Sveinn H. Guðmarsson, fjölmiðlafulltrúi utanríkisráðuneytisins, lætur brátt af því starfi og mun í lok sumars flytjast ásamt fjölskyldu sinni til Úganda og taka við verkefnastjórastöðu á sviði tvíhliða þróunarsamvinnu í sendiráði Íslands þar í landi.

„Þetta er bara hluti af þessum hefðbundnu flutningum innan utanríkisráðuneytisins. Ég er búinn að vera í mínu starfi í rúm fimm ár, fyrst sem fjölmiðlafulltrúi og svo einnig sem deildarstjóri upplýsingadeildar undanfarin tvö og hálft ár, og mér fannst kominn tími til að breyta til og leita nýrra áskorana,“ segir Sveinn í samtali við Heimildina um tilfærsluna í starfi.

Fjölskylda Sveins flyst með honum frá Seltjarnarnesi til Úganda. „Við erum öll að fara. Við erum hjón með tvö börn sem eru undir tíu ára aldri og fyrir þau verða þetta talsverð viðbrigði en vonandi líka mjög lærdómsríkt og spennandi og reynsla sem þau munu búa að alla ævi. Við munum búa í höfuðborginni Kampala og ég held að það muni fara mjög vel um okkur, ég kvíði því ekki,“ segir Sveinn, sem segir komandi breytingar verulegar, en mjög spennandi.

„Ég tek við verkefnastjórastöðu í sendiráðinu okkar í Úganda á sviði tvíhliða þróunarsamvinnu,“ segir Sveinn en Úganda er eitt af þremur  samstarfsríkjum Íslands í tvíhliða þróunarsamvinnu, hin tvö eru Malaví og Síerra Leóne. Ísland á í samstarfi við héraðsyfirvöld í þessum ríkjum og segir Sveinn mikið verk hafa verið unnið í tengslum við uppbyggingu innviða á borð við skóla, heilsugæslustöðva, fráveitu og vatnsveitu, svo eitthvað sé nefnt.

Sveinn segir að flutningar af þessu tagi innan utanríkisþjónustunnar séu oftast til nokkurra ára í senn og að reikna megi með að fjölskyldan verði í Kampala í um þrjú ár, það sé hefðbundin lengd. Hann segir að flutningurinn til Úganda hefði að sjálfsögðu aldrei komið til greina nema fjölskyldan stæði þétt að baki honum í þessu. 

„Við tókum samtalið í þessu ferli og þetta fylgir því að starfa í utanríkisþjónustunni, að flutningar á sendiskrifstofur erlendis geta komið til greina, þannig að þetta er möguleiki sem við höfðum búið okkur undir og gert ráð fyrir. Þó að það að fara til Afríku hafi ekki verið augljósasti kosturinn þá bara hlökkum við til,“ segir Sveinn.

Hann segist hafa komið einu sinni til Úganda og að sú ferð hafi í raun verið hans fyrstu kynni af utanríkisþjónustu Íslands. „Þá var ég fréttamaður á Stöð 2 og fór í ferð sem Valgerður Sverrisdóttir, þáverandi utanríkisráðherra, fór í til Úganda að kynna sér þróunarsamvinnuverkefni Íslands á þeim tíma. Það er athyglisvert að öllum þessum árum seinna skuli ég sjálfur vera á leiðinni þangað aftur, ekki sem fréttamaður heldur að fara að flytja þangað. Ég hafði ekki séð þann snúning fyrir mér þegar ég fór þarna árið 2007,“ segir Sveinn.

Hann hefur áður starfað erlendis, en árið 2010 starfaði Sveinn í tæpt ár sem upplýsingafulltrúi UNICEF í Jemen. „Það var náttúrlega áður en stríðið braust út í Jemen, sem vonandi sér fyrir endann á. En ástandið var slæmt í landinu þá líka. Það hefur verið mjög dapurlegt og auðvitað átakanlegt að fylgjast með því hörmulega stríði, þar sem voldug ríki í þessum heimshluta hafa barist sín á milli og notað Jemen sem vígvöll,“ segir Sveinn, sem hins vegar vonast til þess að það horfi til betri vegar í samskiptum Írans og Sádi-Arabíu eins og teikn eru á lofti um.