Össur Skarphéðinsson nýtti sér tölvupóstfang utanríkisráðuneytisins til smölunar í prófkjöri Samfylkingarinnar árið 2012. Kvennablaðið hefur birt tölvupóst sem Össur sendi einstaklingi af erlendum uppruna frá netfangi sínu úr ráðuneytinu. Þar óskar Össur eftir stuðningi mannsins í prófkjöri og undirritar póstinn sem utanríkisráðherra Íslands. 

Að því er fram kemur í frétt Atla Þórs Fanndals blaðamanns á vef Kvennablaðsins eru dæmi um fleiri sambærileg bréf, meðal annars póstur til hóps manna af afrískum uppruna sem allir voru í flókinni stöðu varðandi leyfi til búsetu og atvinnu hér á landi. 

Stundin greindi frá því í gærkvöldi að á annað hundrað innflytjenda hefði verið skráð á svokallaðan stuðningsmannalista Samfylkingarinnar vegna prófkjara flokksins í Reykjavík sem nú standa yfir. Þetta er um fimmtungur þeirra sem skráðir eru á lista „skráðra stuðningsmanna“ flokksins, þeirra sem ekki eru félagsmenn en vilja geta kosið í prófkjörum. Um er að ræða fjölda fólks frá Austur-Evrópu, Afríku og Miðausturlöndum, þar á meðal fólk sem kom til Íslands sem hælisleitendur. 

Svanur Kristjánsson stjórnmálafræðingur

Eftir að frétt Stundarinnar birtist fór af stað fjörug umræða á samfélagsmiðlum. Svanur Kristjánsson stjórnmálafræðingur sakaði Össur um að hafa smalað nýbúum og flóttafólki á stuðningsmannalista Samfylkingarinnar til að fá atkvæði þeirra í prófkjöri. 

Helga Vala Helgadóttir, lögmaður og fyrrverandi formaður Félags Samfylkingarinnar í Reykjavík, sagði í samtali við Stundina í morgun að þegar hún kom að prófkjöri flokksins fyrir fjórum árum hafi hún orðið vitni að því þegar nokkur fjöldi erlendra borgara staðfesti við túlk að þeim hefði verið lofaður ríkisborgararéttur gegn því að kjósa Össur Skarphéðinsson í prófkjöri Samfylkingarinnar. „Ég er ekki að segja að hann hafi lofað því persónulega, en það gerði það að minnsta kosti einhver sem vildi veg hans vel í því prófkjöri,“ segir hún. Fleiri viðmælendur staðfesta þetta í samtölum við Stundina. 

Nú hefur Kvennablaðið birt tölvupóst sem bendir til þess að málið sé mun alvarlegra en áður var talið. Tölvupóstinn má sjá hér að neðan: 

Mynd: Af vef Kvennablaðsins

Í frétt Kvennablaðsins segir meðal annars: 

Samfylkingin hefur um nokkurt bil lagt áherslu á að ná til innflytjenda, og fólks sem vill setjast hér að, í von um að virkja þátttöku fólks. Saga prófkjara Samfylkingarinnar vekja þó spurningar um hvort hér sé um að ræða raunverulegan vilja til þátttöku eða misnotkun á aðstöðumun þingmanns, og árið 2012 ráðherra, og svo einstaklinga með veika félagslega- og lagalega stöðu hér á landi.

Þá kemur eftirfarandi fram:

Samkvæmt heimildum Kvennablaðsins var mönnunum sem Össur sendi tölvupóst úr póstfangi ráðuneytisins gefið loforð um aðstoð vegna aðstæðna sinna. Þá sést á póstinum að Össur gefur þeim upp símann sinn og segir þeim velkomið að hringja í hann. Í bréfinu má finna farsíma Össurar ásamt farsíma Hrafns Jökulssonar. Þá skrifar Össur undir sem utanríkisráðherra.

Flestir voru mennirnir voru í viðkvæmri stöðu þegar samskiptin áttu sér stað og biðu úrlausna. Heimildamaður Kvennablaðsins hefur staðfest að samskiptunum fylgdu vilyrði um aðstoð vegna stöðu þeirra. Óánægja kom upp meðal mannanna vegna málsins þegar aðili með tengsl inn í hópinn útskýrði fyrir mönnunum að utanríkisráðherra hefði ekki beint vald yfir því hverjir fá vernd hér á landi eða ríkisborgararétt. Heimildamaður Kvennablaðsins sem átti í samskiptum við mennina segir alveg ljóst að hér hafi aðstöðumunur verið nýttur Össuri í hag. Kvennablaðið hefur undir höndum tölvupóstsamskipti við þá menn fyrir hönd Össurar.

Stundin hefur gert árangurslausar tilraunir til að ná tali af Össuri í dag, bæði í gsm-síma, með tölvupósti og á Facebook. Í frétt Vísis.is um málið kemur fram að hann vísi ásökunum Helgu Völu á bug í Facebook-skilaboðum til blaðamanns. „Að sjálfsögðu ekki. Ég hef engum manni lofað slíku, hvorki víetnömskum né öðrum, og minnist þess ekki að hafa talað við mann af víetnömskum uppruna frá því 10 flóttamenn bjuggu á hæðinni fyrir neðan mig á Holtsgötunni,“ er haft eftir Össuri sem bendir á að sömu ásakanir hafi komið upp fyrir fjórum árum. „Af hverju ætti að þurfa stjórnmálamann til að gera víetnama að ríkisborgara? Hafi þeir dvalarleyfi hér á landi njóta þeir allra réttinda, og geta orðið ríkisborgarar einsog aðrir eftur tiltekna dvöl sk. einföldum reglum.“

Ekki náðist í Oddnýju G. Harðardóttur, formann Samfylkingarinnar, við vinnslu fréttarinnar. 

Óskar Steinn Jónínu- og Ómarsson, ritari Samfylkingarinnar, birti hins vegar Facebook-færslu skömmu áður en Kvennablaðið og Stundin fjölluðu um málið. Þar skrifar hann:

„Í dag hafa komið fram ásakanir um að innflytjendum hafi verið lofað ríkisborgararétti gegn því að kjósa tiltekinn frambjóðanda í prófkjöri Samfylkingarinnar í Reykjavík fyrir Alþingiskosningarnar 2013. Eins og flestum öðrum er mér verulega brugðið vegna þessara ásakana. Að misnota fólk í viðkvæmri stöðu með þessum hætti er fullkomlega siðlaust og það eru vinnubrögð sem eiga ekki að líðast í neinum stjórnmálaflokki. Því mun ég fara fram á það í stjórn Samfylkingarinnar að þetta mál verði rannsakað ofan í kjölinn og sannleikurinn í málinu dreginn upp á yfirborðið. Séu ásakanirnar á rökum reistar verður að grípa til aðgerða til að svona lagað komi ekki fyrir aftur.“