Peningastefnunefnd Seðlabanka Íslands ákvað á fundi sínum í dag að hækka meginvexti bankans um 0,25 prósentustig. Meginvextir, sem eru vextir á sjö daga bundnum innlánum, verða því 7,50 prósent .
Þrír nefndarmenn studdu tillöguna en tveir vildu ganga lengra og hækka vexti um 0,5 prósentustig, sem bendir til aukinnar spennu innan nefndarinnar um hversu hart eigi að bregðast við stöðunni.
Samkvæmt yfirlýsingu nefndarinnar benda flestir hagvísar nú til þess að hægt hafi á efnahagsumsvifum. Þrátt fyrir það hefur verðbólga tekið við sér á ný. Þar vegur þungt hækkun opinberra gjalda og áhrif kjarasamningsbundinna launahækkana sem komu til framkvæmda í byrjun árs.
Undirliggjandi verðbólga hefur jafnframt aukist og er nú sú mesta í rúmt ár. Þá hafa verðbólguvæntingar hækkað, sem nefndin telur sérstaklega varhugavert.
Í yfirlýsingunni er einnig bent á að alþjóðlegir þættir hafi aukið verðbólguþrýsting. Miklar hækkanir á olíu og öðrum hrávörum í kjölfar aukinnar spennu við Persaflóa eftir loftárásir Bandaríkjamanna og Ísraels á Íran hafi þegar haft áhrif á markaði og ýtt undir hærri verðbólguvæntingar. Dragist átökin á langinn gæti verðbólga aukist enn frekar.
Nefndin varar einnig við því að háar verðbólguvæntingar geti leitt til þess að endurskoðunarákvæði kjarasamninga verði virkjuð síðar á árinu, sem myndi auka enn frekar verðbólguþrýsting.
Að mati peningastefnunefndar er því nauðsynlegt að herða taumhald peningastefnunnar þrátt fyrir vísbendingar um hægari hagvöxt. Nefndin segist jafnframt reiðubúin til frekari aðgerða ef þurfa þykir til að ná verðbólgu aftur að markmiði.
Fram kemur að næstu ákvarðanir muni áfram ráðast af þróun verðbólgu, verðbólguvæntinga og efnahagsumsvifa.
Athugasemdir (1)