Útvarpsstöð í Namibíu greindi frá því fyrr í dag að Bernhard Esau, fyrrverandi sjávarútvegsráðherra Namibíu, væri nú í haldi lögeglunnar þar í landi. Lögreglan er sögð hafa fært ráðherrann fyrrverandi, Bernhard Esau, til yfirheyrslu.

Þá mun Ricardo Gustavo, fyrrverandi framkvæmdastjóri fyrirtækisins Namgomar, einnig vera í haldi samkvæmt útvarpsstöðinni. Gustavo var framkvæmdastjóri fyrirtækisins Namgomar sem Samherji fékk kvóta í gegnum á grundvelli milliríkjasamnings við Angóla sem gerður var gagngert til þess að hægt væri að útvega Samherja meiri kvóta. Fyrir þennan kvóta greiddi Samherji hálfan milljarð í mútur til skúffufélags í Dubaí.

Dagblaðið The Namibian segir einnig frá handtökunum.

Þetta gerist í kjölfar opinberunar upplýsinga um að sjávarútvegsráðherrann hafi verið einn þeirra sem tók við stórfelldum mútugreiðslum frá íslenska útgerðarfélaginu Samherja á árunum 2012 til 2019. Stundin greindi frá þessu í samstarfi við Wikileaks, fréttaskýringaþáttinn Kveik í Ríkissjónvarpinu og katörsku sjónvarpsstöðina Al Jazeera í síðustu viku. 

Eins og kom fram í umfjöllununum hafa félög í eigu Samherja greitt vel á annan milljarð króna til einstaklinga sem eru tengdir sjávarútvegsráðherranum til að tryggja fyrirtækinu aðgang að fiskveiðikvóta í landinu.

Berhard Esau sagði af sér í síðustu viku ásamt dómsmálaráðherranum Sacky Shangala. 

Einn af mönnunum sem þegið hafa greiðslurnar frá Samherja er James Hatuikulipi, stjórnarformaður ríkisfyrirtækis sem heitir Fishcor sem meðal annars úthlutar kvóta til útgerðarfélaga í landinu. Annar sem fengið hefur fengið greitt er frændi James og tengdasonur sjávarútvegsráðherrans, Tamson „Fitty“ Hatuikulipi. Þriðji maðurinn er fyrrverandi dómsmálaráðherra Namibíu, Sacky Shangala, sem er einn af höfuðpaurunum í skipulagningu viðskiptanna en hann var meðal annars eigandi að einu fyrirtæki sem fékk greitt frá Samherja. Sá fjórði er svo Mike Nghipunya, forstjóri ríkisfyrirtækisins Fishcor.

Þeir sem tekið hafa á móti mútunum frá Samherja sem hafa hætt í opinberum störfum eftir umfjallanirnar eru því Bernhard Esaus, Sacky Shangala og James Hatuikulipi. 

Samkvæmt The Namibian leitar lögreglan nú þriggja annarra aðila sem tengjast málinu. Lögreglan vill ekki segja að hverjum hún leitar. Ljóst er að þeir James, Tamson og Sacky eru þeir einstaklingar sem skipulögðu múturnar  mest af þeim sem því tengjast og einnig þeir sem nutu góðs af þeim.