Þjóðlagasöngvarinn Gylfi Ægisson safnar liði gegn tillögu innan bæjarstjórnar Hafnarfjarðar að efla hinsegin fræðslu í skólum bæjarins. Gylfi sakar bæjaryfirvöld um „sálarmorð á börnum“, segir að verið sé að „skemma börnin og eyðileggja“ og kveðst tilbúinn að fara í fangelsi fyrir baráttu sína gegn fræðslunni. Hann sakar Samtökin ‘78 um yfirvofandi heilaþvott. „Samtökin 78 fá að heilaþvo Grunnskólabörn í Hafnarfirði að vild,“ fullyrðir hann.
Efling hinseginfræðslu vekur hörð viðbrögð
Tillagan var lögð fyrir bæjarstjórn 15. apríl síðastliðinn og var henni vísað til fræðsluráðs. Tillagan gerir ráð fyrir eflingu hinseginfræsðslu og -ráðgjafar:
„Fulltrúar Samfylkingarinnar gera það að tillögu sinni að farið verði í átak í eflingu hinseginfræðslu og -ráðgjafar í grunnskólum Hafnarfjarðar. Hafnarfjarðarbær leitist við að gera samstarfssamning við Samtökin ‘78 um þróun námsefnis fyrir öll stig grunnskóla, frá 1. til 10. bekkjar og sérfræðingar Samtakanna haldi námskeið fyrir alla starfsmenn grunnskóla Hafnarfjarðar. Nemendum í unglingadeildum grunnskóla verði sömuleiðis gert kleift að sækja einstaklingsráðgjöf hjá sérfræðingum Samtakanna án endurgjalds.“
Tengja samkynhneigð við nauðganir
Fræðsluráð Hafnarfjarðar kom saman í gær og var niðurstaða fundarins að fræðslustjóra yrði falið að taka saman upplýsingar um hvernig hinseginfræðslu hefur verið háttað. „Einnig er óskað eftir umsögn skólastjóra og fjölskylduþjónustu um tillöguna fyrir lok skólaárs,“ segir í fundargerð.
Andstæðingar hinsegin fræðslu færa fram harðar ásakanir og alhæfingar gegn samkynhneigðum og bæjarstjórninni. Meðal þeirra sem taka undir með Gylfa á Facebook-síðu hans er söngkonan Leoncie. „Næst fara kennara til skólans og heilaþvo börnin að það er allt í lagi að nauðga,“ fullyrðir hún.
Í samtali við Stundina segist Leoncie tengja nauðganir við samkynhneigð af trúarlegum ástæðum, vegna þess að páfinn hafi fordæmt bæði.
„Þetta snýst ekki um homma heldur endaþarmsmök“
Leoncie þvertekur fyrir að hún hati homma. Hún segist aðeins hata endaþarmsmök. Hún telur að hinsegin fræðslan sé heilaþvottur og segir að í Indlandi væri búið að reka „skólastjórann“. „Ég er kristin, kaþólsk, og páfinn kom til Indlands og sagði, það vita allir að endaþarmsmök eru siðferðilega röng. Það er það eina sem ég hugsa um. Þetta snýst ekki um homma heldur endaþarmsmök hjá hverjum sem er. Kúkur kemur frá rassgati og af hverju ætti einhver að vilja setja eitthvað þangað inn. Þetta er ógeðslegt,“ segir Leoncie.
Leoncie hefur verið tíðrætt um þó fordóma sem hún segist hafa orðið fyrir á Íslandi. Hún hafnar því að hræsni felist í afstöðu hennar gagnvart samkynhneigð. „Þetta er ekki hatursáróður. Hommarnir á Íslandi hafa haft svo mikla fordóma í minn garð. Hví ætti mér að varða um þá? Hommar í öðrum löndum hafa enga fordóma gegn mér, en hérna Íslandi? Guð minn góður. Bullshit, þetta er ekki sambærilegt við rasisma. Ég veit hvað rasismi er. Rasismi er ekki bara fordómar heldur hatursáróður,“ segir Leoncie.
Ásakanir á Útvarpi sögu
Harðar umræður hafa sprottið um ákvörðun bæjarstjórnar á útvarpsstöðinni Útvarpi sögu. Í könnun á vefsíðu útvarpsstöðvarinnar kemur fram að 84% svarenda eru andsnúnir hinsegin fræðslu í grunnskólum landsins.
Í gær áttu sér stað umræður þar sem þáttarstjórnandi og innhringjendur tengdu fræðsluna meðal annars við barnaklám:
Innhringjandi á Útvarpi sögu kvartaði undan því að málfrelsið væri heft. „Fólk þorir ekki að tjá sig um þetta. Þetta er orðið svo langt gengið. Þetta er orðið svo yfirgengilegt.“
Annar innhringjandi, Hulda, ýjaði að því að nemendur yrðu látnir stunda kynlíf: „Er þetta sýnikennsla? Er þetta verkleg kennsla?“
„Ég bara vil ekki hugsa út í það einu sinni,“ svarar þáttarstjórnandinn, Pétur Gunnlaugsson.
„Þarf að fara að sýna þeim, eða kenna þeim eða káfa á þeim? Hver er meiningin?“ spyr hún.
„Þetta er innrætingarstarfsemi. Það er alveg ljóst. Þetta er eins og trúboð,“ fullyrðir þáttarstjórnandinn.
