Hjálparsamtökin Solaris hafa hafið undirskriftarsöfnun fyrir feðginin Abrahim Maleki og ellefu ára dóttur hans Hanyie þar sem krafist er að þeim sé veitt áheyrn hjá yfirvöldum á Íslandi. Söfnunin hófst í gær og hafa rúmlega 1.300 manns skrifað undir. Þá hefur styrktarreikningur verið stofnaður fyrir feðginin.
Stundin fjallaði um ferðalag Abrahims og Hanyie hingað til lands og drauma þeirra um betra líf í síðasta tölublaði. Feðginin, sem eru afganskir flóttamenn, lentu í miklum lífsháska á leið sinni yfir Miðjarðarhafið og eru heppin að vera á lífi. Abrahim er bæklaður á fæti og hefur Hanyie þurft að sinna öllum húsverkum fyrir þau feðginin.
Þau bíða þess nú að verða flutt úr landi. Kærunefnd Útlendingastofnunar segir í úrskurði sínum að Abrahim uppfylli ekki skilyrði sem þarf til að hljóta alþjóðlega vernd hér á landi. Kærunefndinni þótti ekki ástæða til að ræða við stúlkuna og að mati nefndarinnar haldast málefni feðginanna í hendur.
Fengu ekki efnismeðferð þrátt fyrir að vera í sérstaklega viðkvæmri stöðu
Kærunefnd útlendingamála komst að þeirri niðurstöðu að feðginin væru í sérstaklega viðkvæmri stöðu, þvert á niðurstöðu Útlendingastofnunar. Þrátt fyrir það var ekki fallist á að taka mál þeirra til efnismeðferðar. Þau geta því átt von á því að verða flutt á brott hvenær sem er á næstu vikum, en þeim hefur verið tilkynnt að þau verði látin yfirgefa landið í síðasta lagi þann 19. júlí.
Feðginin töldu Útlendingastofnun hafa brotið á rétti þeirra þegar Hanyie var neitað um viðtal. Í úrskurði kærunefndar útlendingamála var ekki talið vera tilefni til að ræða við stúlkuna. „Í svari Útlendingastofnunar, dags 2. maí síðastliðinn, kemur fram að venjan sé sú að barni sem sé 15 ára eða eldra sé boðið að koma í viðtal að höfðu samráði við foreldra þess og taki starfsmaður Útlendingastofnunar það viðtal. Sé barn yngra en 15 ára sé það metið í hvert sinn hvort taka eigi viðtal við viðkomandi barn og slíkt viðtal fari þá í flestum tilfellum fram í Barnahúsi. Kærunefnd telur í ljósi aldurs barns kæranda og eðlis málsins að ekki [sic] tilefni til þess að gera athugasemd við það mat Útlendingastofnunar að ekki hafi verið þörf á því að taka sérstakt viðtal við barn kæranda,“ segir í úrskurðinum.
Í kæru feðginanna til kærunefndar útlendingamála vísuðu þau til 12. gr. barnasáttmála Sameinuðu þjóðanna. Þar segir að barn eigi þann rétt að láta frjálslega eigin skoðanir í ljós í öllum málum sem það varða, og skal tekið réttmætt tillit til skoðana þess í samræmi við aldur þess og þroska. Þau telja það ekki samræmast barnasáttmálanum að Útlendingastofnun meti hvort tilefni sé til að veita barni viðtal um málefni þess. Sá réttur sé tryggður í sáttmálanum. Ákvæðið hefur verið talinn einn mikilvægasti rétturinn sem sáttmálinn mælir fyrir um.
„Þetta er mjög sorglegt og gróft dæmi. Við vitum að um skýrt brot á barnasáttmálanum er að ræða og því erum við gera okkar besta til þess að hjálpa þeim,“ segir Guðmundur Karl Karlsson, sjálfsboðaliði hjá samtökunum Solaris. Hann segir samtökin safna fé svo hægt sé að standa vörð um réttindi hælisleitanda, bæði barnanna og annarra réttinda sem þetta fólk hefur en verið er að horfa fram hjá.
„Þetta er greinilega mikið af fólki sem lætur sig málefnið varðar en söfnunin hefur gengið vonum framar. Betur má þó ef duga skal enda eru margir í slæmri stöðu og mál eins þeirra Abrahims og Hanyie alltof algeng,“ segir Guðmundur.
Guðmundur starfaði áður sem sjálfboðaliði hjá Rauða krossinum og kynntist þeim feðginum þar. „ Ég ákvað að hætta þar því ég vildi gera meira fyrir fólk eins og Abrahim og Hanyie en ég gat hjá Rauða krossinum. Því slóst ég í lið með Solaris þar sem ég hef starfað sem sjálfboðaliði.“
Athugasemdir