Lífslíkurnar bættar með breyttu mataræði

Tilurð bók­ar­innar Máttur mat­ar­ins má rekja aftur um nokkur ár, þegar Þórunn Steins­dóttir, annar höf­unda bók­ar­innar, og fjöl­skylda hennar bjuggu í Vancouver í Kanada. Þórunn hafði eign­ast sitt fyrsta barn nokkrum mán­uðum fyrr og hafði síðan hún varð ófrísk varið miklum tíma í að kynna sér hvernig hún gæti bætt lífslíkur sínar með breyttu matar­æði. Í Kanada hafði hún gott aðgengi að bókum og var í fæð­ing­ar­or­lofi, svo hún var í góðri aðstöðu til að sökkva sér ofan í þessi mál. Þegar hún var búin að kynna sér þau vel fann hún fróð­leiknum far­veg á bloggi sem hún kall­aði Mátt mat­ar­ins. Það náði fljótt miklum vin­sældum en þar deildi hún upp­skriftum og ýmsum fróð­leik sem hún hafði viðað að sér. Hún hlaut mikið hrós fyrir, enda voru margir áhuga­samir um þá hug­mynd að geta bætt lífslíkur sínar með bættu matar­æði, án þess að hafa endi­lega tíma eða áhuga til að viða að sér nauð­syn­legri þekk­ingu. „Þegar ég var komin aftur heim frá Kanada fann ég að haus­inn var kom­inn annað. Mig lang­aði samt ekki að loka blogg­inu en ákvað að pakka þessu saman í aðgengi­lega bók, þar sem flóknir lækn­is­fræði­legir hlutir væru útskýrðir á ein­faldan hátt. Ég hef lagt ofsa­lega mikla vinnu í að skilja þessa hluti sjálf og er með­vituð um að aðrir hafa ekki endi­lega tæki­færi til að kynna sér málin eins vel. Margt af þessu er ansi flókið og ég þurfti sjálf að hafa mikið fyrir því að skilja þetta. Ég hef trú á að fólk vilji gera allt sem í valdi þess stendur til að lág­marka lík­urnar á að það verði alvar­lega veikt á lífs­leið­inni. Bókinni er ætlað að vera tól til að auð­velda fólki þá vinnu.“