„Út með þetta og inn með kristnifræðsluna,“ segir innhringjandinn að lokum.
„Er ekki barnaklám bannað?“
„Þetta er bara eins og barnaklám eða eitthvað,“ fullyrðir annar innhringjandi, sem kallar sig Halldóru.
„Já, er ekki barnaklám bannað?“ svarar þáttarstjórnandinn. „Halldóra, er þetta ekki bara galið?“ spyr þáttarstjórnadinn. „Þetta er ógeðslegt,“ svarar hún. Í kjölfarið hvetur þáttarstjórnandinn hlustendur til að taka þátt í könnuninni á síðu stöðvarinnar.
„Ætla þeir að sýna hvernig þeir eðla sig?“
Önnur hringdi inn, að nafni Kristjana, „bölvuðu máli í sambandi við samkynhneigða. Að það skuli leyfa að kenna þetta í skólum. Ætla þeir að sýna hvernig þeir eðla sig? Ég ætla nú bara að vera dónaleg. Ég myndi bara spyrja þessa nítján ára stelpu hvort hún ætlar að gera það.“
„Ég hugsa að sumir hugsi þannig að það sé bara allt í lagi,“ svarar þáttarstjórnandinn. „Mér finnst að hún eigi bara að sýna hvernig hún og hennar lesbía myndi eðla sig fyrir framan börnin. Það er raunverulegt og þá ofbýður börnunum, held ég að hljóti að vera,“ segir innhringjandinn og vísar til bæjarfulltrúa Samfylkingarinnar sem lagði fram tillöguna. Kristjana hvetur til þess að lögregla ræði við hana.
„Það er bara verið að særa blygðunarkennd þessara barna. Ég skil bara ekki hvernig nokkrum dettur þetta í hug. Þetta er bara refsivert athæfi í raun og veru,“ segir þáttarstjórnandinn.
Hlutfall samkynhneigðar metið misjafnlega
Þess ber að geta að engar sannanir hafa verið færðar fram á tengsl samkynhneigðar við barnaklám eða nauðganir, en ásakanir um slíkt hafa verið hluti af baráttu gegn samkynhneigðum um allan heim. Byggt á rannsóknum félagsfræðingsins Alfred Kinsey um miðja síðustu öld var áætlað að um 10% mannfjöldans í vestrænum samfélögum væri samkynhneigður, en Í nýlegri bandarískri rannsókn er ályktað að hlutfall þeirra sem laðast að eigin kyni sé allt að 20%. Hins vegar eru aðeins 1,5% Breta yfirlýst samkynhneigðir samkvæmt opinberum tölum þar í landi, en 93,5% eru yfirlýst gagnkynhneigðir. Þó hefur hlutfall samkynheigðra af mannfjölda í Bretlandi verið metið 5-7% í opinberri ákvarðanatöku.
Hinseginfræðsla hefði komið í veg fyrir kvalir
Meðal þeirra sem fordæmt hafa yfirlýsingar Gylfa Ægissonar fyrir fordóma eru Gunnlaugur Bragi Björnsson, viðskiptafræðingur og hommi:
„Hefði ég fengið einhverja fræðslu um slíkt ... hefði mátt spara mér áralangar vangaveltur, efasemdir, kvalir og sjálfsvígshugleiðingar“
„Ég ætla ekki að rekja sögu mína í smáatriðum en lykilatriðið er að ég fékk enga fræðslu um hinsegin málefni. Enga fræðslu um hvað það er að vera fæddur inn í annan veruleika en hið gagnkynhneigða norm. Hefði ég fengið einhverja fræðslu um slíkt á minni grunnskólagöngu, haft einhverjar fyrirmyndir að horfa til, hefði mátt spara mér áralangar vangaveltur, efasemdir, kvalir og sjálfsvígshugleiðingar ... Hlotnist mér sá heiður að verða faðir mun ég vernda mitt barn. Ég mun vernda það fyrir fáfræði og vondum gömlum körlum,“ segir Gunnlaugur á bloggsíðu sinni.
Vill vernda börnin fyrir fordómafullu fólki
Þá hvetur Rafn Steingrímsson forritari í bloggi á Stundinni til þess að börn verði vernduð fyrir Gylfa Ægissyni. „Hinsegin fólk er ekki skaðlegt börnum og hafa slíkar fullyrðingar margsinnis verið hraktar. Fordómar gegn hinsegin fólki geta hinsvegar verið skaðlegir börnum, eða öllu heldur þá óhörðnuðum unglingum sem eru kannski í þann mund að átta sig á eigin kynhneigð og eiga oft í erfiðleikum með að horfast í augu við það að vera „öðruvísi“. Þessir krakkar eiga oft mun erfiðari unglingsár heldur en gagnkynhneigðir jafnaldrar þeirra og eru viðkvæm fyrir hverskyns fordómum frá samfélaginu. Til dæmis frá fólki eins og Gylfa sem kallar þá rassálfa.“
Hinsegin fræðsla í Hafnarfirði
Samtökin '78 segja frumvarp um hatursorðræðu geta verið túlkað sem stuðningsyfirlýsingu við fordóma
Söngkonan Leoncie segist hafa fengið morðhótun undirritaða af Samtökunum '78
Athugasemdir