„Áformum Íslendinga um losun fjármagnshafta ber að fagna. Nú er rétti tíminn, enda teljast höftin efnahagslega skaðleg og eru afar óvinsæl. Áætlunin um losun haftanna er skynsamleg og mun að öllum líkindum heppnast vel,“ segir í grein eftir hagfræðingana Ásdísi Kristjánsdóttur og Jón Daníelsson sem birtist á vefnum VoxEU.com í gær. Ásdís er forstöðumaður efnahagssviðs Samtaka atvinnulífsins og Jón Daníelsson er prófessor við London School of Economics.

Í greininni útskýra þau hvers vegna gjaldeyrishöftin voru lögð á í upphafi og hvers vegna reynst hefur erfitt að losa þau. Ásdís og Jón benda á að helsta hindrunin á vegi þess hafi tengst uppgjöri á eignum föllnu bankanna. Nú virðist kröfuhafarnir hafa fallist á að greiða stöðugleikaframlag fremur en stöðugleikaskatt.

„Áætlunin verndar hagkerfið og er um leið sanngjörn“

„Áætlunin verndar hagkerfið og er um leið sanngjörn í garð erlendra kröfuhafa, sem munu eftir að hafa greitt út stöðugleikaframlagið, þó hafa hagnast vel á fjárfestingum sínum á Íslandi á hápunkti kreppunnar,“ segja þau. 

Þá benda þau á að hrun íslenska bankakerfisins er þriðja stærsta fyrirtækjahrun sögunnar, á eftir Lehman Brothers og Washington Mutual. Hins vegar er verg landsframleiðsla á Íslandi aðeins 0,1 prósent af landsframleiðslu Bandaríkjanna. Umfang fjármálakerfisins var tíu sinnum meira en landsframleiðslan þegar bankarnir fór á hliðina árið 2008.

Grein Ásdísar og Jóns er á ensku, en textinn sem hér birtist er lausleg þýðing blaðamanns.