nú eftir fráfall eiginmannsins. 

Í tölu sinni í Glendale, Arizona, sagði ekkja Kirks, Erika, að hún fyrirgæfi morðingja hans, Tyler Robinson. Það gerði hún eftir að hafa lýst því að Charlie Kirk hefði reynt að ná til „týndra drengja vestursins“ sem væru „helteknir af beiskju, reiði og hatri“. „Svarið við hatri er ekki hatur. Ást og alltaf ást. Ást gagnvart óvinum okkar og þeim sem ofsækja okkur.“

Hún sagði að morðinginn væri einn þessara drengja sem Kirk hefði viljað bjarga. „Ég fyrirgef honum,“ sagði hún og grét.

Sjálfur hafði morðingi Kirks, sem var 22 ára gamall mormóni úr fjölskyldu sem kýs Repúblikana, að hann hefði fengið „nóg af hatri“ Charlies Kirk, sem talaði reglulega gegn transfólki, fóstureyðingum og fleiri réttindamálum minnihlutahópa og kvenna.

Eiginkonan er hjálpari 

Erika beindi orðum sínum að eiginmönnum um allan heim. Hún sagði að hlutverk eiginmannsins væri að leiða og að hann þyrfti að vera þess verður. „Leiddu eiginkonu þína,“ sagði hún. „Vertu andlegur leiðtogi þeirra.“

Eiginkonan ættu á móti að vera verndarar og hvetjarar. „Hún er hjálpari þinn. Þið eruð eitt hold sem vinnur saman fyrir dýrðleika Guðs.“

Undir lok tölu sinnar boðaði hún útþenslu samtakanna, sem þau hjónin stofnuðu saman, og bar hún fram ráðleggingar. „Mikilvægast af öllu: Veldu Krist.“

Donald TrumpSagðist í ræðu sinni hafa unnið stærsta kosningasigur í sögu Bandaríkjanna með hjálp Charlies Kirk, en í raunveruleikanum var sigurinn naumur.

Mynd: AFP

Donald Trump Bandaríkjaforseti hélt sömuleiðis ræðu. Hann lýsti mannkostum Charlies Kirk, en kvaðst ekki taka undir boðskap um kærleika. „Ég hata andstæðing minn,“ sagði hann og uppskar hlátur. Hann lýsti mótmælendum við viðburði Charlies Kirk sem undirróðursfólki á launum.

Trump hefur skilgreint laustengda andfasíska hópinn Antifa sem hryðjuverkasamtök og boðað hefndir gegn vinstri mönnum.

„Vonandi finnum við út gegnum dómsmálaráðuneytið hvaða fólk þetta er.“ Þá sagði hann „Antifa-hryðjuverkamenn“ hafa brotið rúður. „Ofbeldið kemur að miklu leyti frá vinstra fólki,“ bætti hann við.

Trump hélt fram ýmsum staðhæfingum um pólitíska andstæðinga sína og stöðu mála í Bandaríkjunum, meðal annars endurtók hann ásakanir um kosningasvindl í forsetakosningunum.

„Þeir svindluðu eins og hundar, en við náðum þeim.“

Hann sagði Kirk orðinn eilífan.