Forsætisnefnd Alþingis afgreiddi á föstudag álit þess efnis að Þórhildur Sunna Ævarsdóttir, þingmaður Pírata, hafi brotið siðareglur fyrir alþingismenn með ummælum sínum um Ásmund Friðriksson, þingmann Sjálfstæðisflokksins. Fellst nefndin þannig á niðurstöður siðanefndar Alþingis og verður álit hennar birt á vef Alþingis í dag.

Þetta kemur fram í Fréttablaðinu í dag. Þórhildur Sunna sagði í Silfrinu þann 25. febrúar 2018 að uppi væri rökstuddur grunur um að Ásmundur hefði dregið sér fé. Þá lá fyrir að  þingmaðurinn hafði fengið 4,6 milljóna króna aksturskostnað endurgreiddan frá Alþingi vegna 48 þúsund kílómetra aksturs á eigin bíl þrátt fyrir að reglur um þingfararkostnað kveði á um að þingmenn sem aka meira en 15 þúsund kílómetra á ári skuli notast við bílaleigubíl og siðareglur leggi þá skyldu á herðar þingmönnum að sjá til þess að endurgreiðsla fyrir útgjöld sé „í fullkomnu samræmi“ við reglur um þingfararkostnað. Sjálfur hefur Ásmundur viðurkennt að hluti af endurgreiðslunum hafi „orkað tvímælis“ og endurgreitt skrifstofu Alþingis 178 þúsund krónur sem hann fékk vegna ferða um kjördæmi sitt með tökufólki frá sjónvarpsstöðinni ÍNN.

Ásmundur kvartaði í kjölfarið til forsætisnefndar, sem vísaði málinu til siðanefndar. „Leggja ber áherslu á í þessu samhengi að í siðanefndarmáli þessu eru til skoðunar ummæli [Þórhildar Sunnu] á grundvelli siðareglna fyrir alþingismenn en ekki hvort [Ásmundur] hafi farið á svig við reglur um endurgreiðslu aksturskostnaðar eða hvort „rökstuddur grunur“ sé um slíkt,“ segir í áliti forsætisnefndar.

Tveir nefndarmanna voru andvígir niðurstöðu forsætisnefndar í bókun, þeir Jón Þór Ólafsson, þingmaður Pírata, og Þorsteinn Sæmundsson, þingmaður Miðflokksins. Þorsteinn var ósammála niðurstöðunni þar sem hann taldi bæði Þórhildi Sunnu og Björn Leví Gunnarsson, þingmann Pírata, hafa brotið gegn siðareglunum. Fulltrúi Samfylkingarinnar, Guðjón Brjánsson, gagnrýndi fyrirkomulagið í sérbókun, en greiddi þó atkvæði með niðurstöðunni.

„Sönn ummæli Þórhildar Sunnu um mögulega spillingu eru túlkuð sem siðabrot á Alþingi,“ segir Jón Þór í bókun sinni. „Þessi afgreiðsla er til þess fallin að fela mögulega spillingu og þagga niðri í þeim sem vilja uppræta hana. Þessi afgreiðsla gengur gegn tilgangi siðareglnanna.“