Styttri skóla­dagur, tóm­stunda­starf fellur niður og mörg ný orð í fréttum. Daglegt líf íslenskra grunn­skóla­barna hefur tekið tals­verðum breyt­ingum að und­an­förnu eftir að gripið var til aðgerða til að stemma stigu við útbreiðslu kór­óna­veirunnar. 

Þeir Ottó Örn Ragn­ars­son, Jakob Már Kjart­ans­son og Alex­ander Sig­ur­steins­son eru allir níu ára og eru í 4. bekk í Vatns­enda­skóla í Kópavogi. Þeir æfa allir hand­bolta og fót­bolta og stunda einnig skák­æf­ingar af kappi, allar slíkar æfingar hafa nú fallið niður en félag­arnir láta ágæt­lega af sér, þrátt fyrir allt, og segj­ast litlar áhyggjur hafa af stöðu mála.

Spurðir hvað hafi breyst í þeirra lífi und­an­farið svarar Jakob að allar æfingar hafi fallið niður. 

„Skólinn stytt­ist, alveg um tvo klukku­tíma,“ bendir Ottó á. „Við erum í fríi. Það er ekk­ert mikið að gera,“ segir Jakob. „Við þurfum líka að taka auka­æf­ingar, því það eru engar æfingar,“ segir Alex­ander og bætir við að slíkar æfingar geri þeir vin­irnir í bíl­skúr for­eldra sinna.

Styttri skóladagur þrjá daga í viku

Félag­arnir segja að búið sé að skipta árgang­inum þeirra niður í fleiri og smærri hópa en áður var. 

Jakob: „Þú átt ekki að fara út úr stof­unni þinni nema bara til að fara á kló­settið og í nesti.“

Alex­ander: „Og líka til að ná í eitt­hvað.“

„Þetta byrj­aði með leð­ur­blöku eða snák“

Ottó: „Og fara í úti­vist.“

Alex­ander: „En það má bara einn hópur fara í úti­vist í einu.“

Auk þess að vera búnir tveimur tímum fyrr í skól­anum, eru þeir ein­göngu þrjá daga vik­unnar í skól­anum og hafa því umtals­vert meiri frí­tíma nú en áður, sem þeir verja á ýmsan hátt. Jakob seg­ist vera svo­lítið í tölv­unni og Ottó spilar á spil.  „Við erum í fót­bolta mjög lengi, í þrjá tíma,“ segir Alex­ander.

Þetta byrjaði með leðurblöku eða snák

Og blaða­maður Stund­ar­innar kom ekki að tómum kof­unum hjá félög­unum þegar þeir voru spurðir um ástæðu þessa alls. Þeir hafa fylgst grannt með stöðu mála og höfðu meðal ann­ars kynnt sér upp­runa kór­óna­veirunnar.

Ottó: „Þetta byrj­aði með leð­ur­blöku eða snák.“

Jakob: „Og svo er þetta bara búið að dreifast.“

Aðspurðir segj­ast þeir ekki þekkja neinn sem hefur veikst, en vinur þeirra er í sótt­kví. Þá eiga þeir líka afa og ömmur í sótt­kví. 

Hafa aukið við orðaforðann

Spurðir hvort þeir viti hvað orð eins og sótt­kví, sam­komu­bann, ein­angrun og útgöngu­bann þýða segj­ast félag­arnir hafa kynnt sér það, enda hafa þeir fylgst vel með fréttum. 

 „Ég hef áhyggjur af ömmu minni og afa“ 

Jakob: „Sóttkví er þegar þú mátt ekki fara út í tvær vikur.“

Ottó: „En þú mátt samt fara í göngutúr. Bara hitta ekki neinn.“

Jakob: „Bara hitta ekki neinn í tvær vikur. Bara þann sem býr hjá þér. Útgöngu­bann þýðir að þú átt ekki að fara út nema fara í apó­tek eða versla í mat­inn. Sam­komu­bann er að þú setur ein­hvern tak­mark­aðan fjölda á stað.“

Spurðir hvort þeir hafi áhyggjur svara þeir neit­andi. „En ég hef áhyggjur af ömmu minni og afa,“ segir Ottó.