Hamingjan er mikilvægasta hráefnið

Skúli S. Ólafsson

prestur í Neskirkju

Ham­ingju­samt fólk er stundum sagt vera „hátt uppi“ sem rímar við orð Bibl­í­unnar um himna­ríki. Sjálfur segir Jesús himna­sæl­una bæði vera „innra með okkur“ og „mitt á meðal okkar“. Ég tengi við þau orð. Á mínum sæl­ustu stundum er ég ýmist í algleymi góðrar ein­semdar eða umvaf­inn fólki sem ég treysti, virði og elska. Himna­rík­inu er einnig líkt við veislu. Þar er hvorki hungur né ein­semd og kenndin lifir áfram í hjört­unum. Ham­ingju­leit­endur grípa gjarnan í tómt því ham­ingjan stendur ekki ein;  hún er afleið­ing. Við­leitni okkar til að gleðja aðra er þess vegna lík­legri til að veita okkur ham­ingju en þegar við elt­umst við hana í eigin þágu.

Mynd: Cat Gundry-Beck

Einar Mäntylä

framkvæmdastjóri Auðnu tæknitorgs

Ham­ingjan er ástand þar sem hug­ur­inn fer á flug og manni hlýnar öllum inn­vortis, dag­legt amstur hverfur og áhyggjur eru utan sjón­máls. Ham­ingjan er hverful, ann­ars væri hún hvers­dags­leg. Augna­bliks­ham­ingja er til dæmis full­kom­inn hljómur sem hreyfir við ein­hverju frum­stæðu í tauga­kerf­inu. Ég hef upp­lifað þetta bæði sem flytj­andi í kór og sem áheyr­andi. Ham­ingjan er þakk­læti og auð­mýkt. Þú hvorki heimtar ham­ingju né kaupir hana. Peningar hafa yfir­höfuð ekk­ert með ham­ingju að gera; of lítið eða of mikið af þeim stuðlar að  óham­ingju, hóf­lega mikið skapar heldur ekki ham­ingju. Hún er þarna í minnstu hlutum í kringum okkur og það er hægt að koma auga á hana. Þakklæti hjálpar. Húmor léttir leit­ina. Vinátta, fjalla­hringur, börn og barna­börn, stakur hljómur, bragð­upp­lifun, heilsa, starf með til­gang – og ham­ingjan sem hljómar úr mögn­urum bíl­skúrs­bands með vin­unum. Ham­ingjan er jákvæð jól og nei­kvæð Covid-próf.

Sigurður Ingibergur Björnsson

forstjóri Klíníkurinnar

Ham­ingjan er köttur. Hún vitjar mín þegar henni hentar en ef ég elt­ist við hana, vill hún ekk­ert með mig hafa. Ef svo ber undir reyni ég að æðr­ast ekki en reyni heldur að skapa aðstæður sem henni líkar. Þá er hún lík­legri til að koma og strjúka sér upp við mig, að minnsta kosti stund­ar­korn. Henni líkar vel við þakk­læti, að ég taki eftir því þegar fólk­inu mínu gengur vel og að ég sætti mig við að vera ekki full­kom­inn. En fyrst og fremst líkar henni við mig þegar ég reyn­ist öðrum vel.

Sturla Þengilsson

Ham­ingjan er þegar núið kallar ekki á meira af ein­hverju og kemur því oft til manns þegar áfanga hefur verið náð eða á áfanga­stað er komið en líka þegar maður gefst upp fyrir því sem ekki er hægt og þakkar fyrir það sem maður fær áorkað. Hamingja augna­bliks­ins er mjög mik­il­væg til að skilja og skynja ham­ingj­una og hvað mig varðar getur það verið útsýni af fjall­stoppi yfir ósnortna nátt­úru, sam­vera með maka, börnum og barna­börnum eða aleinn í eyði­firði við log­andi varð­eld og sjáv­ar­út­sýni. Söknuður getur líka verið upp­spretta ham­ingju þegar góðar stundir eru rifj­aðar upp með gengnum vinum og ætt­ingjum. Ham­ingjan er allt um kring og þarf bara að veita henni nær­ingu.

Frosti Logason

blaðamaður

Mér finnst alltaf nauð­syn­legt að rækta ham­ingj­una því hún er að mínu mati eitt mik­il­væg­asta hrá­efnið til þess að mér sjálfum líði vel og auð­vitað fólk­inu í kringum mig, fjöl­skyldu og vinum. Sjálfur tel ég helstu ham­ingj­una að finna í ein­fald­leika lífs­ins, góðum sam­skiptum, auð­mýkt og þakk­læti. Ég hef það reyndar fyrir reglu að reyna á hverjum degi að muna eftir því að þylja upp allt það sem ég hef til að vera þakk­látur fyrir og það hefur reynst mér vel. Þannig fæ ég líka auk­inn áhuga á sam­eig­in­legri vel­ferð sam­ferða­manna minna og það hjálpar mér að leggja áherslu á að vera til staðar fyrir aðra. Það veitir mér mikla ham­ingju, frelsi og hug­arró.