Lárus Welding, fyrr­ver­andi banka­stjóri Glitnis sem varð lands­frægur þegar hann var ráð­inn í það starf árið 2007, er orð­inn rekstr­ar­stjóri Fjár­fest­ing­ar­fé­lags­ins Stoða. Stoðir hétu áður FL Group og var félagið leið­andi hut­hafi í Glitni sem Lárus var for­stjóri hjá. Frá þessu var greint í fjöl­miðlum í dag. 

Þar með má segja að saga Lárusar, sem ekki hefur verið þrauta­laus frá banka­hrun­inu árið 2008, sé komin í vissan hring, þar sem hann var ráð­inn til Glitnis eftir yfir­töku FL Group á bank­anum um vorið 2007.

Örlagasaga um ákærur og baráttu

Fyrir síð­ustu jól gaf Lárus út upp­gjörs­bók um líf sitt og aðkomu að Glitni og þeim ákærum sem gefnar voru út á hendur honum á árunum eftir banka­hrunið. Á end­anum hlaut Lárus dóma í tveimur málum, Stím og stóra mark­aðs­mis­notk­un­ar­máli Glitnis.  Annar dóm­ur­inn var skil­orðs­bund­inn vegna þess hversu langan tíma málið tók í dóms­kerf­inu á meðan Lárus hafði þá þegar fyllt upp í refsirammann þegar dóm­ur­inn í hinu mál­inu féll. Hann þurfti því ekki að afplána fang­els­is­dóm en sat hins vegar í gæslu­varð­haldi á Litla Hrauni, eins og hann ræðir um í bók­inni.

Í bók­inni ræðir hann einnig um aðkomu sína að við­skipta­líf­inu, meðal ann­ars að Stoðum. Stoðir eru öfl­ugt fjár­fest­ing­ar­fé­lag í dag sem á hluti í fyr­ir­tækjum eins og Símanum, Arion, Kviku  og Bláa lón­inu. Félagið hefur meðal ann­ars verið umtalað sem stærsti einka­fjár­festir­inn í Símanum sem meðal ann­ars seldi Mílu til franska sjóðs­stýr­inga­fyr­ir­tæk­is­ins Ardian með miklum hagn­aði og til­heyr­andi arð­greiðslum til hlut­haf­anna. 

Lyk­il­mað­ur­inn JónJón Sig­urðs­son var lyk­il­maður í því að hópur íslenskra fjár­festa keypti Stoðir, áður FL Group, af kröfu­höfum félags­ins árið 2017.

Að hluta eru sömu hluthafar og stjórnendur og í FL Group

Lárus hefur reyndar verið hlut­hafi í Stoðum frá árinu 2020 en er nú einnig orð­inn starfs­maður félags­ins. Hjá Stoðum hittir hann fyrir nokkra af þeim aðilum sem einnig voru stjórn­endur og hlut­hafar í FL Group um vorið 2007. Þar ber helst að nefna for­stjór­ann Jón Sig­urðs­son sem einnig var for­stjóri FL Group fyrir hrunið 2008 en hafði tekið við af Hannesi Smára­syni síðla árs 2007 eftir að félagið hafði tapað miklum pen­ingum. Þá varð Jón einnig lands­þekktur, líkt og Lárus. 

Báðir voru þeir Lárus og Jón ungir að árum þegar þeir tóku við þessum ábyrgð­ar­störfum í FL Group og bank­anum sem félagið var leið­andi hlut­hafi í. Lárus var bara 31 árs.

Sá sem var leið­andi hlut­hafi og stjórn­ar­for­maður FL Group á þessum tíma var Jón Ásgeir Jóhann­es­son en hann er ekki meðal hlut­hafa félags­ins, líkt og nokkrir aðrir sem einnig voru það fyrir hrunið 2008. Þar má nefna fjár­fest­ana Magnús Ármann og Þorstein Jónsson.

Tölvu­póstar sem Jón Ásgeir sendi Lárusi á meðan hann var að banka­stjóri urðu frægir eftir hrunið en í þeim virt­ist hann vera að beita Lárusi óeðli­legum þrýst­ingi svo hann gerði það sem honum var sagt. Lárus gerði svo lítið úr þessum tölvu­póstum í bók sinni. 

Í bók sinni lýsir Lárus því að það hafi fyrst og fremst verið Jón Sig­urðs­son sem tal­aði hann inn á að verða banka­stjóri Glitnis. „FL Group hélt áfram að styrkja tök sín á Glitni banka og Jón Sig­urðs­son gerði aðra til­raun til þess að fá mig yfir. [...] Samn­inga­við­ræð­urnar um for­stjóra­stól­inn fóru aðal­lega fram við Jón Sig­urðs­son.“

Yfir­bragð Stoða i dag er hins vegar að félagið er að hluta til í eigu og er stýrt af sömu aðilum og fyrir hrunið. Jón Sig­urðs­son er ennþá for­stjóri og er nú leið­andi hlut­hafi ásamt Fenger-fjöl­skyld­unni. Þetta er fjöl­skylda eig­in­konu hans, Bjargar Fenger.

