Eftir að hafa verið heima nokkrar vikur og lítið farið út vegna veðurs, veikinda og veraldlegrar veiru, hef ég velt fyrir mér slagorðinu og skilaboðunum: „Ferðumst innanhúss“. Þau vöktu mig til umhugsunar um allskonar ferðamöguleika sem varð til þess að ég ákvað að skoða þær fjölmörgu ferðir sem hægt væri að upplifa innanhúss.

Ég byrjaði á að skoða orðabækur og fann í Stóru orðabókinni hvorki meira né minna en 155 mismunandi ferðir. Auðvitað þarf að útfæra flestar þessar ferðir og þá skiptir máli að skoða hvata fólks til ferðalaga og í því ljósi má sníða ferðirnar eftir stakki hvers og eins, á margan og ólíkan hátt eftir smekk, getu og aðstæðum. Erfiðastar gætu hóp- og skólaferðir verið yfirferðar en fyrir þau sem hafa einhverja fótaferð og geta ekki viðhaft útferð eða utanferð getur verið gott að skipuleggja áætlunarferðir til að auka velferð sína og sinna. Á alnetinu er orðið frekar auðvelt að fara í innkaupa- og verslunarferðir en það borgar sig að fara varlega í jómfrúarferðina og gæta vel að því hver fær upplýsingar um kortanúmer. Eðlilega hafa margir verslunareigendur kosið að fara í herferð og kynnisferð til að kynna sig og vörur sínar og hefur það gengið upp og ofan og minna sumar þessara ferða á hálfgerða krossferð. Oftar en ekki hafa þeir notað þá aðferð á þeirri vegferð að fara í njósnaferð og söluferð sem gætu endað sem betliferð eða sníkjuferð ef upp um þá kemst. 

Í tölvunni má einnig fara í embættisferð, pílagrímsferð, vinnuferð, námsferð, eftirlitsferð og vísitasíuferð um allt mögulegt. Þessar ferðir eru um margt mjög svipaðar og auka líkur á allskonar fjarfundasamskiptum við annað fólk en það skiptir máli að skipuleggja samskipti á þessum frámunalegu tímum. Það má til dæmis nota tækifærið til að læra og kenna á heimilistæki heimilisins því það er nú svo að oft kann bara einn á heimilinu á ákveðið heimilistæki, sem er ekki gott ef upp koma dæmalausir tímar. 

„Veiðiferðir eru líka miklar aðdráttarferðir og miða að því að veiða allt mögulegt hvort sem það er heima eða á netinu“ 

Og talandi um fáheyrða tíma, þá eru boðsferðir orðnar áberandi á fésbók. Fólki er boðið að taka þátt í allskonar leikjum sem gleðja og dreifa huganum og skerpa athyglisgáfuna. Veiðiferðir eru líka miklar aðdráttarferðir og miða að því að veiða allt mögulegt hvort sem það er heima eða á netinu. Þessar ferðir tilheyra yfirheitinu „keppnisferðir“ og undir þær má setja skíðaferð, skautaferð, gönguferð og hjólaferð sem mælt er með að keppa í heima í skíðavél, heimaskautasvelli, hlaupabretti og hjólavél. Í víkingaferð getur verið gaman að fara og hún getur verið hin mesta forvitnisferð og endað á allskonar hátt því víkingar fara gjarnan í landkönnunarferðir, landaleitarferðir, ævintýraferðir og ránsferðir en árásaferðir eru bannaðar og ef vitað er um einhvern í þannig ferð er skylda að hringja í 112 og láta vita. Utan heimilis getur svona flökkuferð verið með of mikilli fyrirferð og jafnvel hin mesta og hættuferð sem gæti endað í sneypuför svo betra er að finna forrit sem hjálpa til við að koma í veg fyrir slíkt. Það má finna víkingatölvuleiki og google.maps í þessum glæfraferðum því annars gætu ferðalangar lent í úrferð og þá yrði ferðin einber vosferð sem gæti skilið eftir óþægilegar minningar. Árstíðarbundnar ferðir eru oft í smíðum hjá ferðamálafræðingum og hér á Íslandi má hafa þær í huga þegar verið er að skipuleggja innanhússferðir 

