Vilhjálmur Birgisson, formaður Verkalýðsfélags Akraness, kallar vinnubrögð leigufélagsins Heimavalla í söluferli húsnæðis á Akranesi „siðlaus“. Hann segir að 18 fjölskyldur, eða 60 einstaklingar, standi frammi fyrir því að missa húsnæði sitt á næstu mánuðum eftir að Heimavellir seldu Holtsflöt 4 á Akranesi. Hann lýsir því í pistli á Facebook að þótt Heimavellir hafi uppfyllt lagalegar skyldur sínar hafi það skilið viðskiptavini sína eftir í „svartholi óvissunnar“ með því að upplýsa það ekki um raunverulega stöðu mála og líklega framvindu.

Framkvæmdastjóri Heimavalla, Arnar Gauti Reynisson, segir félagið hafa uppfyllt allar sínar skyldur og að það hafi ekki komið félaginu við hvað nýr eigandi ætlaði að gera við húsnæðið.

„Hér eru 18 fjölskyldur sem eru að missa grunnstoð sína sem er að hafa þak yfir höfuðið“

Vilhjálmur greinir frá því í pistli sem lesa má hér að neðan að fjölskyldurnar hafi fengið tilkynningu um að Heimavellir hefðu selt allar íbúðirnar á Holtsflöt 4. Hann segir að nú hafi komið í ljós að nýir eigendur hafi ekki í hyggju að leigja íbúðirnar áfram, heldur standi til að selja sem flestar hratt og vel. Þrjár fjölskyldur hafa leigusamninga sem renna út 31. mars, en segir Vilhjálmur að þær séu „eðlilega í fullkomnu uppnámi vegna sinnar stöðu. Aðrir leigusamningar renna síðan út margir hverjir á næstu mánuðum. Hér eru 18 fjölskyldur sem eru að missa grunnstoð sína sem er að hafa þak yfir höfuðið, en heildarfjöldi þeirra sem búa í þessum 18 íbúðum eru um 60 manns.“

Skilja leigjendur eftir í „svartholi óvissunnar“

Vilhjálmur álasar ekki nýjum eigendum þar sem þeir voru aðeins í viðskiptum við Heimavelli og hafa sitt eigið viðskiptamódel, heldur setur hann alla ábyrgðina á upplýsingaflæði leigufélagsins til leigjenda þess.

„Það er ömurlegt og gjörsamlega siðlaust að félag eins og Heimavellir sem keyptu íbúðir hér á Akranesi m.a. af Íbúðalánasjóði á sínum tíma og það á sérstökum sérkjörum skuli voga sér að skilja „viðskiptavini“ sína eftir í svartholi óvissunnar. En margir þeirra hafa leigt hjá Heimavöllum frá upphafi.“

Vilhjálmur telur það sómalaust að hafa ekki upplýst leigjendur um áformin „þannig að þeir hefðu meiri tíma en rúma tvo mánuði til finna fjölskyldum sínum þak yfir höfuðið. Eða að tryggja með afgerandi hætti betri réttarstöðu þeirra sem hafa verið leigjendur hjá Heimavöllum um langa hríð þegar gengið var frá sölu á þessum 18 íbúðum. Ekkert af þessu var gert og eru því 18 fjölskyldur skildar eftir nánast bjargarlausar „örfáum mínútum“ áður en þau eiga að tæma íbúðirnar!“

Vilhjálmur bendir á að leigumarkaðurinn á Akranesi sé mjög erfiður, og því eigi þessar fjölskyldur framundan erfiðan róður. „Ég hef haft samband við Heimavelli og gert alvarlegar athugasemdir við þessu vinnubrögð og það má vera að þau standist húsaleigulögin en eitt er víst að þessi vinnubrögð eru gjörsamlega siðlaus með öllu. Þessi staða sýnir mikilvægi þess að skerpa þurfi enn frekar á húsaleigulögunum sem ég veit að verið er að gera og hef ég m.a. komið þessari ömurlegu stöðu íbúa að Holtsflöt 4 á framfæri við félagsmálaráðherra.“

„Hafi Heimavellir skömm fyrir að koma svona fram við leigjendur sína til margra ára!“

Bætir hann við: „Ég veit að bæjarstjórinn á Akranesi hefur eins og ég gríðarlegar áhyggjur af þessari stöðu sem upp er komin hjá íbúum að Holtsflöt, enda liggur fyrir að leiguíbúðir á Akranesi liggja ekki á lausu og því er staða þessa fólks ömurleg í alla staði og vonandi finnst í samráði við bæjaryfirvöld einhver lausn á þessu máli. En hafi Heimavellir skömm fyrir að koma svona fram við leigjendur sína til margra ára!“

Spurðu ekki kaupanda hvað hann ætlaði að gera við húsnæðið

Arnar Gauti Reynisson, framkvæmdastjóri Heimavalla, sagðist í samtali við Stundina kannast við málið, en ekki hafa lesið pistil Vilhjálms og því ekki getað brugðist við honum. „Við erum skráð félag og ég get ekki fjallað um einstök viðskipti félagsins fyrir utan það sem við gefum opinberlega frá okkur“ segir hann. „Við upplýsum það bara í kauphöllinni þegar svo ber undir.“

 „Við erum skráð félag og ég get ekki fjallað um einstök viðskipti félagsins“

Hann sagði það klárt mál að sá sem kaupir fasteign þurfi að virða leigusamninga. „Hann hefur ekkert annara kosta völ en að virða samninginn eins og hann er, sem fylgir eigninni.“ Að því sögðu, þá væri ekkert sem hindraði nýjum eiganda að segja leigusamningum upp eftir kaup.

Aðspurður hvort félagið hafi vitað að kaupandi myndi ekki leigja íbúðirnar áfram út svarar Gauti að hann geti ekki tjáð sig um það. „Við seljum húsið með þeim leigusamningum sem því fylgja, og við höfum engar væntingar eða upplýsingar um annað en að kaupandinn muni standa við þá leigusamninga. Ef svo kemur til að íbúð er seld með leigusamningi, þá er það þannig. Þetta eru bara þau réttindi sem leigjendum er tryggð. Leigusamningur heldur sér alveg þótt húsnæði skipti um eigendur.“

„Við vorum ekki að spyrja kaupanda að því hvað hann ætlaði að gera við íbúðirnar“

Þegar blaðamaður ítrekar spurningu um hvort Heimavellir hafi vitað um áform kaupanda segir Gauti félagið ekki hafa spurt. „Við vorum ekki að spyrja kaupanda að því hvað hann ætlaði að gera við íbúðirnar. Hann bara keypti þær með öllu leigusamningunum.“