Fyrrum leigjandi Magnúsar Ólafs Garðarssonar, sem gjarnan er kenndur við fyrirtækið United Silicon, hefur verið dæmdur til þess að greiða þrotabúi Magnúsar rúmar þrjár milljónir ásamt dráttarvöxtum fyrir vanefndir á húsaleigusamningi.
Í dómnum, sem kveðinn var upp í Héraðsdómi Reykjaness í gær, segir að leigutakanum hafi verið stefnt fyrir vanefndir í greiðslu húsaleigu í fjóra mánuði samfleytt og fyrir að hafa ekki greitt leigu á húsgögnum í 13 mánuði.
Mánaðarleg leiga var samtals 550.000 krónur á mánuði. Sú upphæð skiptist í tvennt, fyrir annars vegar leigu á húsnæðinu, sem nam 400.000 krónum og svo hins vegar leigu á húsgögnum. Nam leigan fyrir húsgögnin 150.000 krónur á mánuði.
Í niðurstöðu dómsins var konunni gert að greiða rúma 1,8 milljónir fyrir vangoldna leigu á húsnæðinu og 1.950.000 krónur fyrir leigu á húsgögnunum. Dómurinn féllst þó á að draga 850.000 krónur sem konan greiddi í tryggingu frá heildarupphæðinni.
Glæsihýsi í Kópavogi
Húsið sem um ræðir er einbýlishús við Huldubraut 28 í Kópavogi sem var áður í eigu Magnúsar Ólafs Garðarssonar. Húsið er um 360 fermetrar að stærð.
Þá voru fyrri eigendur hússins hjónin Ólafur Ólafsson, fyrrum forstjóri Samskipa, og Ingibjörg Kristjánsdóttir arkitekt. Ekki er þetta í fyrsta sinn sem Magnús Ólafur ratar í fréttirnar fyrir fyrirkomulag við útleigu á húsinu. Í frétt Viðskiptablaðsins frá 2017 var greint frá því að Magnús hafi leigt húsið út á Airbnb á tilskilinna leyfa.
Grunur um að engin húsgögn hafi verið leigð
Í kærunni hélt þrotabúið því fram að leigusamningurinn hefði verið gerður í slæmri trú. Þau hafi samið um leigu upp á 550.000 krónur á mánuði en ákveðið að skipta leigunni niður í tvo mismunandi leigusamninga. 400.000 krónur fyrir húsið en 150.000 krónur fyrir húsgögnin, sem hafi þó ekki verið leigð í raun.
Fyrri leigusamningnum, fyrir húsið, var þinglýst en hinum seinni, fyrir húsgögnin, ekki. Því hafi ekki uppgötvast hvernig í pottinn var búið. Dóttir leigjandans framleigði síðan neðri hæð hússins fyrir 150.000 krónur, sömu upphæð og leigan á meintu húsgögnunum, og sér leigusamningur gerður á milli mæðgnanna. Þær fengu svo báðar húsaleigubætur fyrir hvorn sinn leigusamninginn.
Eftir að þrotabúið tók við leigusamningnum þá leyndi leigjandinn óþinglýsta húsgagnaleigusamningnum fyrir því og hætti að greiða fyrir húsgögnin. Krafðist þrotabúið því 13 mánaða leigu. Stefnda reyndi þó að bera fyrir sig að samningnum hafi ekki verið þinglýst. Dómurinn tók þessi rök ekki gild.
Kaupsýslumaðurinn Magnús Ólafur Garðarsson
Magnús Ólafur Garðarsson er stofnandi, fyrrverandi forsvarsmaður og áður stærsti hluthafi hins umdeilda United Silicon sem rak kísilver í Helguvík. Hann hefur áður komist í kast fyrir lögin. Hann hefur til dæmis verið ásakaður um ítrekuð efnahagsbrot og misferli í starfi.
Árið 2009 var Magnús sagður hafa brotið á réttindum pólskra verkamanna í Danmörku. Var fyrirtæki hans sektað fyrir brot þessi sem sögð voru jaðra við mansal. Magnúsi var í kjölfarið gert að segja upp.
Árið 2017 kærði stjórn United Silicon Magnús, þá fyrrverandi forstjóra fyrirtækisins, fyrir refsiverða háttsemi. Var Magnús grunaður um stórfelld auðgunarbrot og skjalafals allt frá árinu 2014. Í september í fyrra hafði héraðssaksóknari ekki enn komist að niðurstöðu í málinu.
Árið 2021 var Magnús úrskurðaður gjaldþrota. Stærsti kröfuhafinn í þrotabúið er þrotabú Sameinaðs sílikons sem er rekstrarfélag kísilverksmiðjunnar í Helguvík. Kröfur fyrirtækisins í þrotabú Magnúsar námu 1,8 milljörðum í október 2021.
Hafði þrotabú Sameinaðs sílikons þá einnig höfðað tvö önnur mál gegn Magnúsi vegna meintra fjársvika, samtals upp á 4,5 milljónir evra. Tengdust málin bæði samskiptum Magnúsar við suður-afríksa félagið Tenova Minerals sem keypti bræðsluofn verksmiðjunnar.
Í september síðastliðnum greindi mbl.is frá því að Magnúsi hefði verið gefið að sök að hafa stofnað erlend gervitökufélög, gefið út falsaða og tilhæfulausa reikninga frá þeim til að dylja brot sín og látið bókhaldsgögn hverfa í sama tilgangi þegar hann stjórnaði United Silicon.
Athugasemdir (2)