Teitur Björn Einarsson, aðstoðarmaður fjármálaráðherra sem sækist nú eftir fyrsta sæti á lista Sjálfstæðisflokksins í Norðvesturkjördæmi, skrifar grein í Fréttablaðið í dag þar sem hann leggst gegn uppboðsleið í sjávarútvegi.

„Sjávarútvegurinn er í dag arðbær atvinnugrein sem greiðir skatta og gjöld en það hefur ekki alltaf verið þannig og ekki sjálfgefið að nýting auðlindar gefi af sér arð,“ skrifar Teitur sem telur að úrbóta á fiskveiðistjórnunarkerfinu sé þörf „alveg þangað til öllum markmiðum um sjálfbærni auðlindarinnar, arðsemi greinarinnar og eflingu atvinnu og byggðar í landinu er náð“.

Þá víkur hann að uppboðsleiðinni: „En ekki er að sjá að uppboðsleiðin feli í sér slíkar nauðsynlegar úrbætur. Sú leið stuðlar ekki betur að verndun nytjastofna við Íslandsmið en nú er gert. Þá er óljóst hvernig uppboðsleiðin leiðir til meiri hagkvæmni í greininni en hætta er á að skuldsetning aukist. En aðalatriði er að uppboðsleiðin mun ekki treysta atvinnu eða byggð í landinu enda vandséð hvernig auknar álögur á helstu atvinnugrein landsbyggðarinnar og óvissa innan hennar styrki stöðu fólks sem þar býr og treysti atvinnu þess.“

Jón Steinsson, hagfræðingur við Columbia-háskóla sem hefur talað fyrir uppboðsleið í sjávarútvegi um árabil, fjallar einnig um uppboðsleiðina í pistli sem birtist í Fréttablaðinu í dag. Hann bendir á að uppboð veiðiheimilda í Færeyjum skili landsmönnum þar margfalt meiri arði af auðlindinni en Íslendingar hafa fengið að venjast. Áður hefur Jón gagnrýnt sjálfstæðismenn og sakað þá um tvískinnung fyrir að tala fyrir markaðslausnum á flestum sviðum en leggjast gegn þeirri markaðslausn sem uppboð aflaheimilda er. „Mér finnst alltaf jafn athyglisvert hvað Sjálfstæðisflokkurinn er tortrygginn varðandi þessa markaðslausn. Af hverju skyldi það vera að markaðurinn virkaði illa í þessu tilviki en vel almennt að þeirra mati?“ sagði hann í samtali við Stundina í fyrra þegar greint var frá því að fjórir af sex stjórnmálaflokkum á Alþingi eru fylgjandi uppboði á aflaheimildum í stað þess að úthluta þeim út frá veiðireynslu.