Ríkið mun halda áfram að vinna að undirbúningi á sölu á hlut sínum í Íslandsbanka, um 42,5% hlutabréfa bankans, í almennu og opnu útboði. Þetta kemur fram í tilkynningu frá fjármála- og efnahagsráðuneytinu.
Í kjölfar þess að ríkið tilkynnti á föstudag um fyrirhugað opið almennt útboð á hlut ríkisins í Íslandsbanka, birti Arion banki erindi til Íslandsbanka um áhuga sinn á viðræðum um sameiningu bankanna. Í erindinu kom meðal annars fram að hluthöfum Íslandsbanka, þar með talið ríkinu, stæðu til boða hlutabréf í sameinuðum banka samkvæmt tiltekinni aðferðafræði.
Tveir bankar á samkeppnismarkaði
Frumvarp um söluferlið var birt í samráðsgátt fyrir helgi og að loknu samráði verður tekið fyrir á Alþingi. Í frumvarpinu er lögð áhersla á framkvæmdina á útboðsferlinu, það er á hlutlægni, hagkvæmni, jafnræði og gagnsæi, ásamt forgangi almennings.
Frestur stjórnar Íslandsbanka til að svara Arion banka er 14 dagar.
„Nauðsynlegt að málið verðið metið með vönduðum hætti af hálfu ríkisins“
„Í ljósi þess að um er að ræða stórt mál, sem varðar tvo skráða banka á samkeppnismarkaði með fjölbreyttan hluthafahóp, er eðlilegt og nauðsynlegt að málið verðið metið með vönduðum hætti af hálfu ríkisins, stærsta hluthafans, áður en nokkur afstaða er tekin til erindis Arion banka,“ segir á vef fjármála- og efnahagsráðuneytisins.
Telur samrunann útilokaðan
Gylfi Magnússon, prófessor við viðskiptafræðideild Háskóla Íslands og fyrrum efnahags- og viðskiptaráðherra, sagði í Morgunútvarpinu á Rás 2 í morgun að nær útilokað að af samrunanum verði enda stóru bankarnir þrír með yfir 90 prósenta markaðshlutdeild. „Og að leyfa samruna þeirra er eiginlega bara útilokað. Það yrði hvergi leyft í Evrópu nema beinlínis að annar bankinn væri á fallandi fæti.“
Gylfi sagði að vissulega myndi samruni bankanna fela í sér hagræðingu, enda sé íslensk bankakerfi dýrt, með krónu sem gjaldmiðil. Hins vegar sé ekki gefið að hagræðing myndi skila sér til neytenda. Þá sagði Gylfi að með sömu rökum og Arion færi fyrir þessu megi allt eins sameina alla viðskiptabankana þrjá.
Til að bregðast við ábendingum
Í greinargerð með frumvarpinu um sölu hlutar ríkisins í Íslandsbanka segir að vinna við undirbúninginn hafi staðið yfir undanfarna mánuði. Þar kemur fram að í undirbúningsvinnunni hafi komið fram sjónarmið þess efnis að fyrirkomulag gildandi laga um framkvæmd markaðssetts útboðs geti dregið talsvert úr áhuga erlendra fagfjárfesta á þátttöku. Þá þarfnist sum ákvæði ítarlegri útfærslu eða nánari skýringa til þess að auka líkur á því að útboðið gangi vel.
Tilefni frumvarpsins og nauðsyn þess tengist fram komnum ábendingum um að núgildandi lög skapi áhættu á því að ríkinu takist ekki að ráðstafa eignarhlut sínum í Íslandsbanka sökum þess að hlutlægni hafi verið forgangsraðað um of á kostnað hagkvæmni. Söluaðilar telja óbreytt fyrirkomulag líklegt til þess að bitna á þátttöku erlendra fagfjárfesta og skriðþunga eftirspurnar frá upphafi útboðs, en hvort tveggja er til þess fallið að stuðla að árangursríku og hagkvæmu útboði.
Athugasemdir