Þetta og ótal margt fleira er á döfinni næstu tvær vikurnar.
Menningarnótt 2019
Hvar? Reykjavík
Hvenær? 24. ágúst
Aðgangseyrir: Ókeypis!
Afmælishátíð Reykjavíkurborgar er haldin hátíðleg 24. ágúst eins og fyrri ár. Boðið er upp á aragrúa af fjölskylduvænum viðburðum, skipulögðum af borgarbúum fyrir borgarbúa. Þeir sem eru tónleikaþyrstir geta meðal annars gætt sér á pönk götuveislu á Ingólfsstræti, endurkomu Ultra Mega Technobandsins Stefáns á Bryggjunni Brugghúsi, speisuðum tónleikum dj. flugvél geimskip í Hafnarhúsinu, viðkunnanlegum tónum Helga Björns og SSSól í Gamla bíói, og fjölskyldutónleikum Maxímús Músíkús í Hörpu. Einnig er hægt að taka þátt í Reykjavíkurmaraþoninu, fylgjast með brauðtertusamkeppni í Hafnarhúsinu, Capoeira sýningu á Austurvelli eða listamannaspjalli á listasöfnum borgarinnar, fá danskennslu víðs vegar og margt fleira. Undir lok kvöldsins verður síðan að sjálfsögðu flugeldasýning við höfnina.
Ágústkvöld / pod koniec sierpnia
Hvar? Gerðarsafn, Midpunkt & Catalína
Hvenær? 23. ágúst–1. sept.
Aðgangseyrir: Ókeypis!
Listamenn frá Póllandi og Íslandi taka þátt í þessari pólsk–íslensku tónlistar- og myndlistarhátíð. Nafn sýningarinnar vísar í titil íslenska dægurlagsins „Ágústkvöld“ og pólska dægurlagsins „Spotkajmy sie pod koniec sierpnia“ sem þýðir „Hittumst í ágústlok“. Á dagskrá verða tónleikar, gjörningar og innsetningar. 23. ágúst kl. 18.00 er sérstakt opnunarhóf í Midpunkt.
Rage
Hvar? Rýmd
Hvenær? 23. ágúst–1. sept.
Aðgangseyrir: Ókeypis!
Rage er hópsýning sjö ungra listamanna sem rannsaka uppsprettu bræði eða ofsareiði og þann sköpunarkraft og orku sem fylgir þeirri tilfinningu. Spurt er hver finni til þessarar tilfinningu og af hverju, hvaðan hún komi, hvort ofsareiði skapi nýjar leiðir, og hvað taki við þegar bræðin kólnar. Sérstakt opnunarhóf er 23. ágúst kl. 18.00.
Litríki kvensjálfsins
Hvar? Flæði
Hvenær? til 28. ágúst
Aðgangseyrir: Ókeypis!
Litríki kvensjálfsins er fyrsta einkasýning Steinunnar Ólínu Hafliðadóttur. Viðfangsefni málverka hennar eru nálægt henni en útfærsla þeirra skapar þó skil á milli verkanna og raunveruleikans. Femínískur bakgrunnur Steinunnar Ólínu endurspeglast í málverkum hennar þar sem konur eru iðulega í aðalhlutverki. Verkin beita sér fyrir því að varpa fram litríkum skjáskotum af vissu kvensjálfi; þá helst til hennar eigin.
Can't think just feel #8
Hvar? Loft
Hvenær? 23. ágúst kl. 21.00
Aðgangseyrir: Ókeypis!
Can’t think just feel er mánaðarleg tónleikasería skipulögð af kanadísku listakonunni Maria-Carmela Raso, einnig þekkt sem MSEA. Á þessu kvöldi koma fram pólski raftónlistarmaðurinn Teenage Lightning, hinn tilfinningaríki Futuregrapher sem hefur verið virkur í rúmlega tvo áratugi, og AAIIEENN, hugarfóstur Hallmars Gauta Halldórssonar, sem býr til polyrhythmískt techno.
Róttæki sumarháskólinn 2019
Hvar? Friðarhúsið
Hvenær? 26. ágúst–1. sept.
Aðgangseyrir: Ókeypis!
Róttæki sumarháskólinn stendur fyrir árlegri fyrirlestraröð þar sem fræðimenn og aktívistar miðla hugmyndum og reynslu sinni. Í ár verða fluttir fyrirlestrar um róttækni, lögfræði og kynbundið ofbeldi, nýfrjálshyggjuvæðingu skólakerfisins, landamæraeftirlit og Ísland, mannréttindi og jafnréttishugtakið, og fleiri málefni. Sumarháskólinn er ókeypis og aðgengilegur öllum.
Auður
Hvar? Kaffi Flóra
Hvenær? 28. & 29. ágúst kl. 21.00
Aðgangseyrir: 3.000 kr.
Silkimjúki og viðkunnanlegi R&B listamaðurinn Auður hefur átt gjöfult ár; hann gaf út breiðskífuna Afsakanir í nóvember síðastliðnum sem var valin raftónlistarplata ársins 2019 á Íslensku tónlistarverðlaununum. Hann heldur huggulega tónleika í Grasagarðinum, en Magnús Jóhann Ragnarsson leikur undir. Búast má við að hann spili mikið af nýju plötu sinni, auk vel valinna eldri laga.
