Ari Edwald, for­stjóri Mjólk­ur­sam­söl­unnar, er for­maður atvinnu­vega­nefndar Sjálf­stæð­is­flokks­ins, þeirrar mál­efna­nefndar sem mótar stefnu flokks­ins í atvinnu-, auð­linda-, sjáv­ar­út­vegs- og land­bún­að­ar­málum á lands­fundi. Sam­keppn­is­eft­ir­litið sektaði Mjólk­ur­sam­söl­una um 480 millj­ónir króna í síð­ustu viku vegna alvar­legra brota á sam­keppn­is­lögum og mis­notkun á mark­aðs­ráð­andi stöðu. Brotin voru framin áður en Ari tók við sem for­stjóri fyr­ir­tæk­is­ins, en hann hefur tekið til varna fyrir fyr­ir­tækið í fjöl­miðlum og full­yrt að kostn­að­ur­inn af sekt­inni muni lenda á neyt­endum. 

„MS mis­not­aði mark­aðs­ráð­andi stöðu sína með því að selja keppi­nautum sínum grund­vall­ar­hrá­efni til fram­leiðslu á mjólk­ur­vörum á óeðli­lega háu verði á sama tíma og MS sjálft og tengdir aðilar fengu þetta hrá­efni á mun lægra verði, og að auki undir kostn­að­ar­verði. Var þetta til þess fallið að veita MS og tengdum aðilum veru­legt sam­keppn­is­for­skot gagn­vart keppi­nautum,“ segir í reifun á nið­ur­stöðu Sam­keppn­is­eft­ir­lits­ins. „Með þessu móti var geta keppi­nauta til þess að keppa við MS og tengd félög skert með alvar­legum hætti, en það er til þess fallið að skaða á end­anum hags­muni neyt­enda og bænda. Þá liggur fyrir að MS veitti Sam­keppn­is­eft­ir­lit­inu rangar upp­lýs­ingar og lét undir höfuð leggj­ast að upp­lýsa eft­ir­litið um mik­il­væg gögn. Hefur það tafið úrlausn máls­ins og skaðað sam­keppni.“

Tollvernd MS uppreiknuð

Í ályktun atvinnu­vega­nefndar Sjálf­stæð­is­flokks­ins frá lands­fundi í októ­ber 2015, undir for­mennsku Ara, er lögð rík áhersla á heil­brigða og eðli­lega sam­keppni og sér­stak­lega tekið fram að land­bún­aður skuli rek­inn á mark­aðs­for­sendum. Þá hvatti atvinnu­vega­nefnd til þess að gerð búvöru­samn­inga yrði lokið sem fyrst til að eyða óvissu um starfs­skil­yrði land­bún­að­ar­ins. 

Nokkrum mán­uðum síðar, þann 19. febr­úar á þessu ári, voru umræddir búvöru­samn­ingar und­ir­rit­aðir í atvinnu- og nýsköp­un­ar­ráðu­neyt­inu.