Mannréttindafulltrúi Framsóknar æfur út í presta

Sveinn Hjörtur Guð­finns­son, aðal­maður Fram­sóknar og flug­vall­ar­vina í mann­réttinda­ráði Reykja­vík­ur­borgar, hefur farið mik­inn á sam­fé­lags­miðlum und­an­farnar vikur vegna stuðn­ings Laug­ar­nes­kirkju við írösku hæl­is­leit­end­urna Ali Nasir og Majed sem vísað var úr landi í lok júní­mán­aðar. Deilir hann meðal ann­ars áróð­ur­steikn­ingu Morg­un­blaðs­ins gegn „ólög­legum inn­flytj­endum“ á Facebook og tekur undir þau skila­boð sem fel­ast í mynd­inni. „Fólk hrópar "mannúð" þegar kemur að umræðu um hæl­is­leit­endur og flótta­menn en í sömu svipan líta fram­hjá okkar minnsta bróður,“ skrifar Hjörtur og gagn­rýnir prest­ana Toshiki Toma og Kristínu Þórunni Tóm­as­dóttur harð­lega.  

Stundin hefur áður fjallað um harða gagn­rýni Brynjars Níels­sonar og Ásmundar Frið­riks­sonar, þing­manna Sjálf­stæð­is­flokks­ins, á fram­tak prest­anna. Þá hefur Helgi Magnús Gunn­ars­son, vara­rík­is­sak­sókn­ari, gagn­rýnt kirkj­una fyrir að „virða ekki“ lög­legar ákvarð­anir stjórn­valda og sagt raka­laust að ekki sé for­svar­an­legt að senda hæl­is­leit­endur til Íraks.

Á Trú.is hafa nokkrir prestar tjáð sig um málið, meðal ann­ars Agnes Sig­urð­ar­dóttir, biskup Íslands, sem segir kirkj­una ekki geta annað en tekið afstöðu með fólki í neyð. „Þannig högum við okkur í sam­ræmi við kær­leiks­boð­skap krist­innar trúar,“ skrifar hún.

Séra Arna Ýrr Sig­urð­ar­dóttir tekur í sama streng. „Atburð­ur­inn í Laug­ar­nes­kirkju var van­máttug til­raun til að benda á ömur­lega fram­komu íslenskra stjórn­valda við hæl­is­leit­endur, til­raun til að verja vini sína fyrir armi lag­anna, sem var vissu­lega í laga­legum rétti, en, að því er við teljum mörg: í sið­ferði­legum órétti,“ skrifar hún. 

Mynd: Skjáskot af Youtube

Of mikill hávaði

Séra Skúli Sigurður Ólafsson, prestur í Nes­kirkju og eig­in­maður lög­reglu­stjór­ans í Reykja­vík, er gagn­rýn­inn á fram­tak kirkj­unnar. 

„Hugsunin var sann­ar­lega kær­leiks­rík, að bjóða hröktum ein­stak­lingum skjól, sál­gæslu og fyr­ir­bæn en í fjöl­miðlum og á net­inu virt­ist aðgerðin hafa verið hávaða­söm og særði marga sem töldu sig eiga annað skilið af hálfu kirkj­unnar,“ skrifar hann og vísar þar lík­lega til lög­reglu­þjóna sem yfir­völd sendu inn í kirkj­una. „Kirkju­grið gera miklar kröfur til þeirra sem vilja njóta þess friðar. Þar þarf að gæta þess að rjúfa ekki griðin með fyr­ir­ferð og hávaða.“

Kirkjugrið ekki bara fyrir utanaðkomandi

Skúli er þeirrar skoð­unar að kirkju­grið snúi ekki bara að þeim sem leita skjóls í kirkju, heldur ekki síður um þá sem eru þegar inni í kirkju. „Áfram þarf að sinna þeim sem standa höllum fæti og mæta for­dómum. Um leið þurfum við að gæta þess að valda ekki skaða og hug­leiða að kirkju­grið snúa ekki ein­göngu að þeim sem standa utan kirkju­dyr­anna og leita inn­göngu. Þau eiga ekki síður við um okkur sem stöndum inni í hinu helga rými,“ skrifar hann. Eins og komið hefur fram í fjöl­miðlum höfðu hæl­is­leit­end­urnir Ali og Majed tekið kristna trú áður en þeim var boðið að bíða brott­vís­unar uppi við alt­ari Laug­ar­nes­kirkju.