Aðeins tveir þingmenn stjórnarflokkanna mættu á fundi fjárlaganefndar á þriðjudag og miðvikudag, þau Páll Jóhann Pálsson og Vigdís Hauksdóttir, en hvorugt þeirra býður sig fram í Alþingiskosningunum sem fram fara í lok mánaðar.

Enginn af þremur fulltrúum Sjálfstæðisflokksins í fjárlaganefnd mætti á fundina þrátt fyrir að á dagskrá væru mál sem Bjarni Benediktsson, fjármálaráðherra og formaður Sjálfstæðisflokksins, hefur sett á oddinn; annars vegar fyrirhugaðar breytingar á lögum um Lífeyrissjóð starfsmanna ríkisins og hins vegar ný heildarlög um opinber innkaup. 

Þegar allsherjar- og menntamálanefnd fundaði í gær voru einnig aðeins tveir fulltrúar stjórnarliða viðstaddir, þær Líneik Anna Sævarsdóttir og Unnur Brá Konráðsdóttir. Þá hefur Björt Ólafsdóttir, þingkona Bjartrar framtíðar, kvartað undan því að hvorki fjármálaráðherra né innanríkisráðherra, þ.e. formaður og varaformaður Sjálfstæðisflokksins, hafi verið viðstödd óundirbúinn fyrirspurnartíma á mánudag og fullyrt að þetta sé vegna þess að þau hafi verið að sinna kosningabaráttunni.

Mynd: Pressphotoz

Óvissa og ósætti ríkir um framhald þingfunda. Hafa þingmenn stjórnarandstöðunnar gagnrýnt stjórnarliða harðlega fyrir að skrópa á fundi fastanefnda þingsins og heyja kosningabaráttu meðan minnihlutinn sinnir þingstörfum. Árni Páll Árnason, þingmaður Samfylkingarinnar, telur að með þessu áframhaldi þurfi að kvarta til Öryggis- og samvinnustofnunar Evrópu, sem annast meðal annars kosningaeftirlit, enda skekki það samkeppni milli stjórnmálaflokka í aðdraganda kosninga að stjórnarmeirihlutinn nýti sér yfirburðastöðu sína á Alþingi til að heyja kosningabaráttu á kostnað minnihlutans.  

„Stjórnarmeirihlutinn er hættur á þessu þingi, hann er hættur að vinna. Ég sat nærri því fjögurra klukkustunda fund í fjárlaganefnd í gær um mikilvægt mál sem hér er á dagskránni, lífeyrismál opinberra starfsmanna. Þar voru tveir þingmenn stjórnarmeirihlutans og báðir að hætta á þingi. Aftur í morgun voru sömu tveir mættir einir í fjárlaganefnd,“ sagði Árni Páll í ræðu undir liðnum fundarstjórn forseta í gær. „Þarf frekari vitnanna við? Það er enginn þingmaður stjórnarmeirihlutans sem hyggur á endurkjör sem virðir þingið mætingu. Þeir mæta ekki. Þetta gengur ekki. Fjárlaganefnd var þannig skipuð tvo morgna í röð að þar sjást ekki þingmenn aðrir en þeir sem ekki hyggja á endurkjör. Þetta er grafalvarlegt mál. Hæstvirtur forseti verður að taka stjórn þingsins í sínar hendur, hann hefur tólin og tækin. Hann verður að gera hlé á þingfundum þangað til að stjórnarmeirihlutinn kemur með málalista og það liggur í augum uppi að það geta ekki verið ágreiningsmál því að tíminn til að ræða ágreiningsmál er úti þegar starfsáætlun er lokið.“