Halldór og hárið mun ekki sakna sviðsljóssins

„Sjö ár eru afskap­lega góður tími í starfi sem er ein­hvers konar brenni­punktur sam­fé­lags­ins,“ segir Halldór Benjamín Þor­bergs­son, sem hætti nýverið sem fram­kvæmda­stjóri Samtaka atvinnu­lífs­ins. Í sumar mun hann taka við starfi for­stjóra fast­eigna­fé­lags­ins Regins. 

Halldór fagn­aði þessum tíma­mótum í skíða­ferð með fjöl­skyld­unni á Akureyri þar sem mark­miðið var að kenna fjórða og yngsta barn­inu á skíði, en gaf sér örlít­inn tíma til að ræða við blaða­mann milli skíða­kennslu­stunda. „Þetta var stór­kost­legur tími, ég er ekki maður sem tekur oft djúpt í árinni, en þetta er tími sem ég mun aldrei gleyma,“ segir Halldór um þau sjö ár sem hann gegndi starfi fram­kvæmda­stjóra SA. Aðspurður hvers hann muni sakna nefnir hann sam­starfs­menn og við­semj­endur. „Af því að eng­inn dagur er öðrum líkur, gríð­ar­legt álag en á sama tíma skemmti­legt að kljást við hluti í raun­tíma fyrir allra augum, það reynir á mjög marga hæfi­leika.“

En þegar hann er spurður hvers hann muni ekki sakna er svarið svipað. „Að vera stans­laust í sviðs­ljós­inu, að geta ekki hreyft sig án þess að tekin sé af því ljós­mynd eða frétta­mynd og vera fasta­gestur á heim­ilum lands­manna, bæði í gegnum útvarp, prent­miðla, vef­miðla og sjón­varp. Ég er viss um að ég muni minnst sakna þess hluta.“ 

Mun leggja sig í framkróka um að rísa undir trausti og trúnaði

Hár­greiðsla Halldórs hefur ekki sloppið við sviðs­ljósið og fréttir líkt og „Hvernig fer Halldór að því að vera með svona frá­bært hár“ röt­uðu á lista yfir mest lesnu fréttir net­miðl­anna í miðjum kjara­við­ræðum. Halldór mun ekki sakna þess en sleppur þó ekki við spurn­ing­una, er kom­inn tími á klipp­ingu? „Konan mín stýrir því, það er lang­besta svarið.“

Hann mun ekki segja alveg skilið við sviðs­ljósið í nýja starf­inu sem for­stjóri í skráðu félagi í kaup­höll­inni en hann býst samt sem áður við auknu svig­rúmi. „Það verður öðru­vísi, það er ekki jafn mikið í sviðs­ljósi almenn­ings frá degi til dags. Auðvitað eru við­fangs­efnin allt önnur, af öðrum toga, og ég hlakka sann­ar­lega til að takast á við nýjar áskor­anir í líf­inu.“

Þetta er í fyrsta sinn sem Halldór mun stýra skráðu félagi. „Ég þarf að aðlag­ast því, ég er afar þakk­látur fyrir það tæki­færi og það traust og trúnað sem hlut­hafar og stjórn eru að sýna mér og ég mun auð­vitað leggja mig í fram­króka við að rísa undir því trausti og þeim trún­aði.“

Vandar sig mjög mikið og hefur alltaf gert 

Halldór er alvanur að svara fjöl­miðla­fólki og blaða­maður rifjar upp hennar fyrstu sam­skipti við fram­kvæmda­stjór­ann þegar kjara­við­ræður SA og Eflingar stóðu yfir vet­ur­inn 2019. Viðtalið var í gegnum síma og þegar blaða­maður bað hann vin­sam­leg­ast að end­ur­taka það sem hann var að lesa snöggreidd­ist hann og sagð­ist alls ekki vera að lesa upp af blaði, hann væri bara svona vel und­ir­bú­inn. Halldór hlær við þessa upp­rifjun. „Mér þykir bara mjög vænt um að heyra það, ég vanda mig mjög mikið og hef alltaf gert.“

Halldór mun sinna starfi fram­kvæmda­stjóra þar til gengið verður frá ráðn­ingu arf­taka hans. Hann seg­ist ekki hafa hug­mynd um hver það verður og að hann muni ekki koma að því ferli. 

En hefur hann skoðun á því? 

„Ég hef skoð­anir á öllu sem við kemur íslensku sam­fé­lagi en í þetta skiptið ætla ég að halda þeim fyrir sjálfan mig.“