Aðal­með­ferð í máli ákæru­valds­ins á hendur Jóni Baldvini Hanni­bals­syni hófst í Lands­rétti í morgun. Jón Baldvin er ákærður fyrir að hafa árið 2018 áreitt Carmen Jóhanns­dóttur kyn­ferð­is­lega. Konur sem borið hafa að Jón Baldvin hafi áreitt þær mættu í dóm­sal til að sýna Carmen stuðn­ing.

Jóni Baldvini er gefið að sök að hafa hinn 16. júní árið 2018 strokið rass Carmenar utan klæða þar sem hún var gest­kom­andi á heim­ili hans í  Salobreña á Spáni ásamt móður sinni og fleira fólki. Stundin greindi frá því í byrjun árs 2019 frá fram­burði Carmenar auk fleiri kvenna sem báru að Jón Baldvin hefði áreitt sig kyn­ferð­is­lega.

Gefin var út ákæra í mál­inu í sept­em­ber 2020. Jón Baldvin var sýkn­aður í hér­aðs­dómi í nóv­em­ber á síð­asta ári og sagði í dóms­orði að ósannað teld­ist að Jón Baldvin hefði áreitt Carmen.

Carmen var gest­kom­andi á heim­ili Jóns Baldvins og Bryn­dísar Schram, eig­in­konu hans, í júní 2018 ásamt móður sinni, Laufeyju Ósk Arn­órs­dóttur. Carmen lýsti því í við­tal­inu í Stund­inni að þegar hún hafi staðið upp við mat­ar­borð í hús­inu og skenkt í glös á borð­inu, „þá bara gerði kall­inn sér lítið fyrir og byrj­aði að strjúka á mér rass­inn. Og ekk­ert bara rétt aðeins, heldur upp og niður strjúka á mér rass­inn.“

Boðuð frá Spáni með tíu daga fyrirvara

Jón Baldvin bar fyrstur vitni fyrir dómi í morgun en Carmen síðar. „Ég hélt mér bara við mína frá­sögn frá því í hér­aðs­dómi,“ segir Carmen í sam­tali við Stundina.

Klára á aðal­með­ferð máls­ins í dag og má því búast við að dómur verði kveð­inn upp innan næstu fjög­urra vikna. Carmen gagn­rýnir hins vegar hvernig staðið var að boðun hennar fyrir dóm­inn. Ég fékk bara að vita það fyrir tíu dögum síðan að aðal­með­ferð yrði í dag og ég yrði að mæta fyrir dóm­inn. Ég er búin að ýta á eftir því í þrjá mán­uði að fá að upp­lýs­ingar um hvenær þetta yrði því ég bý auð­vitað í öðru landi og lifi þar mínu lífi. Ég þurfti að útskýra þetta fyrir vinnu­veit­endum mínum, ég tók það ekki fram í atvinnu­um­sókn­inni að ég stæði í dóms­máli gegn Jóni Baldvini þegar ég sótti um vinn­una. Þau tóku því mjög vel, þau styðja mig heils­hugar.“

„Þetta snýst ekki lengur bara um mig“

Spurð hvernig henni hafi liðið með að þurfa á ný að segja sögu sína fyrir dóm­stólum og sitja í dóm­sal með Jóni Baldvini segir Carmen: „Þetta er bara ömur­legt. En það sem heldur mér við efnið, heldur mér gang­andi, er að þetta snýst ekki lengur bara um mig. Eftir allt sem hefur komið fram snýst þetta um rétt­læti fyrir svo marga aðra. Ég við­ur­kenni að þetta er samt farið að taka á, þetta hefur tekið næstum því fimm ár af lífi mínu, hefur hangið yfir höfð­inu á mér og ég óska engum þess.“

Konur sem hafa borið að Jón Baldvin hafi einnig áreitt þær voru mættar í dóm­sal í morgun til að sýna Carmen stuðn­ing. Það voru þær Aldís Schram, dóttir Jóns Baldvins, Margrét Schram mág­kona hans, Elíasbet Þor­geirs­dóttir og Val­gerður Þor­steins­dóttir. Þær þrjár fyrst­nefndu hafa borið opin­ber­lega að Jón Baldvin hafi brotið gegn þeim. Val­gerður er dóttir Þóru Hreins­dóttur heit­innar en Stundin birti í októ­ber dag­bækur Þóru þar sem hún lýsti kyn­ferð­is­legum sam­skiptum við Jón Baldvin. Þóra var þá 15 ára nem­andi Jóns Baldvins í Haga­skóla en hann 31 árs kenn­ari hennar.

Carmen segir að það hafi verið mjög áhrifa­mikið að sjá kon­urnar sitja saman í dóms­sal í morgun. „Ég er þeim ótrú­lega þakk­lát fyrir það. Það var líka magnað að hitta þessar konur í fyrsta skipti. Jón Baldvin hefur ásakað okkur um að blása til ein­hvers sam­særis gegn sér en eins og ég segi, ég var að hitta þær núna í fyrsta skipti og við vorum að hlæja saman að þessum furðu­á­sök­unum.“