Túttífrútturnar
Hvar? Gaukurinn
Hvenær? 31. ágúst kl. 21.30
Aðgangseyrir: 2.900 kr.
Túttífrútturnar er nýtilkominn burlesque-hópur í ört vaxandi senu burlesque á Íslandi. Frútturnar geta ekki beðið eftir að sýna spenntum og burlesque-þyrstum áhorfendum ný og fersk atriði, auk eldri atriða sem voru til sýnis fyrr í ár. Hópurinn varð til eftir námskeið hjá burlesque-drottningu Íslands, Margréti Erlu Maack, síðastliðinn maí.
Stonecarver’s Dilemma
Hvar? Mengi
Hvenær? 31. ágúst kl. 21.00
Aðgangseyrir: 2.000 kr.
Stonecarver’s Dilemma er skilvirkt gjörningaverk í umsjón Bergs Thomas Andersons og Ash Kilmartin. Áhorfendur bregða sér í hlutverk farandlistamanns sem nýkominn er til Rottbridge í þeim tilgangi að höggva út nýtt verk fyrir kirkju bæjarins. Lifandi tónlist, foley, hættulegt brauðmeti og sérbruggaðir drykkir gætu vísað áhorfendum veginn í að leysa leyndardóma Rottbridge.
101 Festival
Hvar? Origo-völlurinn
Hvenær? 31. ágúst kl. 18.00
Aðgangseyrir: 3.990 kr.
Útvarp 101 blæs til stórtónleika þar sem einvalalið af íslensku tónlistarfólki úr rapp- og poppsenunum koma fram. Fram koma Hjaltalín, 101 BOYS, Vök, Floni & Birnir, Cell7, Auður, Konfekt, Yamaho, Gróa og GDRN.
Hvar mörkin liggja
Hvar? Ásmundarsafn
Hvenær? 31. ágúst–3. nóv.
Aðgangseyrir: 1.800 kr.
Helgi Gíslason er vel þekktur fyrir þrívíðar höggmyndir sínar, bæði í brons og gifs, sem hafa verið sýndar víða hér á landi og erlendis. Verk Helga eru gjarnan sambland hlutbundinna viðfangsefna, þá helst mannslíkamans og óhlutbundinna forma. Þar tekst hann á við tilvist mannsins og tjáir litróf tilfinninganna.
Alræði fegurðar!
Hvar? Kjarvalsstaðir
Hvenær? til 6. október
Aðgangseyrir: 1.800 kr.
Þessi sýning gerir skil fjölbreyttu ævistarfi breska listamannsins William Morris, en hann fékkst bæði við hönnun, skáldskap og var framúrskarandi handverksmaður. Hann var sósíalískur aktívisti og hugmyndir hans um samfélag iðnbyltingarinnar þóttu byltingarkenndar. Á sýningunni eru auk frumteikninga af munstrum Morris; útsaumsverk, húsgögn, fagurlega skreyttar bækur, flísar auk verka eftir samferðamenn Morris á borð við Dante Gabriel Rossetti.
Jazzhátíð Reykjavíkur
Hvar? Hard Rock Café, Listasafn Íslands & Tjarnarbíó
Hvenær? 4.–8. september
Aðgangseyrir: 18.900 kr.
Jazzhátíð Reykjavíkur er haldin í 30. skiptið og af því tilefni verður blásið til djassveislu í nágrenni við Reykjavíkurtjörn. Á þessari uppskeruhátíð íslenskra djasstónlistarmanna gefst færi á að hlýða á framvarðasveitir í faginu ásamt áhugaverðum samstarfsverkefnum íslenskra og erlendra flytjenda. Að venju er einnig boðið upp á erlend atriði sem vakið hafa athygli og hrifningu úti í hinum stóra heimi.
Ómar af kynngimagnaðri fjarveru
Hvar: Nýlistasafn Íslands
Hvenær? til 29. september
Aðgangseyrir: Ókeypis!
Þessi einkasýning Karls Ómarssonar virkar sem leiðarljós og afvegur í senn; verkin fela í sér kunnuglega eiginleika: form, efni, línur, orð og liti, fyrirbæri sem áhorfendur hafa áður litið auga, snert, hlustað á og loks fært í orð. Á sama tíma leysa yfirborð verkanna upp fyrirfram gefnar hugmyndir, fjarlægja samhengi og losa um þær upplýsingar sem hafa safnast saman í huganum yfir lengri tíma.
Móðir og barn
Hvar? Kling & Bang
Hvenær? til 29. september
Aðgangseyrir: Ókeypis!
Á sýningunni Móðir og barn má sjá verk eftir hinn þekkta danska myndlistarhóp A Kassen sem var stofnaður í Kaupmannahöfn 2004. Hvað miðla varðar spanna verk hópsins allt frá gjörninga-innsetningum yfir í skúlptúra og ljósmyndir, oft með tilbúnum fundnum hlutum eða hlutum sem voru framleiddir fyrir eitthvað allt annað en það sem hópurinn gerir við þá.
Stundarskráin
Jólaóratoría, John McClane og hvítt tígrisdýr
Söngur, gleði og gaman um allt land
Jólin, jólin, jólin koma brátt
Stansað, dansað, öskrað
Líf í smástund
Athugasemdir