Berjaferðir eru vinsælar haustferðir og til að hægt sé að fara í þær innanhúss gæti verið gott að hafa aðgang að berjatínslutölvuleikjum en ef þeir verða ekki tilbúnir til brúkunar fyrir haustið þá er lag að búa til allskonar berjauppskriftakeðjubréf til að senda á netið eða skapa umræður um skemmtilegar berjabrekkuferðir. Þetta má einnig gera um grasaferðir í sumarferðum og eggjaferðir í vorferðunum. Söfnunarferðir eru áhugaverðar því það er hægt að safna svo ótrúlega mörgu og þar eru möguleikar á langferðum, skyndiferðum og fyrirlestrarferðum og hægt er að safna vísum, sögum, slúðri, jákvæðni og allskonar. Athugið að rétt meðferð heimilda er alltaf mikilvæg og flanferð í þeim efnum gæti valdið hrakferð sem gæti reyndar alið af sér skemmtilega píslarvættisferð sem gaman væri að koma í umferð. Jólaferðir, þarf að fara að vetri, sumarleyfisferðir að sumri og orlofsferðir og helgarferðir allt árið um kring og þar liggja endalausir möguleikar fyrir hugmyndaríka ferðaskipuleggjendur sem vert er að skoða. Í því samhengi má einnig nefna óvissuferðir, náttúruferðir og skreiðarferðir sem gætu komið vel út í klasastarfi fiskiferða-, -skoðunarferða og könnunarferðafyrirtækja. En svo eru það ferðirnar sem gætu flokkast sem morgunferðir, kvöldferðir eða næturferðir og koma oft óvænt upp og með litlum fyrirvara. 

Það er svo magnað að hafa internetið á þessum síðustu og verstu tímum því þá er auðvelt að fara í trúboðsferð, kvonbænaferð og kirkjuferð á netinu og þar er líka hægt að fara í fuglaskoðunarferð. Það getur líka verið sniðugt að fara í fuglaskoðunarferð með kíki út í glugga. Þetta er ein tegund af veiðiferð, þá eru fuglarnir skotnir með augunum og síðan er allt skráð sem þeir taka sér fyrir vængi eins og flug, mataröflun, hreiðurgerð, varp og allskonar. Utan nets getur verið gaman að fara í gróðursetningarferð að vori sem miðar að því að gróðursetja innanhúss. Oft þarf drífa eitthvað af og þá koma snattferðir, skotferðir, skyndiferðir og hraðferð sér vel og við þær aðstæður er gott að hafa í huga tegundirnar þeysiferð, ofsaferð og fleygiferð en varist að skipuleggja þær með sætaferðir í huga. Þessar ferðir gætu verið í formi spretthlaups í ísskápinn, kappáts og kapphlaups á klósettið þar sem þau sem tapa kapphlaupi æfa alvegíspreng steppdans fyrir utan. Fyrir það fólk sem elskar að fara í millilandaferðir og utanlandsferðir eins og sólarlandaferð, geimferð og tunglferð geta vafrað um á netinu og upplifað með skynjunarfærum sjónar og heyrnar og til að upplifa það enn betur gæti verið gott að panta í þrívíddargleraugu í næstu innkaupaferð og kannski hefðbundinn mat þeirra svæða sem á að heimsækja til að finna bragð, lykt og áferð áfangastaðanna. 

Ef framkvæma þarf heimanferð getur þurft að ferðast utanhúss og nota alvöru skipaferð, flugferð eða ökuferð en þá þarf að gæta þess á þessum fádæmalausu tímum að einn flytji í einu og að hafa tvo metra á milli. Ef ekki getur þó verið gaman að fara í innanhúss bílferðir og bátaferðir með því að raða stólum og fara í bílstjóra- og skipstjóra og farþegaleik. Einnig er hægt að raða bílabrautum fyrir leikfangabíla og búa til pappírsbáta og láta þá sigla í baðkari, vaskafati eða öðru sem getur innihaldið smá vatn. 

Auðvitað er ekki hægt að fara allar ferðir innanhúss sama í hvaða árferði fólk er og í sumum tilfellum þýðir ekkert að snúa utandyraferð í innandyraferð. Læknar þurfa að fara í lækningaferð og útfararstjórar þurfa að fara í líkferð og trúlega þarfnast það ákveðinnar skipulagningar því það getur verið álag að fara nálægt fólki ef viðkomandi er ekki í viðeigandi hlífðarbúnaði. Það getur verið streituvaldandi að fylgjast með mannaferðum þegar sendiferða er þörf og mikilvægt er að vera á verði svo fólk komi ekki of nærri þegar farið er í kaupferð, póstferð eða brúðkaupsferð. Fólk gæti staðið uppi með ónýtisferð ef kæmi í ljós við heimferð að kaupstaðarferðin hafi hvorki verið heilsubótarferð né lystiferð. 

Af mörgu er að taka og næg geta verkefnin orðið fyrir ferðaskipuleggjendur á þessum óvenjulegu tímum og þótt sóttkví geti verið jafn einmanaleg og örævaferð er vel hægt að upplifa rannsóknarferðir og skemmtiferðir með allskonar sniði án þess að fara eina einustu fýluferð. Nú hef ég stiklað á stóru og aðeins nefnt hluta þeirra ferða sem hægt er að fara og upplagt er að byrja að skipuleggja og upplifa. Af nógu er að taka og þessi yfirferð er svosem engin lokaferð og einhver spil í erminni þarf ég að hafa fyrir aukaferð. Eftir þessar vangaveltur er tími kominn til að poppa og kveikja á sjónvapinu því bíóferð er í vændum. Ég óska landsfólki innilegra og góðra ferða á þessum fordæmalausu tímum.