Rauði krossinn á Íslandi hefur hafið neyðarsöfnun vegna eldgossins við Grindavík. Afrakstur hennar verður nýttur til að styðja Grindvíkinga fjárhagslega.
Í tilkynningu segir að neyðarsöfnuninni sé meðal annars ætlað að styðja íbúa bæjarins. „Það hryggir okkur að eldgosið valdi skemmdum á heimilum fólks og innviðum bæjarins. Hugur okkar er hjá Grindvíkingum og við munum standa með þeim í gegnum þetta erfiða tímabil og vera til staðar eins lengi og þörf krefur.“
Rauði krossinn segir að vitneskja sé til staðar um að fjölmargir aðilar, bæði innlendir og erlendir, hafi mikla samúð með þeim hamförum sem Grindvíkingar standa nú frammi fyrir og vilji leggja sitt af mörkum til að styðja bæjarbúa og hjálpa þeim að komast í gegnum þessar hremmingar. „Þessari söfnun er ætlað að koma til móts við öll þau sem vilja leggja sitt af mörkum og veita bæjarbúum stuðning.“
Hægt er að taka þátt í söfnuninni með eftirfarandi hætti:
Svona getur þú styrkt söfnunina:
Fara á vef Rauða krossins
Senda SMS-ið HJALP í símanúmerið 1900 (2.900 kr.) (Síminn og Nova)
Hringja í 904-2500 til að styrkja um 2.500 kr.
Greiða í gegnum Aur eða Kass: @raudikrossinn
Leggja inn á söfnunarreikning Rauða krossins: 0342-26-12, kt. 530269-2649
Athugasemdir (1)