Sagan af yfirtöku Stoða

Í upp­gjörs­bók sinni ræðir Lárus tals­vert um vin­áttu sína við Jón Sig­urðs­son og rekur meðal ann­ars að tengsl þeirra nái allt aftur til árs­ins 2002 þegar þeir voru ein­ungis rétt um 25 ára gamlir banka­starfs­menn. Þeir unnu svo saman í Lands­banka Íslands áður en þeir fóru yfir til FL Group og Glitnis. 

Í bók­inni rekur Lárus meðal ann­ars hvernig Jón náði að eign­ast Stoðir með hópi fjár­festa eftir að fjár­fest­ing­ar­fé­lagið hafði verið yfir­tekið af kröfu­höfum þess á árunum eftir hrunið. Jón hafði unnið sem for­stjóri Stoða fyrir kröfu­hafa félags­ins, sem meðal ann­ars voru slitabú föllnu bank­anna, á þessum tíma. Hann sat meðal ann­ars í stjórn drykkja­vöru­fram­leið­and­ans Refresco eftir hrunið en hlut­ur­inn í félag­inu var eina eign Stoða. Þessi hluta­bréf í Refresco voru svo seld árið 2017 og hlut­hafar Stoða tóku til við aðrar fjár­fest­ingar. 

Um upp­kaupin á Stoðum segir í bók Lárusar:

 „Það var svo snemma árs 2017 að kröfu­hafar fóru að kanna sölu á eign­ar­hlut sínum í Stoðum. Um var að ræða meiri­hluta í félag­inu og var ríkur vilji til að ljúka söl­unni sem allra fyrst eða fyrir lok mars 2017. Þessi hlutur var mik­ils virði og þurfti í raun að safna hátt í fimm millj­örðum króna á mjög skömmum tíma til að ná að kaupa hann. Jón Sig­urðs­son var eðli­lega mjög kunn­ugur félag­inu og hóf að þróa með sér hug­mynd um að safna saman hópi fjár­festa, nokkrum fjöl­skyldum, með sér í verk­efnið. [...] Þetta small svo allt saman með elju og skipu­lagn­ingu Jóns og sum­arið 2017 stóðum við uppi með eitt stærsta fjár­fest­ing­ar­fé­lag Íslands að meiri­hluta í fjöl­skyldu­eigu. Þetta var vita­skuld mik­ill per­sónu­legur sigur fyrir Jón en með honum end­ur­heimti hann stjórn á félag­inu sem hann hafði misst í kjöl­far falls bank­anna haustið 2008. Það var ein­stak­lega ánægju­legt fyrir mig að fá að hjálpa Jóni og hópnum í kringum hann við að gera þetta að veru­leika.“

Hefur trú á framtíðinni og íslensku bankakerfi

Lárus hefur því verið þátt­tak­andi í end­ur­reisn og sókn Stoða hér á landi um nokk­urra ára skeið jafn­vel þó hann sé fyrst núna orð­inn starfs­maður félags­ins.  Í bók sinni ræðir Lárus meðal ann­ars um það hvað honum hafi þótt hart sótt að sér og öðrum banka­mönnum og hvað það hafi verið íþyngj­andi. Hann nefnir líka að hann sé ennþá á skil­orði vegna dóms sem féll í Stím-mál­inu svo­kall­aða sem sner­ist um mark­aðs­mis­notkun með hluta­bréf í Glitni og FL Group, nú Stoðum, árið 2007. Vegna þess­ara dóma seg­ist hann verða úti­lok­aður frá ýmsum ábyrgð­ar­stöðum út lífið. 

Þrátt fyrir þessi örlög, sem Lárus er ósáttur við og seg­ist ætla að berj­ast til að fá breytt fyrir Mann­rétt­inda­dóm­sól Evrópu, seg­ist hann í loka­orðum bók­ar­innar vera bjart­sýnn á fram­tíð Ísland og að end­ur­reisn banka­kerf­is­ins hafi gengið vel. „Við end­ur­reisn fjár­mála­kerf­is­ins á Íslandi und­an­far­inn ára­tug sést að lær­dóm­ur­inn af fjár­málakrepp­unni hefur verið nýttur vel. Ísland býr nú yfir fjár­mála­kerfi sem er með þeim traust­ustu í Evrópu eins og sást á því hversu vel því tókst að fara í gegnum hinn nýaf­staðna Covid 19-far­aldur. Það er því ekki annað hægt en að vera bjart­sýnn á fram­tíð Íslands. Með þessum orðum lýk ég upp­gjöri mínu á örlaga­för minni um banka­kerfið og síðan rétt­ar­kerfið.“