Biður Sigríði Andersen að koma samkynhneigðum flóttamanni til bjargar

Andrés Ingi Jónsson, þing­maður Vinstri grænna, gerði mál íranska hæl­is­leit­and­ans Amir Shokrgozar að umtals­efni á Alþingi í gær. „Nú ber­ast þær fréttir að Amir, mað­ur­inn sem við sendum úr landi, hafi fengið synjun á hæl­is­um­sókn sína á Ítalíu. Það stefnir því í að hann verði sendur aftur til Íran ef ekk­ert verður aðhafst,“ sagði Andrés Ingi og biðl­aði til Sigríðar Andersen, dóms­mála­ráð­herra, að grípa í taumana. Sigríður tók ekki til máls um málið. 

Við erum líka Trump Einn þeirra sem hefur vakið athygli á máli Amirs er rit­höf­und­ur­inn Andri Snær Magnason. Hann hitti Amir í Ítalíu í byrjun febr­úar og deildi sögu hans á Facebook. „Í hörðum heimi eigum við ekki að vera aflið sem brýtur niður fólk með járn­hnefa. Ég mun ekki mæla styggð­ar­yrði um Trump fyrr en Amir er kom­inn í fang kærasta síns, við erum nefni­lega líka Trump,“ skrif­aði Andri Snær meðal ann­ars.

Mynd: Andri Snær Magnason

Amir flúði heima­land sitt vegna kyn­hneigðar sinnar en sam­kyn­hneigðir eiga á hættu að verða dæmdir til dauða í Íran. Hann flúði í gegnum Tyrkland til Grikk­lands og þaðan til Ítalíu þar sem hann varð fyrir kyn­ferð­is­of­beldi í flótta­manna­búðum. Andrés Ingi bendir á að fyrir rúmu ári hafi íslensk stjórn­völd hætt að senda hæl­is­leit­endur til baka til Ítalíu vegna frétta af óvið­un­andi aðstæðum flótta­manna þar í landi. „Þeirri ákvörðun var illu heilli snúið nú um ára­mótin síð­ustu. Ítalía er það sem kall­ast í útlend­inga­lögum öruggt land. Það er vand­með­farið hug­tak. Þó að ríki séu örugg í þeim skiln­ingi að þar ríki ekki skálmöld og þar virki bæði stjórn­sýsla og rétt­ar­kerfi geta þau verið allt annað en örugg fyrir til­tekna ein­stak­linga og hópa.“

„Já, stjórn­sýslan okkar rukkar flótta­mann um papp­íra frá land­inu sem hann er að flýja vegna sam­kyn­hneigðar, papp­íra til að hann geti gengið í sam­kyn­hneigt hjóna­band.“

Biðlar til ráð­herra Andrés Ingi biðlar til Sigríðar Andersen, dóms­mála­ráð­herra, að grípa í taumana í máli Amirs.

Mynd: xd.is

Amir bjó í tvö ár á Íslandi og hefur lært íslensku, á íslenskan unnusta og verið sjálf­boða­liði hjá Sam­tök­unum 78’ og Rauða kross­inum. „Á þessum tíma hefur Amír fest hér rætur og eign­ast vini. Hann fann ást­ina og hefur lengi reynt að gift­ast unnusta sínum en ekki fengið vegna þess að íslensk stjórn­völd rukka hann um papp­íra frá þeim írönsku. Stöldrum aðeins við það. Já, stjórn­sýslan okkar rukkar flótta­mann um papp­íra frá land­inu sem hann er að flýja vegna sam­kyn­hneigðar, papp­íra til að hann geti gengið í sam­kyn­hneigt hjóna­band. Hvernig ætli Íranir taki þeirri beiðni?“ spyr Andrés Ingi meðal ann­ars. 

Amir var vísað úr landi í byrjun febr­úar á grund­velli Dyfl­inn­ar­reglu­gerð­ar­innar og hefur nú verið neitað um hæli í Ítalíu. 

„Mér finnst full­kom­lega galið að maður sem á líf og fjöl­skyldu hér á landi geti endað á göt­unni á Ítalíu og jafn­vel verða tek­inn af lífi í Íran af því að „computer says no“,“ sagði Andrés Ingi að lokum.