Kínverskt herlið flykkist að landamærum Hong Kong

Kín­verski her­inn hefur safnað liði í Shenzhen, borg sem liggur að landa­mærum Hong Kong. Fjöl­margir bryn­varðir bílar, trukkar og önnur far­ar­tæki kín­verska hers­ins hafa haldið til Shenzhen á síð­ustu dögum. Þetta kemur fram á vef Alþýðu­blaðs­ins, kín­versks rík­is­mið­ils.

Samkvæmt frétt­inni er um „vopn­aða lög­reglu“ að ræða sem er sér­hæfð í því að kljást við „upp­reisnir, óeirðir, alvar­leg ofbeld­is­full og ólög­leg atvik, hryðju­verka­árásir og önnur félags­leg atvik er varða öryggi,“ að því er segir í frétt­inni.

[adspot]Kínversk stjórn­völd hafa einmitt kallað suma af rót­tæk­ari mót­mæl­end­unum í Hong Kong vera hryðju­verka­menn. Mótmælin í Hong Kong hafa staðið í um 10 vikur og hægt er að lesa nánar um þau hér.

Mótmælin stig­mögn­uð­ust í vik­unni þegar þús­undir mót­mæl­enda flykkt­ust á Alþjóða­flug­völl­inn Hong Kong. Vegir sem liggja að flug­vell­inum voru tepptir og öll bíla­stæði full, sam­kvæmt þar­lendum yfir­völd­um. Öllu flugi til og frá Hong Kong var frestað í kjöl­farið en hefur nú haf­ist á ný. Til harðra átaka kom á milli mót­mæl­enda og lög­reglu sem beitti kylfum og pip­ar­spreyi á mót­mæl­endur.

Fylgjast grannt með þróun mála í Hong Kong

[links]Á vef­svæði kín­verska varn­ar­mála­ráðu­neyt­is­ins segir að kín­verski Alþýðu­her­inn sé til­bú­inn að hjálpa Hong Kong með örygg­is­gæslu, leit­ist yfir­völd í Hong Kong eftir því. Á vefnum segir að varn­ar­mála­ráðu­neytið fylgist grannt með þróun mála í Hong Kong og vísar til kín­verskra laga að Alþýðu­her­inn hafi rétt á að setja niður her­lið í Hong Kong, kjósi yfir­völd í Hong Kong það.

Nýjar gervi­hnatt­ar­myndir sýna einnig kín­verskt her­lið í Shenzhen. Svo virð­ist sem her­liðið haf­ist við á risa­vöxnum íþrótta­velli í borg­inni. Mynd­irnar sýna meira en hund­rað far­ar­tæki á vell­inum. 

AFP frétta­stofan birti á Twitter mynd­band sem sýnir kín­verska her­liðið á íþrótta­leik­vang­inum í Shenzhen. Mynd­bandið má horfa á hér fyrir ofan.

Donald Trump, for­seti Banda­ríkj­anna, segir að kín­verskum stjórn­völdum beri að koma fram við Hong Kong á mann­úð­legan hátt, ellegar að stefna frí­versl­un­ar­samn­ingi við Banda­ríkin í hættu. Banda­ríska utan­rík­is­ráðu­neytið hefur jafn­framt lýst yfir miklum áhyggjum á ferðum kín­verska hers­ins í átt að landa­mær­unum.

Donald Trump segir í stöðu­upp­færslu á Twitter að leyni­þjón­usta Banda­ríkj­anna hafi upp­lýs­ingar um kín­verska her­inn á landa­mærum Hong Kong. Hann sagði að allir ættu að vera rólegir og öruggir.