Móðir sem á börn á leikskóla varar við því að leikskólastjórnendur verði fengnir til að ræða við foreldra sem fyrirhuguð stytting opnunartíma leikskóla hefur áhrif á. Hún telur að niðurstöður slíkrar könnunar yrðu skakkar og mikilvægt sé að fá óháðan aðila til verksins. Að öðrum kosti séu foreldrar settir í þá stöðu að þurfa að segja sinn tíma verðmætari en leikskólakennara.

Tillaga um að stytta almennan opnunartíma leikskóla í Reykjavík þannig að þeim verði lokað 16.30 í stað 17.00 áður liggur nú fyrir borgarráði. Breytingin tæki gildi 1. apríl, en heimilt yrði að sækja um aðlögunarfrest til 1. ágúst vegna sérstakra ástæðna.

Til stendur að ræða við foreldra þeirra 937 barna sem breytingin nær til, en borgaryfirvöld hafa ekki útlistað með hvaða hætti það verður gert. Í viðtali við Stundina lagði Þórdís Lóa Þórhallsdóttir, formaður borgarráðs, áherslu á samráð við hagsmunasamtök þeirra, en ekki beint samtal. Í tillögu til borgarráðs lagði Dagur B. Eggertsson borgarstjóri hins vegar til að leikskólastjórnendur muni ræða við foreldrana.

Hildur Björk Pálsdóttir er með dætur sínar á leikskóla í Hafnarfirði, en þar tók svipuð ákvörðun gildi um áramótin. „Úr Hafnarfirði þurfa foreldar yfirleitt að keyra lengur í vinnu, þannig að með átta og hálfs tíma dvöl gengur yfirleitt ekki að skila af sér átta tíma vinnudegi,“ segir hún. „Ég óskaði eftir að fá níu klukkustundir og fékk það samþykkt. En ég er búin að vera hávær um málaflokkinn, skrifa grein, fara í viðtal og safna undirskriftum. Allir foreldrar sem ég hef talað við hafa sagt við mig að ég hafi fengið undanþágu til þess að ég hætti að skipta mér af þessu. En þó ég sé mjög glöð með að hafa fengið níu tíma er þetta áfram baráttumál fyrir mér þar sem þetta er ekki bara ósanngjarnt fyrir mína fjölskyldu.“

Hún segir foreldra hafa verið setta í óþægilega stöðu með breytingunum. „Við höfum verið markvisst í því að minnka streituvalda og álag og sveigjanleikinn skipti miklu máli með það,“ segir hún. „Eftir að ég fékk þetta samþykkt sótti systir mín stelpurnar einn daginn og ég notaði ekki þessar þrjátíu auka mínútur. Annan dag var dóttir mín lasin og ég notaði þær aftur ekki. Ég fæ samviskubit yfir að vera með þennan auka hálftíma og fæ það örugglega líka í þau skipti sem ég nota hann.“

„Mér þætti ekki þægilegt að vera foreldri sem situr fyrir framan leikskólastjórnanda og þurfa að réttlæta af hverju ég þarf tíma“

Hildur Björk segir málinu hafa verið stillt upp eins og deilu foreldra við leikskólana, sem ekki sé sanngjarnt, en hún segist gjarnan vilja stytta dvalartímann, bæði í þágu leikskólakennaranna og barnanna. Hins vegar sé ekki góð hugmynd að það sé sett í hendur leikskólastjórnenda að ræða við foreldra sem ákvörðunin nær til um lausnir. „Mér þætti ekki þægilegt að vera foreldri sem situr fyrir framan leikskólastjórnanda og þurfa að réttlæta af hverju ég þarf tíma,“ segir hún. „Maður skilur barnið sitt eftir hjá leikskólunum og vill halda sambandinu góðu og ekki skapa óvild.“

Hún telur að það yrði mikið verðmæti í því fyrir Reykjavíkurborg að fá óháðan aðila í þetta mál. „Annars mun leikskólakennarinn örugglega í mörgum tilvikum túlka það þannig að þú sért að segja: „Minn tími er verðmætari en þinn“.“