Alþjóðadómstóllinn í Haag hefur úrskurðað að vera Ísraels í Palestínu sé ólögleg og að henni eigi að ljúka „eins fljótt og auðið er“.
Þetta kemur fram í úrskurðinum sem Nawaf Salam, forseti dómstólsins, las upp í dag. Úrskurðurinn er ráðgefandi og ekki bindandi og byggir á máli sem Allsherjarþing Sameinuðu þjóðanna setti fram árið 2022.
Salam sagði Ísrael brjóta Genfarsáttmálann með framferði sínu en þar segir að hernámslið skuli ekki flytja óbreytta borgara sína yfir á það svæði sem hernumið hefur verið.
„Byggðir Ísraels á Vesturbakkanum og í Austur-Jerúsalem, og stjórnin sem fylgir þeim, hafa verið settar upp og er viðhaldið í bága við alþjóðalög,“ las Salam upp úr niðurstöðu 15 manna dómstólsins, að því fram kemur á Al Jazeera.
Hann bætti því við að stefna Ísraels á svæðum Palestínu væri ígildi innlimunar svæðanna og að Ísrael mismunaði palestínsku fólki á svæðunum.
Beðið eftir þjóðarmorðs-málinu
Suður-Afríka rekur annað mál fyrir dómstólnum þar sem því er haldið fram að Ísrael fremji þjóðarmorð með hernaði sínum á Gaza. Bráðabirgðarniðurstaða hefur þegar verið birt í málinu og skipaði dómstóllinn Ísrael að koma í veg fyrir þjóðarmorð og tryggja það að hjálpargögn berist íbúum Gaza.
Þá skipaði dómstóllinn Ísrael að stöðva innreið sína í Rafah vegna hættu fyrir þau hundruð þúsunda Palestínumanna sem leita skjóls í borginni, sem er staðsett syðst á Gaza. Árásir Ísrael á Gaza hafa þó haldið áfram og sýndi rannsókn í fræðiritinu Lancet að yfir 186.000 dauðsföll hafi orðið vegna hernaðarins í Gaza síðustu misseri.
„Auðvitað eru þetta stríðsglæpir. Auðvitað eru þetta brot á alþjóðalögum.“
Árásunum hefur verið mótmælt á Íslandi undanfarin misseri. Fyrrverandi forsætisráðherra, Katrín Jakobsdóttir, sagði í mars að atburðirnir væru „hryllilegir“ og nýkjörinn forseti Íslands, Halla Tómasdóttir sagðist fyrir forsetakosningar vera hryggbrotin yfir því sem væri að gerast á Gaza.
„Þetta er að kremja í mér hjartað og ég held að okkur líði öllum alveg ótrúlega illa út af þessu,“ sagði Halla. „Auðvitað eru þetta stríðsglæpir. Auðvitað eru þetta brot á alþjóðalögum.“
Athugasemdir (1)
Árásir á Gaza
Þjóðarmorð Ísraela og Bandaríkjanna í Palestínu ekki verið stöðvað
Líkamsleifar fanga Ísraela bera merki um pyndingar og aftökur, segja læknar
Sorgmæddir íbúar Gaza snúa aftur
Fórnuðu lífi sínu fyrir sannleikann
„Ef við getum opnað fyrir mannúðaraðstoð getum við breytt stefnu sögunnar”
Ekki bætir þar úr að hamas sem ætti að vera málsvari palestínumanna er bara skósveinn Irans og hefur sem markmið að valda upplausn og skapa píslarvotta.
ESB hefur lagt bann á vörur sem eru framleiddar af ísraelskum fyrirtækjum á svæðum Palestínu en seldar undir "made in Israel". M.a. eru það Sodastream tæki sem eru svo vinsæl meðal íslendinga ...